କନକ ବ୍ୟୁରୋ : ମୃତ ଲୋକକୁ ଦିଆଗଲା ଅକ୍ସିଜେନ ଚିକିତ୍ସା । ଚିକିତ୍ସାରେ ଅବହେଳାରୁ ମହିଳାଙ୍କ ମୃତ୍ୟୁ ପରେ ଦୋଷ ଲୁଚାଇବାକୁ ଯାଇ ହସ୍ପିଟାଲ୍ କର୍ତ୍ତୃପକ୍ଷ ଅକ୍ସିଜେନ ଲଗାଇଥିବା ଅଭିଯୋଗ କରିଛନ୍ତି ମୃତକଙ୍କ ପରିବାର ଲୋକେ । ଝାରସୁଗୁଡା ଜିଲ୍ଲାରୁ ଏଭଳି ଅଭିଯୋଗ ଆସିଛି । ମୃତକ ହେଉଛନ୍ତି ବ୍ରଜରାଜନଗରର ଆରତୀ ଘୋଷ । ଏହି ଘଟଣାକୁ ନେଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚାପା ଉତେଜନା ଦେଖାଦେଇଛି ।

Advertisment

ଘଟଣା ସମ୍ପର୍କରେ କାର୍ଯ୍ୟରତ ନର୍ସଙ୍କୁ ପଚାରିବାରୁ ରୋଗୀଙ୍କ ଅବସ୍ଥା ସଙ୍କଟାପନ୍ନ ରହିଥିବାରୁ ତାଙ୍କୁ ବୁର୍ଲା ରେଫର କରାଯାଇଥିଲା, କିନ୍ତୁ ଅକ୍ସିଜେନ ଓ ସାଲାଇନ ସମ୍ପର୍କରେ ସେ ଜାଣିନଥିବା କହିଛନ୍ତି । ଘଟଣା ସମ୍ପର୍କରେ ହସ୍ପିଟାଲ ମ୍ୟାନେଜରଙ୍କୁ ପଚାରିବାରୁ ଘଟଣା କଣ ହୋଇଛି ବୁଝିବେ ବୋଲି କହିଥିଲେ । ଆରତୀଙ୍କ ଝିଅ ସୁସ୍ମିତା କହିଛନ୍ତି, ଗତ ଶୁକ୍ରବାର ତାଙ୍କ ମା’ ଉଚ୍ଚ ରକ୍ତ ଚାପ ଓ ଡାଇବେଟିସ ଜନିତ ସମସ୍ୟା ଦେଖାଦେବାରୁ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ଗତକାଲି ସକାଳେ ଆରତୀଙ୍କ ରକ୍ତ ପରୀକ୍ଷା କରାଯାଇଥିଲା । କିନ୍ତୁ ରିପୋର୍ଟ ସଂପର୍କରେ ପରିବାର ଲୋକଙ୍କୁ ଅବଗତ କରାଯାଇନଥିଲା ।

ଦିନ ପ୍ରାୟ ଅଢେଇଟା ସମୟରେ ନର୍ସ ଆସି ତାଙ୍କୁ ଇଞ୍ଜେକ୍ସନ ଦେଇଥିଲେ । ଏହା ପରଠାରୁ ତାଙ୍କ ଅବସ୍ଥା ବିଗିଡ଼ିଥିବା ମୃତକଙ୍କ ଝିଅ ସୁସ୍ମିତା ଅଭିଯୋଗ କରିଛନ୍ତି । ସନ୍ଧ୍ୟା ୭ଟାରେ ସାଲାଇନ ଦିଆଯିବା କଥା । ସାଲାଇନ ଆଣି ବେଡ଼ ପାଖରେ ବି ରଖାଯାଇଥିଲା । କିନ୍ତୁ ସାଲାଇନ ଲଗାଯାଇନଥିଲା । ପରିବାର ଲୋକେ ଅଭିଯୋଗ କରିବା ପରେ ରାତି ୧୦ଟା ବେଳେ ଆରତୀଙ୍କୁ ସାଲାଇନ ଲଗାଯାଇଥିଲା ।

କିଛି ସମୟ ପରେ ଡାକ୍ତର ଆସି ତାଙ୍କୁ ମୃତ ଘୋଷଣା କରିଥିଲେ । କିନ୍ତୁ ଡାକ୍ତର ତାଙ୍କ ଡେଥ ରିପୋର୍ଟରେ ମୃତ୍ୟୁ ସମୟ ବି ରାତି ୧୦ଟା ଉଲ୍ଲେଖ କରିଛନ୍ତି । ଏହାବାଦ ରାତି ପ୍ରାୟ ସାଢେ ୧୧ଟା ଯାଏ ଆରତୀଙ୍କୁ ବେଡ଼ରେ ଅକ୍ସିଜେନ ମାସ୍କ ଲଗାଇ ଡାକ୍ତର ଅକ୍ସିଜେନ ଦେଉଥିବାର ଦୃଶ୍ୟ ବି ଦେଖିବାକୁ ମିଳିଛି । ହସ୍ପିଟାଲରେ ମୃତ ବ୍ୟକ୍ତିଙ୍କ ଚିକିତ୍ସାକୁ ନେଇ ପ୍ରଶ୍ନ ଉଠାଇଛନ୍ତି ମୃତକଙ୍କ ଝିଅ ସୁସ୍ମିତା । ଡାକ୍ତରଖାନା କର୍ତୃପକ୍ଷ ଦୋଷ ଲୁଚାଇବାକୁ ଯାଇ ଏଭଳି ନାଟକ କରୁଥିବା ସେ ଅଭିଯୋଗ କରିଛନ୍ତି ।