କନକ ବ୍ୟୁରୋ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସ୍ୱାସ୍ଥ୍ୟାବସ୍ଥାକୁ ନେଇ କଳ୍ପନାଜଳ୍ପନା ଚାଲିଥିବା ବେଳେ ତାଙ୍କ ଡେପୁଟି ବା ଉପରାଷ୍ଟ୍ରପତି ଜେଡି ଭାନ୍ସ କହିଛନ୍ତି ବଡ଼ କଥା । ଜେଡି କହିଛନ୍ତି, ଯଦି ଆମେରିକା ଏକ ଭୟଙ୍କର ଦୁଃଖଦ ପରିସ୍ଥିତିର ସମ୍ମୁଖୀନ ହୁଏ, ତେବେ ସେ ଆମେରିକାର କମାଣ୍ଡର-ଇନ୍-ଚିଫ୍ ଭାବେ ଦାୟିତ୍ବ ନେବାକୁ ପ୍ରସ୍ତୁତ ଅଛନ୍ତି । ତେବେ ଟ୍ରମ୍ପ ସମ୍ପୂର୍ଣ୍ଣ ସୁସ୍ଥ ଥିବା ଦମ୍ଭୋକ୍ତି ବାଢ଼ିଛନ୍ତି ଭାନ୍ସ । ‘ୟୁଏସ୍ଏ ଟୁଡେ’କୁ ଦେଇଥିବା ଏକ ସାକ୍ଷାତ୍‌କାରରେ ଭାନ୍ସ ଟ୍ରମ୍ପଙ୍କୁ ଜଣେ ଅକ୍ଳାନ୍ତ ନେତା ଭାବରେ ଚିତ୍ରିତ କରିବା ସହ ସେ ବିଳମ୍ବିତ ରାତିରେ ଓ ସକାଳେ ବି କାମ କରନ୍ତି ବୋଲି କହିଛନ୍ତି ।

Advertisment

ଉପରାଷ୍ଟ୍ରପତି କହିଛନ୍ତି, ଆମେରିକା ରାଷ୍ଟ୍ରପତି ସମ୍ପୂର୍ଣ୍ଣ ସୁସ୍ଥ ଅଛନ୍ତି, ସେ ତାଙ୍କ ଅବଶିଷ୍ଟ କାର୍ଯ୍ୟକାଳ ପୂରଣ କରିବେ ଏବଂ ଆମେରିକୀୟ ଲୋକଙ୍କ ପାଇଁ ମହାନ କାର୍ଯ୍ୟ କରିବେ ବୋଲି ମୁଁ ବିଶ୍ୱାସ କରୁଛି । ଆବଶ୍ୟକ ପଡ଼ିଲେ ସେ ରାଷ୍ଟ୍ରପତି ପଦ ଗ୍ରହଣ କରିବାକୁ ପ୍ରସ୍ତୁତ ଅଛନ୍ତି କି ବୋଲି ପଚରାଯିବାରୁ ଭାନ୍ସ କହିଛନ୍ତି ଯେ, ତାଙ୍କ କାର୍ଯ୍ୟକାଳ ତାଙ୍କୁ ଏହି ଦାୟିତ୍ୱ ପାଇଁ ପ୍ରସ୍ତୁତ କରି ରଖିଛି । ଗତ ୨୦୦ ଦିନ ମଧ୍ୟରେ ମୁଁ ବହୁତ ଭଲ ପ୍ରଶିକ୍ଷଣ ପାଇଛି । ଭଗବାନ ନ କରନ୍ତୁ, ଯଦି କିଛି ଦୁଃଖଦ ଘଟଣା ଘଟେ, ତେବେ ମୁଁ ଗତ ୨୦୦ ଦିନ ମଧ୍ୟରେ ପାଇଥିବା ପ୍ରଶିକ୍ଷଣଠାରୁ ଭଲ କାମ କରିପାରିବି । ୭୯ ବର୍ଷ ବୟସରେ ଡୋନାଲ୍ଡ ଟ୍ରମ୍ପ ସବୁଠାରୁ ବୟସ୍କ ରାଷ୍ଟ୍ରପତି ଭାବେ ଦାୟିତ୍ୱ ଗ୍ରହଣ କରିଥିବା ବେଳେ ତାଙ୍କ ୪୧ ବର୍ଷୀୟ ଡେପୁଟି ଜେଡି ଭାନ୍ସ ଆମେରିକା ଇତିହାସରେ ତୃତୀୟ ସର୍ବକନିଷ୍ଠ ଉପରାଷ୍ଟ୍ରପତି ।

ନିକଟରେ ଓଭାଲ ଅଫିସରେ ଦକ୍ଷିଣ କୋରିଆ ରାଷ୍ଟ୍ରପତି ଲି ଜେ ମ୍ୟୁଙ୍ଗଙ୍କ ସହ ସାକ୍ଷାତ୍ ବେଳେ ରାଷ୍ଟ୍ରପତିଙ୍କ ହାତରେ ଏକ ବଡ଼ କଳାଦାଗ ଦେଖିବାକୁ ମିଳିବା ପରେ ଟ୍ରମ୍ପଙ୍କ ସ୍ୱାସ୍ଥ୍ୟକୁ ନେଇ ବଢୁଥିବା ଚର୍ଚ୍ଚା ମଧ୍ୟରେ ଭାନ୍ସ ଏହି ମନ୍ତବ୍ୟ ଦେଇଛନ୍ତି । ଏପରିକି ଚଳିତ ବର୍ଷ ଫେବ୍ରୁଆରି ମାସରେ ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନଙ୍କ ସହ ହ୍ୱାଇଟ୍ ହାଉସ୍ ବୈଠକରେ ଟ୍ରମ୍ପଙ୍କ ଡାହାଣ ହାତରେ କଳାଦାଗ ଦେଖିବାକୁ ମିଳିଥିଲା । ଜୁଲାଇରେ ୟୁରୋପୀୟ ଆୟୋଗର ସଭାପତି ଉର୍ସୁଲା ଭନ୍ ଡେର୍ ଲେୟେନଙ୍କ ସହ ସ୍କଟଲାଣ୍ଡରେ ଆଲୋଚନା ବେଳେ ସେହି ହାତକୁ ମେକ୍‌ଅପ୍‌ରେ ଲୁଚାଇ ରଖାଯାଇଥିଲା । ପରେ ଟ୍ରମ୍ପଙ୍କ ଡାକ୍ତର ସିନ୍ ବାର୍ବାବେଲା କହିଥିଲେ, ଟ୍ରମ୍ପ କ୍ରନିକ୍ ଭେନ୍ସ ଇନ୍‌ସଫିସିଏନ୍ସି (ସିଭିଆଇ) ରୋଗରେ ପୀଡ଼ିତ । ବାରମ୍ବାର ହାତ ମିଳାଇବା କାରଣରୁ ଏହି ଦାଗ ହୋଇଥିବା ରିପୋର୍ଟରେ ଦର୍ଶାଯାଇଛି ।