କନକ ବ୍ୟୁରୋ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟାରିଫ୍ ଯୁଦ୍ଧର ମୁକାବିଲା ପାଇଁ ବ୍ରିକ୍ସ ଏକାଠି । ବ୍ରିକ୍ସ ଦେଶ ସମୂହ ନିଜନିଜ ଭିତରେ ବାଣିଜ୍ୟ ସମ୍ପର୍କ ବୃଦ୍ଧି ପାଇଁ ଉଦ୍ୟମ ଆରମ୍ଭ କରିଛନ୍ତି। ଗତ କିଛିଦିନର ଘଟଣାବଳୀରୁ ଏହା ସ୍ପଷ୍ଟ  ହେଉଛି । ଯାହା ପୂର୍ବରୁ କେବେ ଦେଖିବାକୁ ମିଳି ନଥିଲା ।

Advertisment

ବିଭିନ୍ନ ଦେଶ ଉପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଟାରିଫ୍ ଲଗାଇଥିବା ବେଳେ ବେଶି କ୍ଷତିଗ୍ରସ୍ତ ହେଉଛନ୍ତି ବ୍ରିକ୍ସ ଦେଶ ସମୂହ । ବ୍ରିକ୍ସ ଦେଶଗୁଡ଼ିକୁ ଟ୍ରମ୍ପ ଆମେରିକା ବିରୋଧୀ ବୋଲି କହି  ଅଧିକ ଟାରିଫ୍ ଲଗାଇଛନ୍ତି । ଏହା ବିରୋଧରେ ଏକ୍ ହେଉଛନ୍ତି ବ୍ରିକ୍ସ ଦେଶ । ଆମେରିକାର ଟାରିଫ୍ ଓ ଡଲାର ପ୍ରଭାବୀ ନୀତିକୁ ବ୍ରାଜିଲ୍, ରୁଷ୍, ଭାରତ, ଚୀନ ଓ ଦକ୍ଷିଣ ଆଫ୍ରିକା ତୀବ୍ର ବିରୋଧ କରି ନିଜ ନିଜ ଭିତରେ ବାଣିଜ୍ୟ ବୃଦ୍ଧି ପାଇଁ ଉଦ୍ୟମ ଆରମ୍ଭ କରିଛନ୍ତି । ଶୁକ୍ରବାର ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ବ୍ରାଜିଲ ରାଷ୍ଟ୍ରପତି ଲୁଲା ଡା ସିଲଭା ଓ ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ ଫୋନ୍ ଯୋଗେ କଥା ହୋଇଥିଲେ । ଟ୍ରମ୍ପଙ୍କ ନୀତି ବିରୋଧରେ ଏକାଠି ହୋଇ କାମ କରିବାକୁ ସହମତି ହୋଇଛି ।

ପୂର୍ବରୁ ଗତ ଜୁଲାଇ ୭ ତାରିଖରେ ରିଓ-ଡି-ଜେନେରିଓରେ ବ୍ରିକ୍ସ ସମ୍ମିଳନୀ ଅନୁଷ୍ଠିତ ହୋଇଥିଲା । ବ୍ରିକ୍ସ ଦେଶ ସମୂହର ମୁଖ୍ୟମାନେ ଆଲୋଚନାରେ ଭାଗ ନେଇଥିଲେ । ସମ୍ମିଳନୀରେ ଏସବୁ ଦେଶ ମଧ୍ୟରେ ଯେତିକି ସହମତି ପ୍ରକାଶ ପାଇଥିଲା, ଏବେ ଟ୍ରମ୍ପଙ୍କ ଟାରିଫ୍ ସେମାନଙ୍କୁ ଆହୁରି ସଂଗଠିତ କରିଛି । ଯାହା ପୂର୍ବରୁ କେବେ ହୋଇ ନଥିଲା । ଜାତୀୟ ସୁରକ୍ଷା ପରାମର୍ଶଦାତା ଅଜିତ୍ ଡୋଭାଲ ରୁଷ୍ ଯାଇ ପୁଟିନଙ୍କ ସହ ସାକ୍ଷାତ ଆଲୋଚନା କରିବା ଏବଂ ନିକଟରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଚୀନ ଗସ୍ତକୁ ଚୀନ ସ୍ବାଗତ କରିଛି । ଏସବୁ ଘଟଣାରୁ ଏହାର ସ୍ପଷ୍ଟ ସଂକେତ ମିଳୁଛି ।

ପୂର୍ବରୁ ସୀମା ବିବାଦ ନେଇ ଭାରତ ଓ ଚୀନ ସମ୍ପର୍କ ତିକ୍ତ ହୋଇଥିବା ବେଳେ ଏଥିରେ ଏବେ ଦ୍ରୁତ ସୁଧାର ଆସୁଥିବା ପରିଲକ୍ଷିତ ହେଉଛି । ବ୍ରିକ୍ସ ଦେଶମାନେ ଟ୍ରମ୍ପଙ୍କ ଟାରିଫକୁ ବିରୋଧ କରି ନିଜ ନିଜ ଭିତରେ ବାଣିଜ୍ୟ ବୃଦ୍ଧି ପାଇଁ ପଦକ୍ଷେପ ନେଉଛନ୍ତି । ଏଠାରେ ସୂଚନା ଦିଆଯାଇପାରେ ଯେ, ଭାରତ ଓ ବ୍ରାଜିଲ ଉପରେ ୫୦%   ଆମେରିକା ଟାରିଫ୍ ଲଗାଇଛି । ସେହିପରି ଚୀନ ଓ ଦକ୍ଷିଣ ଆପ୍ରିକା ଉପରେ ୩୦ % ଏବଂ ରୁଷର କିଛି ସାମଗ୍ରୀ ଉପରେ ୨୦ % ରିଫ୍ ଲଗାଇଛନ୍ତି ଟ୍ରମ୍ପ । ୟୁକ୍ରେନ ସହିତ ଯୁଦ୍ଧ ବନ୍ଦ ନକଲେ ରୁଷ ଉପରେ ଅଧିକ ଟାରିଫ୍ ଲଗାଇବାକୁ ଆମେରିକା ପକ୍ଷରୁ ଧମକ ଦିଆଯାଇଛି ।