କନକ ବ୍ୟୁରୋ: ଗତ କିଛି ଦିନ ଧରି ପାକିସ୍ତାନର ଶୀର୍ଷ ନେତାମାନେ ଭାରତ ବିଷୟରେ ବିଭିନ୍ନ ବୟାନ ଦେଉଛନ୍ତି । ପାକିସ୍ତାନର ଯୁଦ୍ଧ ବୟାନ ଉପରେ ଭାରତ ତୀବ୍ର ବିରୋଧ କରିଛି । ଭାରତ ସ୍ପଷ୍ଟ ଭାବରେ କହିଛି, ଯଦି ପାକିସ୍ତାନ କୌଣସି ପ୍ରକାରର ସାହସିକତା ଦେଖାଏ, ତେବେ ତାକୁ ଯନ୍ତ୍ରଣାଦାୟକ ପରିଣାମ ଭୋଗ କରିବାକୁ ପଡିବ । ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ ସାମ୍ବାଦିକ ସମ୍ମିଳନୀରେ କହିଛନ୍ତି,ଆମେ ପାକିସ୍ତାନୀ ନେତୃତ୍ୱ ଦ୍ୱାରା ଭାରତ ବିରୁଦ୍ଧରେ ଜାରି କରାଯାଇଥିବା ବେପରୁଆ, ଯୁଦ୍ଧବାଦୀ ଏବଂ ଘୃଣ୍ୟ ମନ୍ତବ୍ୟ ବିଷୟରେ ରିପୋର୍ଟ ଦେଖିଛୁ । ଭାରତ କହିଛି, ପାକିସ୍ତାନ ତା’ର ବୟାନକୁ ସଂଯତ କରିବା ଉଚିତ, କାରଣ କୌଣସି ଭୁଲ ପଦକ୍ଷେପର ପରିଣାମ ନିକଟ ଅତୀତରେ ଦେଖାଯାଇଥିବା ପରି କଷ୍ଟଦାୟକ ହେବ । ଭାରତ ଏହାକୁ ପାକିସ୍ତାନର ଅଭ୍ୟାସଗତ ରାଜନୈତିକ ଚାଲ ଭାବେ ଦେଖୁଛି, ଯାହା ଦ୍ଵାରା ସେମାନେ ନିଜର ଆଭ୍ୟନ୍ତରୀଣ ସମସ୍ୟାରୁ ଦୃଷ୍ଟି ଅନ୍ୟତ୍ର ବଦଳାଇବାକୁ ଚେଷ୍ଟା କରୁଛନ୍ତି ।