ଓଡିଶାରୁ ନିର୍ବାଚନ ଲଢିବେ କି କେନ୍ଦ୍ରମନ୍ତ୍ରୀ ? ଗତକାଲି ଇସାରା ଇସାରାରେ କହିଥିଲେ ରାଜା ବାବୁ ଚାହିଁଲେ ସମ୍ବଲପୁରରୁ ହୋଇପାରନ୍ତି ପ୍ରାର୍ଥୀ, ନୀତେଶ କହିଲେ, ଦଳ ଚାହିଁଲେ ଧର୍ମେନ୍ଦ୍ରଙ୍କ ପାଇଁ ଛାଡିଦେବି ଆସନ ।
କନକ ବ୍ୟୁରୋ: ଓଡିଶାରୁ ନିର୍ବାଚନ ଲଢିବାକୁ ଆଗ୍ରହୀ କି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ? ବୀର ସୁରେନ୍ଦ୍ର ସାଏଙ୍କ ଜନ୍ମମାଟି ଖିଣ୍ଡା ଗାଁରେ ଧର୍ମେନ୍ଦ୍ର ଦେଇଥିବା ଏକ ବୟାନ ଏଭଳି ରାଜନୈତିକ ଚର୍ଚ୍ଚାକୁ ଖୋରାକ ଯୋଗାଇଛି । ଗତକାଲି ଧର୍ମେନ୍ଦ୍ର କହିଥିଲେ ରାଜା ଚାହିଁଲେ ସେ ସାଂସଦ ହେବେ । ଅର୍ଥାତ ସମ୍ବଲପୁର ସାଂସଦ ନୀତେଶ ଗଙ୍ଗଦେବଙ୍କ ଆଡ଼କୁ ସେ ଇସାରା କରିଥିଲେ । ଧର୍ମେନ୍ଦ୍ରଙ୍କ ଏହି ବୟାନ ପରେ ପ୍ରତିକ୍ରିୟା ରଖିଛନ୍ତି ସମ୍ବଲପୁର ସାଂସଦ ନୀତେଶ ଗଙ୍ଗଦେବ ।
Kanak News is now on WhatsApp
Join and get latest news updates delivered to you via WhatsApp
ନିତେଶ ଗଙ୍ଗଦେବ କହିଛନ୍ତି କି, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଚାହିଁଲେ, ସମ୍ବଲପୁର, ଭୁବନେଶ୍ୱର କିମ୍ବା ରାଜ୍ୟର ଯେକୌଣସି ସ୍ଥାନରୁ ଛିଡାହୋଇପାରନ୍ତି । ଏପରିକି ଦଳ ଚାହିଁଲେ ସେ ଧର୍ମେନ୍ଦ୍ରଙ୍କ ପାଇଁ ଆସନ ଛାଡିଦେବେ ବୋଲି କହିଛନ୍ତି । ପୂର୍ବରୁ ବିଧାୟକ ଥିଲେ, ଦଳ ଚାହିଁବାରୁ ସେ ସମ୍ବଲପୁର ସାଂସଦ ହୋଇ ଜିଲ୍ଲାବାସୀଙ୍କ ସେବା କରୁଥିବା କହିଛନ୍ତି ।
ସେପଟେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରତ୍ୟେକ୍ଷ ନିର୍ବାଚନ ପ୍ରତିଯୋଗିତାରୁ ଦୂରେଇ ରହିଛନ୍ତି । ୨୦୧୯ ନିର୍ବାଚନରେ ଚର୍ଚ୍ଚା ହେଉଥିଲା କି ସେ ସମ୍ବଲପୁରରୁ ପ୍ରତିଦ୍ୱନ୍ଦିତା କରିପାରନ୍ତି । ଯାହା ଏବେ ବିଜେପିର ପାରମ୍ପାରିକ ଗଡ଼ରେ ପରିଣତ ହୋଇସାରିଛି । ଗତ ସାଧାରଣ ନିର୍ବାଚନରେ ନିତେଶ ଗଙ୍ଗଦେବ ଏଠୁ ବାଜିମାରିଛନ୍ତି । ଧର୍ମେନ୍ଦ୍ରଙ୍କ ବୟାନ ଓ ନୀତେଶ ସମ୍ମତି ପରେ ସମ୍ବଲପୁରରୁ ଧର୍ମେନ୍ଦ୍ର ପ୍ରଧାନ ନିର୍ବାଚନ ଳଢିବା ନେଇ ରାଜନୈତିକ ଚର୍ଚ୍ଚାକୁ ଖୋରାକ ଯୋଗାଇଛି ।