ନାବାଳିକାଙ୍କ ସହ ଦୁଷ୍କର୍ମ କରି ସୁପ୍ରିମକୋର୍ଟ ଯାଇଥିଲେ ସରକାରୀ କର୍ମଚାରୀ : କୋର୍ଟ ପଚାରିଲେ ପୀଡିତାଙ୍କୁ ବିବାହ କରିବାକୁ ରାଜି କି? ବିବାହ କଲେ ଟାଳିଦେଇପାରୁ ଗିରଫଦାରି
ଓକିଲଙ୍କ ଯୁକ୍ତିରେ ସନ୍ତୁଷ୍ଟ ହୋଇ ୪ସପ୍ତାହ ପାଇଁ ଦେଲେ ଅନ୍ତରୀଣ ଜାମିନ୍
କନକ ବ୍ୟୁରୋ : ଜଣେ ଦୁଷ୍କର୍ମ ଅଭିଯୁକ୍ତକୁ କୋର୍ଟ ପଚାରିଲେ- ପୀଡିତାଙ୍କୁ ବିବାହ କରିବାକୁ ରାଜି କି? ତାହାହେଲେ ଆମେ ଗିରଫଦାରିକୁ ଟାଳି ଦେଇପାରିବୁ । ଗତକାଲି ଏକ ମାମଲାର ଶୁଣାଣି କରି ସୁପ୍ରିମକୋର୍ଟର ପ୍ରଧାନ ବିଚାରପତି ଜଷ୍ଟିସ ଏସଏ ବୋବଡେ, ଜଷ୍ଟିସ ଏଏସ ବୋପନ୍ନା ଓ ଜଷ୍ଟିସ ଭି ସୁବ୍ରମଣିୟନଙ୍କ ଖଣ୍ଡପୀଠ ଅଭିଯୁକ୍ତଙ୍କ ଆଗରେ କିଛି ଏହିଭଳି ସର୍ତ ରଖିଥିଲେ ।
Kanak News is now on WhatsApp
Join and get latest news updates delivered to you via WhatsApp
କଥାହେଲା ଜଣେ ନାବାଳିକାଙ୍କୁ ଦୁଷ୍କର୍ମ କରିଥିବା ମାମଲାରେ ମହାରାଷ୍ଟ୍ରର ଜଣେ ସରକାରୀ କର୍ମଚାରୀଙ୍କ ଆବେଦନର ଶୁଣାଣି କରୁଥିଲେ କୋର୍ଟ । ଏହି ମାମଲାରେ ସରକାରୀ କର୍ମଚାରୀ ଜଣକ ସୁପ୍ରିମକୋର୍ଟରେ ଆଗୁଆ ଜାମିନ ପାଇଁ ଆବେଦନ କରିଥିଲେ । କାରଣ ଯଦି ସେ ଗିରଫ ହୋଇ ପୋଲିସ ହାଜତରେ ରୁହନ୍ତି, ତାହେଲେ ତାଙ୍କ ଚାକିରି ଚାଲିଯିବାର ଆଶଙ୍କା ରହିଛି ।
ଏହି ମାମଲାର ଶୁଣାଣି ଚାଲିଥିବାବେଳେ ପ୍ରଧାନ ବିଚାରପତିଙ୍କ ନେତୃତ୍ୱାଧୀନ ଖଣ୍ଡପୀଠ ଅଭିଯୁକ୍ତଙ୍କୁ ପ୍ରଶ୍ନ କରିଥିଲେ- ଆପଣ ତାଙ୍କୁ ବିବାହ କରିବାକୁ ଚାହାନ୍ତି କି ? ଯଦି ଆପଣ ତାଙ୍କୁ ବିବାହ କରିବାକୁ ରାଜି ଅଛନ୍ତି ତାହାହେଲେ ଆମେ ବିଚାର କରିବୁ । ନହେଲେ ଆପଣଙ୍କୁ ଜେଲ ଯିବାକୁ ପଡିବ । ଆମେ ଆପଣଙ୍କୁ ବିବାହ କରିବାକୁ ବାଧ୍ୟ କରୁନାହୁଁ । ଏହାର ଜବାବରେ ଅଭିଯୁକ୍ତଙ୍କ ଓକିଲ କହିଥିିଲେ ଯେ, ଗିରଫ ହେଲେ ତାଙ୍କ ଚାକିରି ଚାଲିଯିବ, ତେଣୁ ଆଗୁଆ ଜାମିନ ଦିଆଯାଉ ।
ଏହାର ଜବାବରେ ଅଭିଯୁକ୍ତଙ୍କ ଉଦ୍ଦେଶ୍ୟରେ କୋର୍ଟ କହିଥିଲେ- ଆପଣ ସେହି ଝିଅଙ୍କ ସହ ଦୁଷ୍କର୍ମ କରିବା ପୂର୍ବରୁ ଏକଥା ଚିନ୍ତା କରିବାର ଥିଲା । ଆପଣ ଜାଣିଛନ୍ତି ଯେ, ଆପଣ ଜଣେ ସରକାରୀ ଚାକିରିଆ । ତଥାପି ଠିକ ସ୍ଥାନରେ ଜାମିନ ପାଇଁ ଆବେଦନ କରନ୍ତୁ । ଆମେ ଆପଣଙ୍କ ଗିରଫଦାରି ଉପରେ ରୋକ ଲଗାଉଛୁ । ଏହାପରେ କୋର୍ଟ ଅଭିଯୁକ୍ତଙ୍କୁ ୪ ସପ୍ତାହ ପାଇଁ ଅନ୍ତରୀଣ ଜାମିନ ପ୍ରଦାନ କରିଥିଲେ ।