ଶୀତ: କାହା ପାଇଁ କମ୍ବଳ ତଳର ସୁଖନିଦ୍ରାର ସୁଯୋଗ, କାହା ପାଇଁ ତାଲିବାନୀ ଶାସନଠୁ କମ ନୁହେଁ । ଫୁଙ୍ଗୁଳା ଫୁଟପାଥରୁ ରାସ୍ତାକଡ… ଶୀତ ଶାସ୍ତି ଦେଉଛି, ସାକ୍ଷୀ ସାଜୁଛି..
କନକ ବ୍ୟୁରୋ: ଶୀତ ଆସିଛି… ତମ ସହରକୁ, ମୋ ସହରକୁ । ନିପଟ ମଫସଲିର ଗାଁ ଗହୀରକୁ । ଶୀତ ଆସିଛି ବୋଲି ତ ଓଠ ଖୋଜୁଛି ଓଷୁମ ଚା । ଦେହକୁ ଦରକାର ହେଉଛି ସାଲ, ସ୍ୱେଟର । ରାତିର ବୟସ ବଢିବା କ୍ଷଣି ବଳଶାଳୀ ହୁଏ ଶୀତ । ଶୀତ ୧୪୪ ଲଗାଏ, କାଲୁଆ କାକର ସହ ଜାଡ ବି ଜାରି କରେ କର୍ଫ୍ୟୁ । ସାଧାରଣ ଲୋକଙ୍କୁ ଶାସ୍ତି ଦେବାକୁ କିଟମିଟ ଅନ୍ଧାରରେ କୁହୁଡି ସହ ଷଡଯନ୍ତ୍ର କରେ ଶୀତ…
Kanak News is now on WhatsApp
Join and get latest news updates delivered to you via WhatsApp
ଶୀତକୁ ଉପଭୋଗ କରିବାକୁ ଲୋକେ ଅବସର ଖୋଜନ୍ତି । କାଶ୍ମୀର ଯାଆନ୍ତି, କୋରାପୁଟ ବୁଲନ୍ତି, ଶିମିଳିପାଳରେ ଶୀତ ସହ ମିତ ବସିବାକୁ ଲୋକେ ଧାଇଁଯାଆନ୍ତି । ହେଲେ ଶୀତ ସବୁଠି ଥାଏ, ସଭିଙ୍କୁ ଥରାଏ । ହୁଏତ ଥିଲାବାଲାଙ୍କ ପାଇଁ ଶୀତ କମ୍ବଳ ତଳର ସୁଖନିଦ୍ରାର ସୁଯୋଗ ହୋଇପାରେ ହେଲେ ନଥିଲାବାଲାଙ୍କ ପାଇଁ ଶୀତ କିନ୍ତୁ ତାଲିବାନୀ ଶାସକଠୁ କିଛି କମ ନୁହେଁ । ଫୁଟପାଥର ଫୁଙ୍ଗୁଳା ରାସ୍ତା ଉପରେ ରାତି କାଟୁଥିବା ଦରିଦ୍ର, ଅସହାୟଙ୍କ ଆଖିରେ ଶୀତ କେଉଁ ସୈତାନଠୁ କମ୍ ନୁହେଁ ।
ଫି ବର୍ଷ ଶୀତ ଆସେ । ଶୀତ ଆସିଲେ ଶୋଇଯାଏ ସହର, ଶୂନଶାନ ହୁଏ ରାସ୍ତାଘାଟ । ଗଳିକନ୍ଦି, ଛକଛକକୁ ଛୁଟେ ଲୋକଙ୍କ ସୁଅ । ରାଜଧାନୀ ହେଉ କି ମଫସଲ ରାସ୍ତାର ଛାତି ଉପରେ ଥଣ୍ଡାରେ ଥରି ଥରି ରାତି କାଟୁଥିବା ଲୋକଙ୍କୁ ଦେଖି ତରଳିଯାଏ ମନ । ଅସହାୟ, ନିରାଶ୍ରୟଙ୍କ ସହ ଉଠାଯାଏ ସେବାର ସେଲ୍ଫି । କିଛି ଲୋକ କ୍ୟାମେରା ଆଢୁଆଳରେ ସେବା କରିବାକୁ ପସନ୍ଦ କରନ୍ତି । ଗରିବଙ୍କୁ ଦିଆଯାଏ କମ୍ବଳ, ଦିଆଯାଏ ଶୀତବସ୍ତ୍ର । ତଥାପି ଦାନକମ୍ବଳର ଗରମକୁ ଗୋଇଠାମାରି ଗରିବର ଦେହ ଭିତରକୁ ଧସେଇ ପଶେ ଶୀତ । ସହର ବଜାର, ରାସ୍ତାଘାଟ, ପ୍ଲାଟଫର୍ମ, ବସଷ୍ଟାଣ୍ଡ ଓ ମନ୍ଦିର ବାରଣ୍ଡା ସବୁଠି ଶୀତ ଶାସ୍ତି ଦିଏ, ଜିଇଁବାକୁ କରାଯାଉଥିବା ସଙ୍ଘର୍ଷର ସାକ୍ଷୀ ବି ରୁହେ ।
କିନ୍ତୁ କେବେ କେବେ ଶୀତ ବି ଶାସ୍ତି ସହୁଥିବା ମଣିଷକୁ ସଲାମ କଲେ । ଏଇ ଦେଖୁ ନାହାନ୍ତି ଶୀତୁଆ ରାତିରେ ଥଣ୍ଡାରୁ ମୁକ୍ତି ଦେବାକୁ ଜଣେ ବାପା କେମିତି ନିଆଁ ଜାଳି ତା ପୁଅକୁ ଉଷୁମ ସେକ ଦେଉଛନ୍ତି । ଆଉ ଶୀତ ବି ଜଣେ ବାପାର ଏ ସ୍ନେହ ଦେଖି ଥରେଇ ଦେବାକୁ ସାହସ କରୁନଥିବ । ସତରେ ବାପା ହେବା ସହଜ ନୁହେଁ, ସେଇଥିପାଇଁ ତ ଏଠି ଶୀତ ସେହି ବାପାମାନଙ୍କ ସାଲ୍ୟୁଟ୍ କରୁଛି ଯିଏ ନିଜେ ଥରି ପିଲାଙ୍କୁ ସୁରକ୍ଷା ଦେଉଛନ୍ତି ।
ଶୀତଦାଉରୁ ରକ୍ଷା ପାଇଁ ସରକାରଙ୍କ ପକ୍ଷରୁ ସବୁ ଜିଲ୍ଲାରେ ସେଲ୍ଟର ହୋମ ଖୋଲାଯାଇଛି । ହେଲେ ଏଠାକୁ କାହିଁକି ଆସୁ ନାହାନ୍ତି ଲୋକେ ? କେଉଁଠି ରହୁଛି ସମସ୍ୟା? ଗରିବ, ନିରାଶ୍ରୟ ଜାଣି ପାରୁ ନାହାନ୍ତି କି କେଉଁଠି ରହିଛି ଆଶ୍ରୟସ୍ଥଳ? କଣ ରହିଛି ସରକାରୀ ବ୍ୟବସ୍ଥା ? ନା ବାବୁମାନେ ଚାରିକାନ୍ଥର ଉଷ୍ମ ଘର ଭିତରେ ରହୁଛନ୍ତି ବୋଲି ଜାଣିପାରୁ ନାହାନ୍ତି ନିରାଶ୍ରୟଙ୍କ କଷ୍ଟ?
ପ୍ରଶାସନ ଅନେକ ସୁବିଧାର ଡିଣ୍ଡିମ ପିଟୁଥିବା ବେଳେ ଜାଡରେ ଥରୁଥିବା, ଶୀତର ଶାସ୍ତି ସହୁଥିବା ଏ ଅସହାୟ, ନିରାଶ୍ରୟଙ୍କ ଉପରେ ଥରେ ନଜର ପଡିବା ଦରକାର । କାରଣ ଶୀତକାକରରେ ଶୋଉଥିବା ମଣିଷ ହିଁ ଜାଣିଛି ଜୀବନ କେତେ ଯନ୍ତ୍ରଣାମୟ…