ସତ ଲୁଚାଇଥିଲା ସନ୍ଦୀପ ଘୋଷ ।

କନକ ବ୍ୟୁରୋ: କୋଲକାତା ଡାକ୍ତର ଦୁଷ୍କର୍ମ ଓ ହତ୍ୟା ମାମଲାରେ ଚାଂଚଲ୍ୟକର ଖୁଲ୍ଲାସା । ଅଭିଯୁକ୍ତ ସନ୍ଦୀପ ଘୋଷ ନାଁରେ ସଙ୍ଗୀନ ଅଭିଯୋଗ ଆଣିଛି ସିବିଆଇ । ଡାକ୍ତରଙ୍କ ଦୁଷ୍କର୍ମ ଓ ହତ୍ୟା ମାମଲାରେ କୌଣସି ପ୍ରକାର ଏଫଆଇଆର ରୁଜୁ କରାଯାଉ ବୋଲି ଚାହୁଁନଥିଲେ କଲେଜର ପୂର୍ବତନ ଅଧ୍ୟକ୍ଷ । ଏଥିସହ ପୁଲିସକୁ ଭୁଆଁ ବୁଲାଇବାକୁ ଓ ସତ ଲୁଚାଇବାକୁ ସବୁପ୍ରକାର କସରତ କରିଥିବା ମଧ୍ୟ ସିବିଆଇ ଦାବି କରିଛି । ପଲିଗ୍ରାଫ ଟେଷ୍ଟ ରିପୋର୍ଟ ଆଧାରରେ ଏହି ଦାବି କରିଛି ସିବିଆଇ ।

କୋଲକାତା କାଣ୍ଡ,ସିବିଆଇର ବଡ଼ ଖୁଲ୍ଲାସା
ସତ ଲୁଚାଇଥିଲା ସନ୍ଦୀପ ଘୋଷ
ପୁଲିସକୁ ଭୁଆଁ ବୁଲାଉଥିଲା ଅଭିଯୁକ୍ତ
ହତ୍ୟା ଘଟଣାକୁ ଆତ୍ମହତ୍ୟା ରୂପ ଦେବାକୁ ଚେଷ୍ଟା

ଆରଜି କର ମେଡିକାଲ କଲେଜ ଓ ହସ୍ପିଟାଲର ପୂର୍ବତନ ପ୍ରିନ୍ସିପାଲ ସନ୍ଦୀପ ଘୋଷଙ୍କ ବାବଦରେ ଆଉ ଏକ ସତ ସାମ୍ନାକୁ ଆସିଛି । ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣାକୁ ସେ ଆତ୍ମହତ୍ୟାର ରୂପ ଦେବାକୁ ଚେଷ୍ଟା କରୁଥିବା ସିବିଆଇ କହିଛି । କଲିକତା ହାଇକୋର୍ଟରେ ତଦନ୍ତ ରିପୋର୍ଟ ଦାଖଲ କରିବା ସମୟରେ ଏପରି କହିଛି ତଦନ୍ତକାରୀ ସଂସ୍ଥା ସିବିଆଇ । ଏଥିସହ ଗିରଫ ହୋଇଥିବା ତାଲା ପୁଲିସ ଷ୍ଟେସନ ଇନଚାର୍ଜ ଅଭିଜିତ ମଣ୍ଡଳଙ୍କ ବିରୁଦ୍ଧରେ ମଧ୍ୟ ସଙ୍ଗୀନ ଅଭିଯୋଗ ଆଣିଛି । କୋର୍ଟଙ୍କୁ ସିବିଆଇ କହିଛି ଯେ, ଅଗଷ୍ଟରେ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟାର ପର ଦିନ ସକାଳ ଖବର ପାଇଥିଲେ ମଧ୍ୟ ତୁରନ୍ତ ଡାକ୍ତରଖାନାରେ ପହଞ୍ଚି ନଥିଲେ ସନ୍ଦୀପ ଘୋଷ । ଘଟଣାକୁ ଗୁରୁତ୍ୱର ସହ ନେଇନଥିଲେ । ଥାନାରେ ମଧ୍ୟ ନିଜ ଆଡ଼ୁ କୌଣସି ମାମଲା ରୁଜୁ କରିନଥିଲେ । ଏପରିକି ମୃତ ଟ୍ରେନି ଡାକ୍ତରଙ୍କ ଶରୀରରେ ବାହ୍ୟ ଆଘାତ ଥାଇ ମଧ୍ୟ ଆତ୍ମହତ୍ୟାର ନୂଆ ଥିଓରି ଲେଖିଥିଲେ । ଘଟଣା ପରେ ସେ ଜଣେ ଓକିଲ ଏବଂ ପୁଲିସଙ୍କ ସହ ମଧ୍ୟ ଯୋଗାଯୋଗ କରିଥିବା ସିବିଆଇ କହିଛି । ସିବିଆଇ ଆହୁରି କହିଛି ଯେ, ଡାକ୍ତର ସନ୍ଦୀପ ଘୋଷ ମୃତଦେହର ଡାକ୍ତରୀ ମାଇନା କରାଇବାରେ ବିଫଳ ହୋଇଥିଲେ ଏବଂ ତୁରନ୍ତ ଶବଗାରକୁ ମୃତଦେହ ନେଇଯିବାକୁ କହିଥିଲେ । ସେପଟେ ଗିରଫ ହୋଇଥିବା ପୁଲିସ ଅଧିକାରୀ ଅଭିଜିତ ମଣ୍ଡଳ ମଧ୍ୟ ଦାୟିତ୍ୱରେ ଅବହେଳା କରିଥିବା ସିବିଆଇ ଦର୍ଶାଇଛି । ସେ ଏପରି ଜଘନ୍ୟ ହତ୍ୟାକାଣ୍ଡ ବାବଦରେ ଖବର ପାଇଥିଲେ ମଧ୍ୟ ଘଣ୍ଟାଏ ପରେ ଡାକ୍ତରଖାନାରେ ପହଞ୍ଚିଥିଲେ। ଏପରିକି ପୁଲିସ ମଧ୍ୟ ଠିକ୍ ସମୟରେ ମାମଲା ରୁଜୁ କରିନଥିଲା । ଘଟଣାସ୍ଥଳରେ ନ ପହଞ୍ଚିବାରୁ ଅପରାଧ ସ୍ଥଳକୁ ସାଧାରଣ ଲୋକେ ଯାଇଥିଲେ ଏବଂ କ୍ରାଇମ୍ ସ୍ଥାନର ଫଟୋ ଉଠାଇଥିଲେ, ଯାହା ପରେ ଲିକ୍ ହୋଇଥିଲା ବୋଲି ସିବିଆଇ କହିଛି।
ସତ ଲୁଚାଇଥିଲେ ସନ୍ଦୀପ ଘୋଷ !

