ଅପରେସନ୍‌ ‘ସିନ୍ଦୂର’କୁ ନେଇ ବାୟୁସେନାର ବଡ଼ ସୂଚନା, ମାଟିରେ ମିଶିଛି ପାକିସ୍ତାନର ୫ ଲଢ଼ୁଆ ବିମାନ

କନକ ବ୍ୟୁରୋ: ପାକିସ୍ତାନ ଭିତରେ ପଶି ପହଲଗାମ ପ୍ରତିଶୋଧ ନେଇଥିଲା ଭାରତୀୟ ସେନା । ଆକ୍ରମଣ ପରେ ଆକ୍ରମଣ କରି ଆତଙ୍କୀସ୍ଥାନର ଆତଙ୍କୀ ଆଡ୍ଡାକୁ ଛାରଖାର ଘଟଣାକୁ ଦେଖିଥିଲା ପୂରା ବିଶ୍ବ । ଏବେ ଅପରେସନ୍‌ ସିନ୍ଦୂର ନେଇ ବଡ଼ ଖୁଲାସା କରିଛି ଭାରତୀୟ ବାୟୁସେନା । ପାକିସ୍ତାନକୁ ହୋଇଥିବା କ୍ଷୟକ୍ଷତି ବିଷୟରେ ଭାରତୀୟ ବାୟୁସେନା ମୁଖ୍ୟ ଏୟାର ଚିଫ ମାର୍ଶାଲ ଏପି ସିଂହ ଏକ ବଡ଼ ଖୁଲାସା କରିଛନ୍ତି ।

ବେଙ୍ଗାଲୁରୁରେ ଆୟୋଜିତ କାର୍ଯ୍ୟକ୍ରମରେ ଯୋଗ ଦେଇ ଏୟାରଚିଫ୍‌ ମାର୍ଶଲ କହିଛନ୍ତି ଯେ ଅପରେସନ୍‌ ସିନ୍ଦୂରରେ ପାକିସ୍ତାନର ୫ଟି ଯୁଦ୍ଧ ବିମାନ ମାଟିରେ ମିଶିଛି । ଭାରତୀୟ ବାୟୁସେନାର ଏୟାର ଡିଫେନ୍ସ ସର୍ଫେସ-ଟୁ-ଏୟାର ମିସାଇଲ ସିଷ୍ଟମ୍‌ କମାଲ କରିଥିଲା । ପାକିସ୍ତାନର ୫ଟି ଫାଇଟର୍‌ ଜେଟ୍‌ ଏବଂ ଗୋଟିଏ ଏଡବ୍ଲ୍ୟୁଏସିଏସ୍‌ ବିମାନକୁ ଖସାଇଥିଲା । ଏହା ପଛରେ ବଡ଼ ଭୂମିକା ତୁଲାଇଥିଲା ଏସ୍‌-୪୦୦ ଏୟାର ଡିଫେନ୍ସ ସିଷ୍ଟମ୍‌ ।

ଆତଙ୍କୀ ସଂଗଠନ ଲସ୍କର ଏ ତୋଇବାର ମୁରଦିକ୍ ମୁଖ୍ୟାଳୟ ଉପରେ ହୋଇଥିବା ଆକ୍ରମଣର ଭିଡିଓ ଦେଖାଇ ଆକ୍ରମଣ ପୂର୍ବରୁ ଓ ପରେ ଚିତ୍ର କେମିତି ଥିଲା ସେକଥା ମଧ କହିଛନ୍ତି ବାୟୁସେନା ମୁଖ୍ୟ । ସେ ଭିଡିଓ ଦେଖାଇ ମୁରଦିକ୍ ମୁଖ୍ୟାଳୟର କେଉଁ ବିଲ୍ଡିଂରେ ଲସ୍କର ଛାମୁଆ ନେତା ରହୁଥିଲେ? କେଉଁଠାରେ ଗୁପ୍ତ ବୈଠକ କରୁଥିଲେ? ତାହାର ସୂଚନା ମଧ୍ୟ ଦେଇଛନ୍ତି ଏୟାର ମାର୍ଶଲ ଅମରପ୍ରୀତ ସିଂ ।

ଏଥିସହ ଅପରେସନ୍ ସିନ୍ଦୂରକୁ ଅନେକ ଗୁରୁତ୍ବପୂର୍ଣ୍ଣ କଥା ମଧ୍ୟ ପ୍ରକାଶ କରି ବାୟୁସେନା ମୁଖ୍ୟ  କହିଛନ୍ତି…ଶତ୍ରକୁ କଡ଼ା ଜବାବ ଦେବାକୁ ସେନା ପାଖରେ ପୂର୍ଣ୍ଣ ଅନୁମତି ଏବଂ ସ୍ବାଧୀନତା ଥିଲା  । ୨୨ ଏପ୍ରିଲରେ ପହଲଗାମ୍ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ସୃଷ୍ଟି ହୋଇଥିଲା । ଏହା ପରେ, ପାକିସ୍ତାନକୁ ପାନେ ଦେବାକୁ ଦେବା ପାଇଁ ଭାରତ ଅପରେସନ୍ ସିନ୍ଦୂର ଆରମ୍ଭ କରାଯାଇଥିଲା ।