ସଂସଦରେ ଅମିତ ଶାହାଙ୍କ ଦୃଢୋକ୍ତି; ପିଓକେ ଦେଇଥିଲା କଂଗ୍ରେସ, ଆମେ ଫେରାଇ ଆଣିବୁ

କନକ ବ୍ୟୁରୋ : ଅପରେସନ ସିନ୍ଦୂରକୁ ନେଇ ଆଲୋଚନା ଭିତରେ ରାଜ୍ୟସଭାରେ ବଡ଼ ବୟାନ ରଖିଛନ୍ତି ଗୃହମନ୍ତ୍ରୀ ଅମିତ୍ ଶାହା । ବିଜେପି ସରକାର ପାକ୍ ଅଧିକୃତ କାଶ୍ମୀର ଆଣିବା ପାଇଁ କାମ କରିବ ବୋଲି କହିଛନ୍ତି ଶାହା । ଏହାସହ କଂଗ୍ରେସ ସରକାର ଉପରେ ବର୍ଷିଛନ୍ତି ଶାହା । ଅପରେସନ ସିନ୍ଦୂର ଜରିଆରେ ଆତଙ୍କୀଙ୍କ ଆଡ୍ଡାକୁ ଛାଡ଼ିନି ସେନା । ଅପରେସନ ମହାଦେବ ଜରିଆରେ ପହଲଗାମ ଆକ୍ରମଣର ମାଷ୍ଟରମାଇଣ୍ଡକୁ ନିପାତ କରିଛନ୍ତି ଭାରତୀୟ ଯବାନ । ପହଲଗାମ ଆକ୍ରମଣ ପରେ କଂଗ୍ରେସ ସରକାର ସମୟରେ ହୋଇଥିବା ସିନ୍ଧୁ ଚୁକ୍ତିକୁ ତୁରନ୍ତ ରଦ୍ଦ କରିଥିଲା ଭାରତ । ଏହାପୂର୍ବରୁ ମଧ୍ୟ ଲୋକସଭାରେ କଂଗ୍ରେସ ଉପରେ ବର୍ଷିଥିଲେ ଶାହା ।

ସେପଟେ ରାଜ୍ୟସଭାରେ ବୈଦେଶିକ ମନ୍ତ୍ରୀ ଏସ୍‌ ‌ଜୟଶଙ୍କର ଅପରେସନ ସିନ୍ଦୂର ଉପରେ ଆଲୋଚନା ଆରମ୍ଭ କରିଛନ୍ତି । ବୈଦେଶିକ ମନ୍ତ୍ରୀ ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ ରଖିବା ନିଷ୍ପତ୍ତିକୁ ପହଲଗାମ ଆକ୍ରମଣ ପରେ ନିଆଯାଇଥିବା ସବୁଠାରୁ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ବର୍ଣ୍ଣନା କରି କରିଛନ୍ତି । ରାଜ୍ୟସଭାରେ ପହଲଗାମ ଆକ୍ରମଣ ପରେ ସରକାରଙ୍କ ଦ୍ୱାରା ନିଆଯାଇଥିବା ପଦକ୍ଷେପଗୁଡ଼ିକର ତାଲିକା ଦେଇ ବୈଦେଶିକ ମନ୍ତ୍ରୀ ଏସ ଜୟଶଙ୍କର କହିଛନ୍ତି , ପାକିସ୍ତାନୀ ନାଗରିକଙ୍କ ଭିସା ବାତିଲ କରିଛୁ ।

ବୈଦେଶିକ ମନ୍ତ୍ରୀ ଏସ ଜୟଶଙ୍କର ଆହୁରି କହିଛନ୍ତି, ଭାରତ ବର୍ଷ ବର୍ଷ ଧରି ସୀମାପାର ଆତଙ୍କବାଦର ଶିକାର ହୋଇଆସୁଛି । ଆମେ ଯାହା କହିବୁ ତାହା କରିବୁ । ଆତଙ୍କବାଦକୁ ଏକ ବିଶ୍ୱସ୍ତରୀୟ ଏଜେଣ୍ଡା କରିଥିଲୁ । ମୋଦୀ ସରକାରଙ୍କ ପ୍ରୟାସ ଯୋଗୁଁ ଏହା ହୋଇପାରିଛି । ଆଜି ଆତଙ୍କବାଦୀଙ୍କ ପାଣ୍ଠି ବନ୍ଦ ହୋଇଯାଇଛି ବୋଲି ଗୃହରେ ପ୍ରତିକ୍ରିୟା ଦେଇଛନ୍ତି ବୈଦେଶିକ ମନ୍ତ୍ରୀ । କେବଳ ଏହି ପ୍ରସଙ୍ଗ ନୁହେଁ ସିନ୍ଧୁ ଜଳ ଚୁକ୍ତି ନେଇ ପୁଣି ପାକିସ୍ତାନକୁ ଚେତାବନୀ ଦେଇଛନ୍ତି ବୈଦେଶିକ ମନ୍ତ୍ରୀ । ସେ କହିଛନ୍ତି କି, ଯଦି ପାକିସ୍ତାନ ଏଭଳି ଭାବେ ଆତଙ୍କବାଦକୁ ସମର୍ଥନ ଜାରି ରଖେ ତେବେ ସବୁଦିନ ପାଇଁ ସିନ୍ଧୁ ନଦୀର ଜଳ ବନ୍ଦ ରହିବ ।