ଶାଶୁ ଦେଲେ ଭୋଟ୍ ନାଁ ପଡିଛି ବୋହୂଙ୍କର । ଭୋଟ ଦେବାରୁ ବଞ୍ଚିତ ହେଲେ ମହିଳା ।

କନକ ବ୍ୟୁରୋ: ରାଜଧାନୀରେ ଭୋଟ ଦେବାକୁ ଆସି ହଟହଟା ହେଲେ ମହିଳା ଭୋଟର । ଝାରପଡ଼ା ସରକାରୀ ପ୍ରାଥମିକ ବିଦ୍ୟାଳୟରେ ହୋଇଥିବା ମତଦାନ କେନ୍ଦ୍ରରେ ଶୁଭାସିନୀ ଦାସଙ୍କୁ ଭୋଟ ଦେବାକୁ ମନା କଲେ ପୋଲିଂ ଅଧିକାରୀ । ପୂର୍ବରୁ ସେ ପୋଷ୍ଟାଲ ବାଲାଟରେ ଭୋଟ ଦେଇଥିବା କହିଛନ୍ତି ପୋଲିଂ ଅଧିକାରୀ । ତେବେ ଏହାକୁ ଖଣ୍ଡନ କରିଛନ୍ତି ଶୁଭାସିନୀ । ହୋମ ଭୋଟିଂ ଜରିଆରେ ଶୁଭାସିନୀଙ୍କ ଶାଶୂ ପୋଷ୍ଟାଲ ବାଲାଟରେ ମତଦାନ କରିଛନ୍ତି । କିନ୍ତୁ ତାଙ୍କ ନାଁ କିଭଳି ଉଠିଲା ଏବଂ ତାଙ୍କ ବଦଳରେ କିଏ ଭୋଟ ଦେଇଛି ବୋଲି ପ୍ରଶ୍ନ କରିଛନ୍ତି ଶୁଭାସିନୀ । ଅବ୍ୟବସ୍ଥା କାରଣରୁ ଏଭଳି ଘଟିଥିବା ସେ ଅଭିଯୋଗ କରିଛନ୍ତି ।

ମହିଳା ଭୋଟର ଭୋଟ ଦେଇ ନପାରିବା ଘଟଣାକୁ ନିନ୍ଦା କରିଛନ୍ତି ବିଜେପି ବିଧାୟକ ପ୍ରାର୍ଥୀ ଜଗନ୍ନାଥ ପ୍ରଧାନ । ସହରର ବିଭିନ୍ନ ବୁଥରେ ଏଭଳି ସମସ୍ୟା ହୋଇଥିବା ସେ ଅଭିଯୋଗ ଆଣିଛନ୍ତି । ଭୋଟ ଦେବାରୁ ବଞ୍ଚିତ ଥିବା ମତଦାତା ମାନଙ୍କୁ ମତ ସାବ୍ୟସ୍ତ ପାଇଁ ଆଉ ଏକ ସୁଯୋଗ ଦେବାକୁ ସେ ଦାବି କରିଛନ୍ତି । ଏନେଇ ଇସିଆଇ ଓ ସିଇଓ ତଦନ୍ତ କରିବାକୁ ଦାବି କରିଛନ୍ତି ଜଗନ୍ନାଥ ପ୍ରଧାନ ।