କନକ ବ୍ୟୁରୋ: ପଦ୍ମପୁରରେ ବାଜିଗର ହୋଇଛି ବିଜେଡି । ଉପ ନିର୍ବାଚନରେ ପୁଣି ଶୁଭିଛି ଶଙ୍ଖଧ୍ୱନି । ବିଜେପି ପ୍ରାର୍ଥୀ ପ୍ରଦୀପ ପୁରୋହିତଙ୍କୁ ପରାଜିତ କରି ପଦ୍ମପୁର ଦଖଲ କରିଛନ୍ତି ବିଜେଡି ପ୍ରାର୍ଥିନୀ ବର୍ଷା ସିଂ ବରିହା । ୨୩ ରାଉଣ୍ଡ ଗଣତି ପରେ ବିଜେଡି ୪୨ ହଜାର ୦୬୫ ଖଣ୍ଡ ଭୋଟ୍ ବ୍ୟବଧାନରେ ପଦ୍ମପୁର ହାତେଇଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ପଦ୍ମପୁର ଭୋଟ୍ ଗଣିତକୁ ଦେଖିଲେ ଜଣାପଡୁଛି ଯେ, ନିଜ ରେସରେ ହିଁ ନିଜେ ପଛରେ ପଡିଛନ୍ତି ପ୍ରଦୀପ ପୁରୋହିତ । ଅର୍ଥାତ ୨୦୧୯ ସାଧାରଣ ନିର୍ବାଚନରେ ବିଜେପି ପ୍ରାର୍ଥୀଙ୍କୁ ଯେତିକି ଭୋଟ୍ ମିଳିଥିଲା, ୨୦୨୨ ଉପ ନିର୍ବାଚନରେ ତା ଠାରୁ କମ୍ ଭୋଟ୍ ମିଳିଛି । ୨୦୧୯ ସାଧାରଣ ନିର୍ବାଚନରେ ମଧ୍ୟ ବିଜେପି ପ୍ରଦୀପ ପୁରୋହିତଙ୍କୁ ପ୍ରାର୍ଥୀ କରିଥିଲା । ସେତେବେଳେ ବିଜେଡି ଦଳର ପ୍ରାର୍ଥୀ ଥିଲେ ଦିବଙ୍ଗିତ ବିଧାୟକ ବିଜୟ ରଞ୍ଜନ ସିଂ ବରିହା । ଗତ ନିର୍ବାଚନରେ ବିଜେପି ପ୍ରାର୍ଥୀଙ୍କୁ ମୋଟ ୭୭ ହଜାର ୫୬୫ ଖଣ୍ଡ ଭୋଟ୍ ମିଳିଥିଲା । ଆଉ ୨୦୨୨ ଉପ ନିର୍ବାଚନରେ ବିଜେପି ପ୍ରାର୍ଥୀଙ୍କୁ ମିଳିଛି ୭୭ ହଜାର ୪୪୭ ଭୋଟ୍ । ଅର୍ଥାତ ଗତ ନିର୍ବାଚନ ଅପେକ୍ଷା ଏଥର ନିର୍ବାଚନରେ ଭୋଟ୍ ହାର ବଢିଥିଲେ ବି ବିଜେପି ସପକ୍ଷରେ ଭୋଟରଙ୍କ ମତଦାନ ଅଧିକ ହେଇନି ବଂର କମ ହେଇଛି ।
୨୦୧୯ ସାଧାରଣ ନିର୍ବାଚନ
- ବିଜେଡି – ୮୩,୨୯୯ ଖଣ୍ଡ ଭୋଟ୍
- ବିଜେପି- ୭୭,୫୬୫ ଖଣ୍ଡ ଭୋଟ୍
- କଂଗ୍ରେସ -୩୨,୭୮୭ ଖଣ୍ଡ ଭୋଟ୍
୨୦୨୨ ଉପ ନିର୍ବାଚନ
- ବିଜେଡି – ୧,୧୯,୫୧୨ ଖଣ୍ଡ ଭୋଟ୍
- ବିଜେପି – ୭୭,୪୪୭ ଖଣ୍ଡ ଭୋଟ୍
- କଂଗ୍ରେସ – ୩୫୪୮ ଖଣ୍ଡ ଭୋଟ୍
୨୦୧୯ରୁ ୨୦୨୨ ଭିତରେ ବିଜେପି ପ୍ରାର୍ଥୀଙ୍କ ଭୋଟ୍ କମିଛି ୧୧୮ ଖଣ୍ଡ । ଅନ୍ୟପଟେ ଗତଥର ନିର୍ବାଚନରେ ବିଜେଡିକୁ ୮୩ ହଜାର ୨୯୯ ଖଣ୍ଡ ଭୋଟ୍ ମିଳିଥିବାବେଳେ, ଏଥର ମିଳିଛି ୧ ଲକ୍ଷ ୧୯ ହଜାର ୫୧୨ ଖଣ୍ଡ ଭୋଟ୍ । ସେହିପରି କଂଗ୍ରେସର ଭୋଟ୍ ସଂଖ୍ୟା ମଧ୍ୟ ଢେର ଗୁଣା କମିଛି । ୨୦୧୯ ସାଧାରଣ ନିର୍ବାଚନରେ କଂଗ୍ରେସ ପ୍ରାର୍ଥୀ ସତ୍ୟଭୂଷଣ ସାହୁଙ୍କୁ ୩୨ ହଜାର ୭୮୭ ଖଣ୍ଡ ଭୋଟ୍ ମିଳିଥିବାବେଳେ, ଏଥର ନିର୍ବାଚନରେ କିନ୍ତୁ ମିଳିଛି ମାତ୍ର ୩୫୪୮ ଖଣ୍ଡ ଭୋଟ୍ । ତେଣୁ ଭୋଟ୍ ଗଣିତର ଏହି ଧାରାକୁ ଦେଖିଲେ ଲାଗୁଛି ଯେ, କଂଗ୍ରେସର ଅଧିକାଂଶ ଭୋଟ୍ ବିଜେଡି ଖାତାକୁ ଯାଇଛି ।