ମନ୍ଦିର ଗର୍ଭଗୃହରେ ଜବରଦସ୍ତ ପଶିବା ଘଟଣା; ବିଜେପି ସାଂସଦ ନିଶିକାନ୍ତ ଦୁବେ ଓ ମନୋଜ ତିୱାରୀଙ୍କ ନାଁରେ ମାମଲା ରୁଜୁ

କନକ ବ୍ୟୁରୋ: ମନ୍ଦିର ଗର୍ଭଗୃହରେ ଜୋର ଜବରଦସ୍ତ ପଶିବା ଅଭିଯୋଗରେ ଛନ୍ଦି ହୋଇ ପଡ଼ିଛନ୍ତି ବିଜେପିର ଦୁଇ ଫାୟାରବ୍ରାଣ୍ଡ ସାଂସଦ । ନିଶିକାନ୍ତ ଦୁବେ ଓ ମନୋଜ ତିୱାରୀଙ୍କ ଉପରେ ଅଭିଯୋଗ ଆସିବା ପରେ ଘଟଣା ନୂଆ ମୋଡ଼ ନେଇଛି । ଥାନାରେ ନିଶିକାନ୍ତ ପହଞ୍ଚିବା ପରେ ହାଇଡ୍ରାମା ଦେଖିବାକୁ ମିଳିଛି ।

ଝାଡ଼ଖଣ୍ଡ ରାଜନୀତି ସରଗରମ । କାରଣ କୌଣସି ନିର୍ବାଚନ କି ରାଜନେତାଙ୍କ ବୟାନବାଜି ନୁହେଁ । ସରଗରମ ରାଜନୀତି ପଛର କାରଣ ସାଂସଦ ନିଶିକାନ୍ତ ଦୁବେ । ବାବା ଧାମ ମନ୍ଦିର ଗର୍ଭଗୃହରେ ନିଶିକାନ୍ତ ଜବରଦସ୍ତ ପଶିବା ଯୋଗୁଁ ଯେଉଁ ବିବାଦ ଛିଡ଼ା ହୋଇଥିଲା ସେଥିରେ ଆଜି ନୂଆ ଟୁଇଷ୍ଟ ଆସିଛି । ଥାନାରେ ପହଞ୍ଚିଛନ୍ତି ସାଂସଦ ଓ କହିଛନ୍ତି ମୁଁ ପଳାତକ ନୁହେଁ । ମୁଁ ଏଠାକାର ସାଂସଦ । ସ୍ଥାନୀୟ ଜନତାଙ୍କ ଆଶୀର୍ବାଦରୁ ୪ ଥର ସାଂସଦ ହୋଇଛି । ଆଇନକୁ ପାଳିବା ମୋର କର୍ତ୍ତବ୍ୟ । ମୋ ବିରୋଧରେ ଯେତିକି ଥର ମାମଲା ରୁଜୁ କରିବେ, ସେତିକି ଥର ମୁଁ ଆତ୍ମସମର୍ପଣ କରିବି ।

ମନ୍ଦିର ପୂଜକ କାର୍ତ୍ତିକ ନାଥ ଠାକୁରଙ୍କ ଅଭିଯୋଗ ଉପରେ ଏଫଆଇଆର ରୁଜୁ ହୋଇଛି । ଶ୍ରାବଣ ମାସରେ ଭକ୍ତଙ୍କ ସଂଖ୍ୟା ବୃଦ୍ଧିକୁ ଦୃଷ୍ଟିରେ ରଖି ଭିଆଇପି କିମ୍ବା ଭିଭିଆଇପି ପ୍ରବେଶ ଉପରେ ପ୍ରତିବନ୍ଧକ ଲାଗିଥିଲା । ଅଗଷ୍ଟ ୨ ତାରିଖ ରାତି ୮.୪୫ ରୁ ୯ଟା ମଧ୍ୟରେ ଉଭୟ ବିଜେପି ସାଂସଦ ବଳପୂର୍ବକ ମନ୍ଦିର ଗର୍ଭଗୃହରେ ପ୍ରବେଶ କରିଥିଲେ ।  ଧାର୍ମିକ ପରମ୍ପରା ଏବଂ ଭାବନାକୁ ଆଘାତ ଦେଇଥିଲେ ।  ସୁରକ୍ଷା କାରଣରୁ ନିୟୋଜିତ ପୁଲିସ କର୍ମଚାରୀଙ୍କ ସହ ଧସ୍ତାଧସ୍ତି କରିଥିଲେ ।  ସରକାରୀ କାର୍ଯ୍ୟରେ ବାଧା ସୃଷ୍ଟି କରିଥିଲେ ନିଶିକାନ୍ତ ଦୁବେ, ମନୋଜ ତିୱାରୀ । ଏମାନଙ୍କ ବିରୁଦ୍ଧରେ ବାବା ବୈଦ୍ୟନାଥ ମନ୍ଦିର ଥାନାରେ ଏକ ଏଫଆଇଆର ରୁଜୁ ହୋଇଛି । ବାବା ଧାମରେ ପ୍ରବେଶକୁ ନେଇ ଝାଡ଼ଖଣ୍ଡ ରାଜନୀତି ଉଷ୍ମ ହୋଇଛି । ଭାରତୀୟ ଜନତା ପାର୍ଟିର ଦୁଇ ସାଂସଦଙ୍କ ଉପରେ ଏଫଆଇଆର ପରେ, ବିଜେପି ହେମନ୍ତ ସୋରେନ ସରକାରଙ୍କୁ ଆକ୍ରମଣ କରିଛି ।