କନକ ବ୍ୟୁରୋ : କ୍ରିକେଟ ହେଉଛି ଅନିଶ୍ଚିନ୍ତତାର ଖେଳ । କ୍ରିକେଟରେ କେତେବେଳେ କଣ ହୁଏ ତାହାର ଅନ୍ଦାଜ ଲଗାଇବା ଏତେ ସହଜ ହୋଇନଥାଏ । କ୍ରିକେଟରେ ଅନେକ ରେକର୍ଡ ହୋଇଥାଏ ଏବଂ ଅନେକ ରେକର୍ଡ ଭାଙ୍ଗି ଥାଏ । କେେତେବେଳେ ୬ଟି ଛକା ତ ପୁଣି କେତେବେଳେ ୧୦ଟି ୱିକେଟ ନେଇ ରେକର୍ଡ କରିଥାନ୍ତି ଖେଳାଳୀ । ଆଉ ଏସବୁ ଭିତରେ ନ୍ୟୁଜିଲାଣ୍ଡ-ବାଂଲଦେଶ ମଧ୍ୟରେ ଖେଳାଯାଉଥିବା ଦ୍ୱିତୀୟ ଟେଷ୍ଟରେ ଏକ ନୂଆ ରେକର୍ଡ ଦେଖିବାକୁ ମିଳିଛି । ଗୋଟିଏ ବଲରେ ୭ ରନ୍ ସଂଗ୍ରହ କରି ନୂଆ ରେକର୍ଡ କରିଛନ୍ତି ନ୍ୟୁଜିଲାଣ୍ଡର ବ୍ୟାଟର ୱିଲ ୟଙ୍ଗ୍ । ଗୋଟିଏ ବଲରେ ୭ ରନ୍ ସଂଗ୍ରହ କରିବା କ୍ରିକେଟରେ କିଛି ନୂଆ କଥା ନୁହେଁ । ଅନେକସମୟରେ ଗୋଟିଏ ବଲରେ ୭ ରନ୍ ସଂଗ୍ରହ ହୋଇଥିବାର ଦେଖିବାକୁ ମିଳିଛି । କିନ୍ତୁ ଗୋଟିଏ ବଲରେ ୭ ରନ୍ ତାହା ବି ପୁଣି ବିନା ଛକାରେ, ଏହି କଥାଟା ଆପଣଙ୍କୁ ଆଶ୍ଚର୍ଯ୍ୟ କରିଦେବ । ବିନା ଛକାରେ ଗୋଟିଏ ବଲରେ ୭ ରନ୍ ହେଲା କେମିତି, ଏ ପ୍ରଶ୍ନ ସମସ୍ତଙ୍କ ମନରେ ଉଙ୍କି ମାରୁଥିବ । ତେବେ ବାସ୍ତବରେ ନ୍ୟୁଜିଲାଣ୍ଡ-ବାଂଲାଦେଶ ଟେଷ୍ଟ ମ୍ୟାଚରେ ଏଭଳି ଦେଖିବାକୁ ମିଳିଛି ।

Advertisment

ଖ୍ରୀଷ୍ଟଚର୍ଚ୍ଚରେ ଖେଳାଯାଉଥିବା ନ୍ୟୁଜିଲାଣ୍ଡ-ବାଂଲାଦେଶ ମ୍ୟାଚର ୨୬ତମ ଓଭରରେ ଏମିତି ଦେଖିବାକୁ ମିଳିଛି । ବାଂଲାଦେଶର ବୋଲର ଇବାଦତ୍ ହୁସେନଙ୍କ ଶେଷ ବଲକୁ ସ୍ଲିପ ଅଞ୍ଚଳରେ ଖେଳିଥିଲେ ୱିଲ୍ ୟଙ୍ଗ୍ । କ୍ୟାଚର ସୁଯୋଗ ସୃଷ୍ଟି ହୋଇଥିଲା । କିନ୍ତୁ ଦୁଭାଗ୍ୟବସତଃ କ୍ୟାଚ୍ ହାତଛଡା ହେବା ପରେ ବଲଟି ଥାର୍ଡମ୍ୟାନ୍ ଅଞ୍ଚଳକୁ ଚାଲି ଯାଇଥିଲା । ତେବେ ବଲଟି ବାଉଣ୍ଡରୀ ଲାଇନ ଛୁଇଁବା ପୂର୍ବରୁ ୩ ରନ୍ ନେଇ ସାରିଥିଲେ ୱିଲ୍ ୟଙ୍ଗ୍ । କିନ୍ତୁ ୱିକେଟକିପରଙ୍କ ହାତକୁ ବଲ ଆସିବା କ୍ଷଣି ନନ ଷ୍ଟ୍ରାଇକର ପଟକୁ ଫିଙ୍ଗିଥିଲେ । ତେବେ ଏହାକୁ ହାତଛଡା କରିଥିଲେ ବୋଲର । ହାତରେ ବଲ ବାଜିଥିଲେ ମଧ୍ୟ ଅଟକାଇ ପାରିନଥିଲେ ଇବାଦତ୍ । ବଲଟି ବାଉଣ୍ଡରୀ ଲାଇନ ଛୁଇଁଥିଲା । ଆଉ ଏହାପରେ ଅମ୍ପାୟର ଯେତେବେଳେ ନିଷ୍ପତ୍ତି ଦେଲେ ସେତେବେଳେ ସମସ୍ତେ ଆଶ୍ଚର୍ଯ୍ୟ ହୋଇ ଯାଇଥିଲେ । ହାତ ଉଠାଇ ଅମ୍ପାୟର ୭ ରନ୍ ପାଇଁ ସଂକେତ ଦେଇଥିଲେ । ଆଉ ଏହାସହ ବିନା ଛକାରେ ୱିଲ ୟଙ୍ଗ ଖାତାରେ ରନ୍ ଯୋଡି ହୋଇଥିଲା ।

ଦ୍ୱିତୀୟ ଟେଷ୍ଟର ପ୍ରଥମ ଦିନରେ ନ୍ୟୁଜିଲାଣ୍ଡ ଦୃଢ ବ୍ୟାଟିଂ କରି ୩୪୯ ରନ୍ କରିଥିବା ବେଳେ ଗୋଟିଏ ୱିକେଟ ହରାଇଛି । ଅଧିନାୟକ ଟମ୍ ଲଥାମ ୧୮୬ ରନରେ ଅପରାଜିତ ଥିବା ବେଳେ କନୱେ ୯୯ ରନରେ ଅପରାଜିତ ରହିଛନ୍ତି । ତେଣୁ ନ୍ୟୁଜିଲାଣ୍ଡ ପ୍ରଥମ ଇନିଂସରେ ଏକ ବଡ ସ୍କୋର କରିବ ବୋଲି ଆଶା କରାଯାଉଛି । ପ୍ରଥମ ମ୍ୟାଚ ଜିତି ବାଂଲାଦେଶ ଏହି ସିରିଜରେ ୧-୦ରେ ଆଗୁଆ ରହିଛି । ତେଣୁ ଦ୍ୱିତୀୟ ମ୍ୟାଚ୍ ଜିତି ସିରିଜ ବରାବର କରିବା ଲକ୍ଷ୍ୟରେ ରହିଛି ନ୍ୟୁଜିଲାଣ୍ଡ ଟିମ୍ ।