ଇସ୍ରାଏଲକୁ ବଳ ଯୋଗାଉଛି ଆମେରିକା; ସେପଟେ ଏକୁଟିଆ ହୋଇଗଲାଣି ଇରାନ୍

କନକ ବ୍ୟୁରୋ: ଇସ୍ରାଏଲ୍ ଇରାନ୍ ଯୁଦ୍ଧ ସପ୍ତମ ଦିନରେ ପହଞ୍ଚିଥିଲା ବେଳେ ଉଭୟ ପକ୍ଷ ପରସ୍ପର ଉପରେ ପ୍ରଚଣ୍ଡ ଆକ୍ରମଣ କରୁଛନ୍ତି । ହେଲେ ଏବେ ଇରାନ୍ କେବଳ ଇସ୍ରାଏଲ୍ ସହ ଯୁଦ୍ଧ କରୁନାହିଁ ବରଂ ଅନ୍ୟ ଏକ ଦିଗରେ ମଧ୍ୟ ସଂଘର୍ଷ କରୁଛି । ଯୁଦ୍ଧଭଳି ଘଡ଼ିସନ୍ଧି ସମୟରେ ଇରାନର ହାତ ଛାଡ଼ି ଦେଇଛନ୍ତି ସହଯୋଗୀ । ଇସ୍ରାଏଲ୍ ଓ ଇରାନ୍ ପରମ ଶତ୍ରୁ ରାଷ୍ଟ୍ର । ଇସ୍ରାଏଲ୍ ବିରୋଧରେ ଲଗାତର ଭାବେ ଇରାନ୍ ଛାୟା ଯୁଦ୍ଧ ଚଳାଇ ଆସୁଥିଲା । ଏଥିପାଇଁ ପଡ଼ୋଶୀ ଦେଶମାନଙ୍କରେ ବିଭିନ୍ନ ସାମରିକ ସଂଗଠନକୁ ଅସ୍ତ୍ରଶସ୍ତ୍ର ଓ ତାଲିମ ଯୋଗାଇ ଆସୁଥିଲା ଇରାନ୍ । ଲେବାନନର ହିଜବୁଲ୍ଲା, ପାଲେଷ୍ଟାଇନର ହମାସ୍, ୟେମେନର ହୁତି ପରି ସଂଗଠନକୁ ବର୍ଷ ବର୍ଷ ଧରି ସବୁ ପ୍ରକାର ପ୍ରୋତ୍ସାହନ ଯୋଗାଇଆସୁଥିଲା ଇରାନ୍ । ଏହି ସଂଗଠନ ଇସ୍ରାଏଲ ବିରୋଧରେ କାର୍ଯ୍ୟକଳାପ ଜାରି ରଖିଥିଲେ । ଏପରିକି ହମାସ୍ ବିରୋଧରେ ଇସ୍ରାଏଲ୍ ଯୁଦ୍ଧ ଆରମ୍ଭ କରିବା ପରେ ହିଜବୁଲ୍ଲା ଓ ହୁତି ସକ୍ରିୟ ହୋଇ ଉଠିଥିଲେ । ଇସ୍ରାଏଲ୍ ଉପରେ ଆକ୍ରମଣ କରିଥିଲେ । ହେଲେ ଇସ୍ରାଏଲ୍ ଏହାର ପାଲଟା ଜବାବ ଦେଇ ପ୍ରଚଣ୍ଡ ଆକ୍ରମଣ କରିଥିଲା । ଏପରିକି ହିଜବୁଲ୍ଲାର ସର୍ବୋଚ୍ଚ ନେତା ଇସ୍ରାଏଲ୍ ଆକ୍ରମଣରେ ନିହତ ହୋଇଥିଲେ । ହେଲେ ଏବେ ଯେତେବେଳେ ଇରାନ୍ ଓ ଇସ୍ରାଏଲ୍ ଯୁଦ୍ଧ ଲଢୁଛନ୍ତି, ସେତେବେଳେ ଏହି ସହଯୋଗୀ ମାନେ ଏକଦମ୍ ନିରବ ରହିଥିବା ଦେଖିବାକୁ ମିଳୁଛି । 

ଏହି ସବୁ ସାମରିକ ସଂଗଠନ ଆକ୍ରମଣ କରୁନଥିବାରୁ ଇସ୍ରାଏଲ ନିଜର ଶକ୍ତିକୁ ଇରାନ୍ ଉପରେ ପୂରା କେନ୍ଦ୍ରୀଭୂତ କରିଛି, ଆଉ ଗୋଟିଏ ପରେ ଗୋଟିଏ ପ୍ରଚଣ୍ଡ ଆକ୍ରମଣ କରୁଛି । 

ଇରାନର ସହଯୋଗୀ ରାଷ୍ଟ୍ର ଭିତରେ ଚୀନ୍, ରୁଷ୍ ଓ ଉତ୍ତର କୋରିଆ ରହିଛନ୍ତି । ଇସ୍ରାଏଲର ଆକ୍ରମଣକୁ ରୁଷ୍ ରାଷ୍ଟ୍ରପତି ପୁଟିନ୍ ସମାଲୋଚନା କରିସାରିଛନ୍ତି । ଇରାନ୍ ଠାରୁ ସବୁଠୁ ଅଧିକ ତେଲ କିଣିଥାଏ ଚୀନ୍ । ଏହାସହ ଚୀନ୍ ନେତୃତ୍ବାଧୀନ ସାଂଘାଇ ସହଯୋଗ ସଂସ୍ଥାରେ ଇରାନ୍ ମଧ୍ୟ ସାମିଲ ଅଛି । ଇରାନରେ ପରମାଣୁ କ୍ଷେତ୍ର ପ୍ରସ୍ତୁତିରେ ଚୀନ୍ ସହଯୋଗ କରିଥିଲା । ହେଲେ ଏହି ଯୁଦ୍ଧ ଭିତରେ ଇରାନ୍ ସପକ୍ଷରେ ଖୋଲାଖୋଲି କୌଣସି ମନ୍ତବ୍ୟ ଦେଇ ନାହିଁ ଚୀନ୍ । ଇରାନର କ୍ଷେପଣାସ୍ତ୍ର ଓ ପରମାଣୁ କାର୍ଯ୍ୟକ୍ରମକୁ ଗୁପ୍ତରେ ଉତ୍ତର କୋରିଆ ସହାୟତା କରିଆସୁଥିବା ଅଭିଯୋଗ ହୋଇଆସିଛି । ହେଲେ ଉତ୍ତର କୋରିଆ ଶାସକ ଏଯାଏଁ କୌଣସି ବିବୃତି ଜାରି କରିନାହାନ୍ତି । ଭାରତ ଉଭୟ ଇସ୍ରାଏଲ୍ ଓ ଇରାନ୍ ସହ ଭଲ ସମ୍ପର୍କ ରଖିଆସିଛି । ତେଣୁ ଏହି ଯୁଦ୍ଧରେ ଭାରତ ମଧ୍ୟ ନିରବତା ଅବଲମ୍ବନ କରିଆସୁଛି ।