ମାମଲା ସମ୍ବନ୍ଧରେ ସୂଚନା ମିଳିବା ପରେ ଘଟଣାସ୍ଥଳରେ ତୁରନ୍ତ ପହଁଚିନଥିଲେ
ଘରେ ରହି ମାମଲା ସମ୍ବନ୍ଧରେ ଓକିଲଙ୍କ ସହ ପରାମର୍ଶ ନେଇଥିଲେ
ଏଫଆଇଆର ରୁଜୁ ପାଇଁ ଓକିଲ ତାଙ୍କୁ ପରାମର୍ଶ ଦେଇଥିଲେ
ତଥାପି ସନ୍ଦୀପ ଏଫଆଇଆର ରୁଜୁ କରିନଥିଲେ
ପୁଲିସ ଅଧିକାରୀ ଅଭିଜିତ ମଣ୍ଡଳଙ୍କ ସହ ସର୍ମ୍ପକରେ ଥିଲେ
ଭୁଆଁ ବୁଲାଇବାକୁ ମିଛ ବୟାନ ଦେଉଛନ୍ତି ସନ୍ଦୀପ

ଆରଜି କର ହସ୍ପିଟାଲରେ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ହତ୍ୟା ଘଟଣା ସମୟରେ ସନ୍ଦୀପ ଘୋଷ ସେହି ମେଡିକାଲ କଲେଜର ପ୍ରିନ୍ସିପାଲ ଥିଲେ। ଏହାପରେ ତାଙ୍କ ବିରୁଦ୍ଧରେ ଗୋଟିଏ ପରେ ଗୋଟିଏ ଅଭିଯୋଗ ଆସିଥିଲା । ସିବିଆଇ ତାଙ୍କୁ ପ୍ରଥମେ ଆର୍ଥିକ ହେରଫେର ଅଭିଯୋଗରେ ଗିରଫ କରିବା ପରେ ନିକଟରେ ଦୁଷ୍କର୍ମ ଓ ହତ୍ୟାକାଣ୍ଡ ମାମଲାର ପ୍ରମାଣ ନଷ୍ଟ କରିବା ଅଭିଯୋଗରେ ଗିରଫ କରିଛି ।