ବିହାର ଉପରେ ଦାଉ ସାଧୁଛି ନେପାଳ; ପାଣି ଛାଡୁଛି ନେପାଳ, କାନ୍ଦୁଛି ବିହାର

କନକ ବ୍ୟୁରୋ : କାଳତାଣ୍ଡବ ଚାଲିଛି ପଡୋଶୀ ରାଜ୍ୟ ନେପାଳରେ । ଏଠାରେ ତାଣ୍ଡବ ରଚିଛି ପ୍ରକୃତି । ନେପାଳରେ ଚାଲିଛି ଜଳ ପ୍ରଳୟ । ଲାଗି ରହିଛି ପ୍ରବଳ ବର୍ଷା । ତୁହାକୁ ତୁହା ବର୍ଷା ଯୋଗୁ ଭୟଙ୍କର ବନ୍ୟା ପରିସ୍ଥିତି ଉପୁଜିଛି । ଏଥିସହ ବିଭିନ୍ନ ସ୍ଥାନରେ ଭୂସ୍ଖଳନ ମଧ୍ୟ ହୋଇଛି । ବନ୍ୟା ଓ ଭୂସ୍ଖଳନ ଯୋଗୁ ବର୍ତ୍ତମାନ ସୁଦ୍ଧା ୧୭୦ରୁ ଅଧିକ ଜଣ ପ୍ରାଣ ହରାଇ ସାରିଲେଣି ।

ସେହିପରି ୪୨ ଜଣ ନିଖୋଜ ଅଛନ୍ତି । ୩୦୦୦ରୁ ଅଧିକ ପୁଲିସ ଫୋର୍ସ ମୁତୟନ କରାଯାଇଛି । ଉଦ୍ଧାର କାର୍ଯ୍ୟ ଜାରି ରହିଛି । ସମସ୍ତ ସୁରକ୍ଷା ଏଜେନ୍ସି ସହାୟତାରେ ସର୍ଚ୍ଚ ଓ ଉଦ୍ଧାର କାର୍ଯ୍ୟ ଚାଲିଛି । ୧୬୨ ଜଣଙ୍କୁ ଏୟାରଲିଫ୍ଟ କରାଯିବା ସହ  ୪୦୦୦ରୁ ଅଧିକ ଲୋକଙ୍କୁ ଉଦ୍ଧାର କରାଯାଇ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି ।

ଲଗାଣ ବର୍ଷା ଜାରି ରହିଥିବାରୁ ୩ ଦିନ ପାଇଁ ସମସ୍ତ ଶିକ୍ଷାନୁଷ୍ଠାନକୁ ଛୁଟି ଘୋଷଣା କରାଯାଇଛି । ବନ୍ୟା ଯୋଗୁ ପାଖାପାଖି ୪୪ଟି ସ୍ଥାନରେ ମୁଖ୍ୟ ରାଜପଥ ଅବରୋଧ ହୋଇଛି । ସେହିପରି ବନ୍ୟା ଯୋଗୁ ଶନିବାର କାଠମାଣ୍ଡୁରେ ବିଦ୍ୟୁତ ଯୋଗାର ପ୍ରଭାବିତ ହୋଇଛି । ବନ୍ୟାରେ ଅତିକମ୍‌ରେ ନେପାଳରେ ୩୨୨ଟି ଘର ଓ ୧୬ଟି ପୋଲ କ୍ଷତିଗ୍ରସ୍ତ ହୋଇଛି ।

ବିହାରରେ ପ୍ରବଳ ବର୍ଷ ହୋଇ ବନ୍ୟା ସୃଷ୍ଟି ହୋଇଛି । ଭୟଙ୍କର ବନ୍ୟା ସଙ୍କଟ ମଧ୍ୟରେ ରାଜ୍ୟର ବିଭିନ୍ନ ସ୍ଥାନ ଜଳମଗ୍ନ ହୋଇଛି । ହଜାର ହଜାର ଲୋକଙ୍କୁ ସ୍ଥାନାନ୍ତର କରାଯିବା ସହ ସମସ୍ତ ସୁରକ୍ଷା ବ୍ୟବସ୍ଥା ଅବଲମ୍ବନ କରୁଛନ୍ତି ରାଜ୍ୟ ସରକାର । ଏପଟେ ଭିତ୍ତିଭୂମି ଏବଂ ଚାଷ ଜମିରେ ବ୍ୟାପକ କ୍ଷତି ଘଟାଇଛି ଏହି ବନ୍ୟା । ୬ଟି ବ୍ୟାରେଜ ଭାଙ୍ଗି ବନ୍ୟା ପରିସ୍ଥିତିକୁ ଆହୁରି ବଢ଼ାଇ ଦେଇଛି । ରାଜ୍ୟରେ ପ୍ରବଳ ବର୍ଷା ଓ ବନ୍ୟା ପରିସ୍ଥିତି ସତର୍କ ସୂଚନା ଜାରି କରାଯାଇଛି । ସମ୍ପ୍ରତି ୧୨ଟି ଏନ୍‌ଡିଆର୍‌ଏଫ୍‌ ଦଳ ଏବଂ ୨୨ଟି ରାଜ୍ୟ ବିପର୍ଯ୍ୟୟ ମୁକାବିଲା ଫୋର୍ସ ସମଗ୍ର ବିହାରରେ ବନ୍ୟା ପରିସ୍ଥିତି ଏବଂ ଉଦ୍ଧାର କାର୍ଯ୍ୟରେ ସକ୍ରିୟ ଅଛନ୍ତି ।

ବିହାରରେ ଯେଉଁ ବନ୍ୟା ପରିସ୍ଥିତି ସୃଷ୍ଟି ହୋଇଛି ଏହାର ସବୁଠୁ ବଡ କାରଣ ନେପାଳ । ଲଗାଣବର୍ଷା ପରେ ନେପାଳ ଅଧିକାଂଶ ନଦୀ ବିପଦ ସଂକେତ ଉପରେ ଦେଇ ପ୍ରବାହିତ ହେଉଛି । ଏହି ସମୟରେ ବିଭିନ୍ନ ବନ୍ଧ ଭାଙ୍ଗିବା ପରେ ନେପାଳ ଡ୍ୟାମ ପାଣି ଛାଡିବା ଏବେ ବିହାର ପାଇଁ କାଳ ସାଜିଛି ।