କନକ ବ୍ୟୁରୋ : ଆଇପିଏଲରେ ସାମିଲ ହେବ ଆଉ ୨ଟି ଦଳ । ଆଉ ଏହି ୨ଟି ଦଳକୁ ସାମିଲ କରିବା ଦ୍ୱାରା ବିସିସିଆଇକୁ ପାଖାପାଖି ୫୦୦୦ କୋଟି ଟଙ୍କା ମିଳିବ । ଆସନ୍ତା ୨୦୨୨ରେ ୮ଟି ବଦଳରେ ୧୦ଟି ଟିମ୍ ଆଇପିଏଲ ଖେଳିପାରନ୍ତି । ତେବେ ଅଧିକ ସଂଖ୍ୟକ ଟିମକୁ ସାମିଲ କରି ବିସିସିଆଇ ଆଇପିଏଲକୁ ଆହୁରି ରୋମାଞ୍ଚକର କରିବାକୁ ଚାହୁଁଛି । ଆଉ ଏଥିପାଇଁ ସମସ୍ତ ପ୍ରକାର ପ୍ରସ୍ତୁତ ହୋଇଛି । ଆଇପିଏଲର ଗଭର୍ଣ୍ଣିଂ କାଉନସିଲ ବୈଠକରେ ଏହା ଉପରେ ମୋହର ବାଜିଛି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ, ୭୫ କୋଟି ଟଙ୍କା ଦେଇ ଆଇପିଏଲ ଟିମ୍ କିଣିବାକୁ ବିଡ୍ ଦାଖଲ କରିପାରିବେ କମ୍ପାନି । ପୂର୍ବରୁ ନୂଆ ଟିମର ବେସ୍ ପ୍ରାଇସ ୧୭୦୦ କୋଟି ରଖାଯାଇଥିବା ବେଳେ ଏବେ ଏହାକୁ ୨୦୦୦ କୋଟିକୁ ବୃଦ୍ଧି କରିବାକୁ ନିଷ୍ପତ୍ତି ନିଆଯାଇଛି । ଆଇପିଏଲରେ ସାମିଲ ହେବାକୁ ଅନେକ କମ୍ପାନି ବିଡ ଦାଖଲ କରିବାକୁ ଉତ୍ସାହିତ ଅଛନ୍ତି । ତେଣୁ ୨ଟି ନୂଆ ଟିମକୁ ସାମିଲ କରି ବିସିସିଆଇ ପାଖାପାଖି ୫୦୦୦ କୋଟି ଟଙ୍କା ରୋଜଗାର କରିବାକୁ ଲକ୍ଷ୍ୟ ରଖିଛି ।
ଆଇପିଏଲରେ ୨ଟି ନୂଆ ଟିମ୍ ସାମିଲ ହେଲେ ମ୍ୟାଚ୍ ସଂଖ୍ୟା ମଧ୍ୟ ବଢିବ । ମିଳିଥିବା ସୂଚନା ମୁତାବକ ୧୦ଟି ଟିମକୁ ନେଇ ଆଇପିଏଲ ଖେଳାଗଲେ ମ୍ୟାଚ୍ ସଂଖ୍ୟା ୭୪କୁ ବୃଦ୍ଧି କରାଯିବ । ତେବେ ବର୍ଷକୁ ୩୦୦୦ କୋଟିର ଟର୍ଣ୍ଣଓଭର ଥିବା କମ୍ପାନି ହିଁ କେବଳ ଟେଣ୍ଡର ପ୍ରକ୍ରିୟାରେ ସାମିଲ ହୋଇପାରିବେ । ଏହାବାଦ୍ ମିଳିତ ଭାବେ କମ୍ପାନି ଗୁଡିକ ଏକାଠି ହୋଇ ଦଳ କିଣିବା ପ୍ରକ୍ରିୟାରେ ସାମିଲ କରିବାକୁ ବିସିସିଆଇ ଯୋଜନା ପ୍ରସ୍ତୁତ କରୁଛି । ଯାହାଦ୍ୱାରା ଟେଣ୍ଡର ପ୍ରକ୍ରିୟାରେ ଅଧିକରୁ ଅଧିକ କମ୍ପାନି ସାମିଲ ହେବାକୁ ଆଗେଇ ଆସିବେ ଓ ଏହା ଅଧିକ ରୋଚକ ହେବ । ତେବେ ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ, ୩ରୁ ଅଧିକ କମ୍ପାନି ସମୂହକୁ ଏହି ପ୍ରକ୍ରିୟାରେ ସାମିଲ କରାଯାଇନପାରେ କିନ୍ତୁ ୩ଟି ଦଳ ଯଦି ଏକାଠି ହୋଇ ଦଳ କିଣିବାକୁ ଆଗେଇ ଆସନ୍ତି ତେବେ ଏଥିପାଇଁ ବିସିସିଆଇ ସୁଯୋଗ ଦେଇପାରେ ।
ସେହିଭଳି ଅହମ୍ମଦାବାଦ, ଲକ୍ଷ୍ନୌ ଓ ପୁଣେକୁ ନୂଆ ଭେନ୍ୟୁ ଭାବେ ସାମିଲ କରାଯାଇପାରେ । ଅହମ୍ମଦାବାଦରେ ନରେନ୍ଦ୍ର ମୋଦୀ ଷ୍ଟାଡିୟମ ଓ ଲକ୍ଷ୍ନୌରେ ଥିବା ଷ୍ଟାଡିୟମ ନୂଆ ଫ୍ରାଞ୍ଚାଇଜକୁ ପସନ୍ଦ ଆସିପାରେ । କାରଣ ନବନିର୍ମିତ ଏହି ଦୁଇ ଷ୍ଟାଡିୟମରେ ଅଧିକ ସଂଖ୍ୟକ ଦର୍ଶକ ବସିପାରିବେ । ଆସନ୍ତା ସେପ୍ଟେମ୍ବର ୧୯ରୁ ଆଇପିଏଲର ଫେଜ୍-୨ ମ୍ୟାଚ୍ ୟୁଏଇରେ ଖେଳାଯିବ । ଅକ୍ଟୋବର ୧୫ରେ ଫାଇନାଲ ମ୍ୟାଚ୍ ଖେଳାଯିବ । କରୋନା କାରଣରୁ ଭାରତରେ ଖେଳାଯାଇଥିବା ଆଇପିଏଲକୁ ଅଧାରୁ ସ୍ଥଗିତ କରିବାକୁ ପଡିଥିଲା ।