ଥମୁନି ମଣିପୁର ହିଂସା । ସ୍କୁଲ ବାହାରେ ମହିଳାଙ୍କୁ ଗୁଳି କରି ହତ୍ୟା କଲେ ଦୁର୍ବୃତ୍ତ

ସମଗ୍ର ମଣିପୁରରେ ସ୍କୁଲ୍‌ ଖୋଲିବାର ଦିନକ ପରେ ଆଜି ଇମ୍ଫାଲର ପଶ୍ଚିମ ପ୍ରାନ୍ତରେ ଥିବା ଏକ ସ୍କୁଲ୍‌ ବାହାରେ ଅଜ୍ଞାତ ଦୁର୍ବୃତ୍ତମାନେ ଜଣେ ମହିଳାଙ୍କୁ ଗୁଳି ମାରି ହତ୍ୟା କରିଥିବା କଥା ପୁଲିସ ସୂତ୍ରରୁ ପ୍ରକାଶ ପାଇଛି। ନିହତ ମହିଳାଙ୍କ ପରିଚୟ ଓ ସମ୍ପ୍ରଦାୟ ବିଷୟରେ ଏପର୍ଯ୍ୟନ୍ତ କିଛି ଜଣାପଡ଼ି ନଥିବା କଥା ପୁଲିସ କହିଛି।

ପ୍ରାପ୍ତ ସୂଚନା ଅନୁସାରେ, ହତ୍ୟାକାଣ୍ଡ ଶିଶୁ ନିଷ୍ଠା ନିକେତନ ସ୍କୁଲ୍‌ ବାହାରେ ଘଟିଥିବା ଏହି ଘଟଣା ସମ୍ପୃକ୍ତ ଅଞ୍ଚଳରେ ଆତଙ୍କର କାରଣ ହୋଇଛି। ଦୀର୍ଘ ଦୁଇ ମାସ ହେବ ଆଦିମ ପ୍ରଜାତିଙ୍କ ମଧ୍ୟରେ ସଂଘର୍ଷ ଚାଲିଥିବା ବେଳେ ଆଜିର ଏହି ଗୁଳିକାଣ୍ଡ ଘଟିଛି। ଏହାଛଡ଼ା, ଆଜି ସକାଳେ କାଙ୍‌ପୋକ୍‌ପି ଜିଲ୍ଲା ଅନ୍ତର୍ଗତ ମାପାଓ ଏବଂ ଅୱାଙ୍ଗ୍‌ ସେକମାଇ ଅଞ୍ଚଳର ଦୁଇ ସଶସ୍ତ୍ର ଗୋଷ୍ଠୀଙ୍କ ମୁକାବିଲାକୁ ନିରାପତ୍ତା ବଳ ଭଣ୍ଡୁର କରିଥିଲା।

ସେହିପରି, ଥୌବାଲ୍‌ ଜିଲ୍ଲାରେ ଆଉ ଏକ ହିଂସାକାଣ୍ଡରେ ଦଙ୍ଗାକାରୀମାନେ ‘ଇଣ୍ଡିଆନ୍‌ ରିଜର୍ଭ ବାଟାଲିୟନ୍‌’ର (ଆଇଆରବି) ଜଣେ ଯବାନଙ୍କ ଘର ପୋଡ଼ି ଦେଇଛନ୍ତି। ସେ ପୋଲିସ ଅସ୍ତ୍ରାଗାରରୁ ଦଙ୍ଗାକାରୀମାନଙ୍କର ଅସ୍ତ୍ରଶସ୍ତ୍ର ଲୁଟ୍‌ ଉଦ୍ୟମ ପଣ୍ଡ କରି ଦେଇଥିଲେ ବୋଲି ବୁଧବାର ଦିନ ସରକାରୀ ଅଧିକାରୀମାନେ କହିଛନ୍ତି।