ମିଳିଲା ଅନୁମତି, ଭାରତ ଆସିବେ ଚୀନ୍ ପର୍ଯ୍ୟଟକ : ଚୀନ୍‌ ନାଗରିକଙ୍କୁ ମିଳବ ଭିସା

କନକ ବ୍ୟୁରୋ : ଭାରତ ଆଜି ଠାରୁ ଚୀନ୍ ନାଗରିକଙ୍କୁ ପର୍ଯ୍ୟଟନ ଭିସା ଦେବା ଆରମ୍ଭ କରିଛି । ପାଞ୍ଚ ବର୍ଷ ଧରି ଲାଗି ରହିଥିବା ଏହି ପ୍ରତିବନ୍ଧକ ଏବେ ହଟାଇ ଦିଆଯାଇଛି । ଚୀନ୍‌ରେ ଥିବା ଭାରତୀୟ ଦୂତାବାସ ସୋସିଆଲ ମିଡିଆ ପ୍ଲାଟଫର୍ମ ୱେଇବୋରେ ଏହା ଘୋଷଣା କରି ଭିସା ଆବେଦନ ପ୍ରକ୍ରିୟା ବାବଦରେ ସୂଚନା କରିଛି । ପୋଷ୍ଟରେ ଲେଖାଯାଇଛି, "୨୪ ଜୁଲାଇ ୨୦୨୫ ଠାରୁ, ଚୀନ୍ ନାଗରିକମାନେ ଭାରତ ପରିଦର୍ଶନ କରିବା ପାଇଁ ପର୍ଯ୍ୟଟନ ଭିସା ପାଇଁ ଆବେଦନ କରିପାରିବେ । ସେମାନଙ୍କୁ ପ୍ରଥମେ ଅନଲାଇନରେ ଭିସା ଫର୍ମ ପୂରଣ କରିବାକୁ ପଡିବ ଏବଂ  ଏହାର ଏକ ପ୍ରିଣ୍ଟ କପି ନେବାକୁ ପଡିବ । ତା'ପରେ ଅନଲାଇନ୍ ଆବେଦନ ପରେ, ସେମାନଙ୍କୁ ଭାରତୀୟ ଭିସା ଆବେଦନ କେନ୍ଦ୍ରରେ ପାସପୋର୍ଟ, ଆବେଦନ ଫର୍ମ  ଏବଂ ଅନ୍ୟାନ୍ୟ ଆବଶ୍ୟକୀୟ କାଗଜପତ୍ର ସହିତ ଆବେଦନ ଦାଖଲ କରିବାକୁ ପଡିବ ।"

ଆପଣଙ୍କୁ କହିରଖୁଛୁ ଯେ ୧୬ ଜୁନ୍ ୨୦୨୦ରେ ଗାଲୱାନ୍ ଭ୍ୟାଲିରେ ଭାରତ ଏବଂ ଚୀନ୍ ସୈନିକଙ୍କ ମଧ୍ୟରେ ହୋଇଥିବା ହିଂସାତ୍ମକ ସଂଘର୍ଷ ପରେ, ଦୁଇ ଦେଶ ମଧ୍ୟରେ ସମ୍ପର୍କ ବହୁତ ଉତ୍ତେଜନାପୂର୍ଣ୍ଣ ହୋଇଯାଇଥିଲା । ଏହା ପରେ, ଭାରତ ଚୀନ୍ ବିରୁଦ୍ଧରେ ଅନେକ କଠୋର ନିଷ୍ପତ୍ତି ନେଇଥିଲା । ଚୀନ୍ ନିବେଶ ଉପରେ ନିୟମ କଠୋର କରିଥିଲା ଏବଂ ଶହ ଶହ ଚୀନ୍ ଆପ୍ ଉପରେ ପ୍ରତିବନ୍ଧକ ଲଗାଇଥିଲା । ଯଦିଓ କୋଭିଡ୍ ସମୟରେ ପର୍ଯ୍ୟଟନ ଭିସା ଉପରେ ପ୍ରତିବନ୍ଧକ ଘୋଷଣା କରାଯାଇଥିଲା, ଏବେ ଏହାକୁ ରଦ୍ଦ କରିଦିଆଯାଇଛି ।

ଅନ୍ୟପକ୍ଷରେ, ଚୀନ୍ ସରକାରୀ ଗଣମାଧ୍ୟମ ଗ୍ଲୋବାଲ୍ ଟାଇମ୍ସ ମଧ୍ୟ ଏହି ଖବରକୁ ନିଶ୍ଚିତ କରି କହିଛି ଯେ ଚୀନ୍ ନାଗରିକମାନେ ବେଜିଂ, ସାଂଘାଇ ଏବଂ ଗୁଆଙ୍ଗଝୋରେ ଥିବା ଭିସା କେନ୍ଦ୍ରରେ ବ୍ୟକ୍ତିଗତ ଭାବରେ ଆବେଦନ ଦାଖଲ କରିପାରିବେ । ୨୦୨୦ ପରେ ଏହା ପ୍ରଥମ ଥର ହେବ ଯେତେବେଳେ ଭାରତ ଚୀନ୍ ପର୍ଯ୍ୟଟକଙ୍କୁ ଭିସା ଦେବ ।

୨୦୨୦ ମସିହାରେ, କୋଭିଡ୍-୧୯ ମହାମାରୀ ପରେ ଭାରତ ସମସ୍ତ ପର୍ଯ୍ୟଟନ ଭିସା ସ୍ଥଗିତ କରିଥିଲା । ଚୀନ୍ ମଧ୍ୟ ମହାମାରୀ ସମୟରେ ଭାରତୀୟ ନାଗରିକ ଏବଂ ଅନ୍ୟ ବିଦେଶୀଙ୍କ ପାଇଁ ଭିସା ସ୍ଥଗିତ କରିଥିଲା, କିନ୍ତୁ ୨୦୨୨ ମସିହାରେ ଛାତ୍ର ଏବଂ ବ୍ୟବସାୟିକ ପର୍ଯ୍ୟଟକଙ୍କ ପାଇଁ ଭିସା କଟକଣାକୁ ଉଠାଇ ଦେଇଥିଲା ।