ଭାରତରେ ବ୍ୟାପିଯିବ କି କରୋନାର ନୂଆ ଭୂତାଣୁ ‘ଓମିକ୍ରନ’? ଦିଲ୍ଲୀ ହସ୍ପିଟାଲରେ ଭର୍ତ୍ତି ହେଲେ ୧୨ ‘ଓମିକ୍ରନ’ ସନ୍ଦିଗ୍ଧ
କନକ ବ୍ୟୁରୋ: ଓମିକ୍ରନ’ସଂକ୍ରମିତ ଦେଶରୁ ଭାରତକୁ ଆସିଥିବା ୧୬ ହଜାର ଯାତ୍ରୀଙ୍କ ଉପରେ ନଜର ରଖିଛନ୍ତି ଭାରତ ସରକାର । ସେମାନଙ୍କ ମଧ୍ୟରୁ ୧୮ ଜଣ ପଜିଟିଭ ଚିହ୍ନଟ ହୋଇଛନ୍ତି । ସେମାନଙ୍କ ନମୁନାକୁ ଜିନୋମ ସିକ୍ୱେସିଂ ପାଇଁ ପଠାଯାଇଛି । ସେପଟେ ଦିଲ୍ଲୀରେ ୧୨ଜଣ ସନ୍ଦିଗ୍ଧ ‘ଓମିକ୍ରନ’ ସଂକ୍ରମିତ ହସ୍ପିଟାଲରେ ଭର୍ତ୍ତି ହୋଇଛନ୍ତି । ସେମାନଙ୍କ ଠାରେ ‘ଓମିକ୍ରନ’ ଭଳି ଲକ୍ଷଣ ରହିଛି । ସେପଟେ ମହାରାଷ୍ଟ୍ରରେ ମଧ୍ୟ ୨୮ଜଣଙ୍କ ଠାରେ ଏହି ଭୂତାଣୁ ଥିବା ସନ୍ଦେହ କରାଯାଉଛି । କିନ୍ତୁ ସୌଭାଗ୍ୟର କଥା ହେଉଛି, ସେମାନଙ୍କ ଠାରେ ସାମାନ୍ୟ ଲକ୍ଷଣ ରହିଛି ଓ କେହି ଗୁରୁତର ହୋଇନାହାନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗୁରୁବାର ଦିନ କର୍ଣ୍ଣାଟକରେ ଓମିକ୍ରନ ଭୂତାଣୁ ଆକ୍ରାନ୍ତ ଚିହ୍ନଟ ହେବା ପରେ ପୂରା ଭାରତରେ ତତ୍ପରତା ପ୍ରକାଶ ପାଇଛି । ଦିଲ୍ଲୀରେ ଓମିକ୍ରନ ସନ୍ଦେହରେ ଗତ ଦୁଇ ଦିନରେ ୧୨ ଜଣଙ୍କୁ ଲୋକନାୟକ ଜୟପ୍ରକାଶ ହସ୍ପିଟାଲରେ ଭର୍ତ୍ତି କରାଯାଇଛି । ଶୁକ୍ରବାର ଯେଉଁ ୪ ଜଣ ସନ୍ଦେହ ଘେରକୁ ଆସିଛନ୍ତି, ସେମାନେ ସମସ୍ତେ ବିଦେଶ ଫେରନ୍ତା ।
ସେହିପରି ମହାରାଷ୍ଟ୍ରରେ ୨୮ ଜଣ ଓମିକ୍ରନରେ ସଂକ୍ରମିତ ହୋଇଥିବା ସନ୍ଦେହ କରାଯାଉଛି । ଏମାନଙ୍କ ମଧ୍ୟରେ ୧୦ ଜଣ ମୁମ୍ବାଇରେ ଅଛନ୍ତି । ଏ ସମସ୍ତଙ୍କର ନମୁନା ଜିନମ୍ ସିକ୍ୱେନସିଂ ପାଇଁ ପଠାଯାଇଛି । ଆସନ୍ତା ସପ୍ତାହରେ ରିପୋର୍ଟ ଆସିବ । ମୁମ୍ବାଇରେ କରୋନା ସଂକ୍ରମିତ ହୋଇଥିବା ୧୦ ଜଣଙ୍କ ମଧ୍ୟରୁ ଆରଟିପିସିଆର ଟେଷ୍ଟ ବେଳେ ୬ ଜଣଙ୍କ ନମୁନାରେ ‘ଏସ୍-ଜିନ୍’ ନଥିବା ଜଣାପଡ଼ିଛି । ‘ଏସ୍-ଜିନ୍’ ନଥିବାରୁ ଏମାନେ ଓମିକ୍ରନ୍ ସଂକ୍ରମିତ ହୋଇଥିବା ସନ୍ଦେହ କରାଯାଉଛି ।
ଗାଇଡଲାଇନ ବଦଳାଇଲା କର୍ଣ୍ଣାଟକ
- ଦୁଇ ଡୋଜ୍ ଟିକା ନେଇନଥିଲେ ମଲ୍ ଓ ଥିଏଟର ମନା
- ଦୁଇ ଜଣ ଓମିକ୍ରନ ଆକ୍ରାନ୍ତ ଠାବ ହେବା ପରେ କରୋନା କଟକଣାକୁ କଡ଼ା କରିଛନ୍ତି କର୍ଣ୍ଣାଟକ ସରକାର । ଏଣିକି କର୍ଣ୍ଣାଟକରେ
- କର୍ଣ୍ଣାଟକ କଟକଣା
- ମଲ୍, ଥିଏଟର, ମଲ୍ଟିପ୍ଲେକ୍ସ, ଯିବାକୁ ହେଲେ ଦୁଇ ଡୋଜ୍ ଟିକା ବାଧ୍ୟତାମୂଳକ
- ଶିକ୍ଷାନୁଷ୍ଠାନରେ ଜାନୁଆରୀ ୧୫ ଯାଏଁ ଉତ୍ସବ, ସମାବେଶ ମନା
ସେପଟେ ବେଙ୍ଗାଳୁରୁରେ ଓମିକ୍ରନ୍ ଚିହ୍ନଟ ଡାକ୍ତରଙ୍କ ସଂସ୍ପର୍ଶରେ ଆସିଥିବା ୫ ଜଣ କରୋନା ପଜିଟିଭ୍ ହୋଇଛନ୍ତି । ଡାକ୍ତରଙ୍କ ସହଯୋଗୀ, ତାଙ୍କ ପତ୍ନୀ, ଝିଅ ଓ ଶଶୁର ପଜିଟିଭ୍ ଚିହ୍ନଟ ହୋଇଛନ୍ତି । ୫ ଜଣ ସଂକ୍ରମିତଙ୍କ ନମୁନା ଜିନୋମ୍ ସିକ୍ୱେନସିଂ ପାଇଁ ପଠାଯାଇଛି । ଏପଟେ ରାଜ୍ୟ ଜନସ୍ୱାସ୍ଥ୍ୟ ନିର୍ଦ୍ଦେଶକ କହିଛନ୍ତି, ସଂକ୍ରମିତ ଦେଶରୁ ଆସୁଥିବା ବ୍ୟକ୍ତିମାନଙ୍କ ସୂଚନା କେନ୍ଦ୍ର ସରକାର ଦେଉଛନ୍ତି । ସନ୍ଦେହ ଥିବା ବ୍ୟକ୍ତିିଙ୍କ କଣ୍ଟାକ୍ଟ ଟ୍ରେସିଂ ପାଇଁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦିଆଯାଇଛି । କରୋନାର ନୂଆ ଭ୍ୟାରିଆଣ୍ଟ ଓମିକ୍ରନକୁ ନେଇ ଆତଙ୍କିତ ହୁଅନ୍ତୁ ନାହିଁ, କିନ୍ତୁ ସତର୍କ ରୁହନ୍ତୁ ବୋଲି କହିଛନ୍ତି ଡାକ୍ତର ନିରଞ୍ଜନ ମିଶ୍ର । ତେବେ ‘ଓମିକ୍ରନ’ ଭୂତାଣୁ କେତେ ଘାତକ ହେବ, ତାହା ଏବେ ବି ସ୍ପଷ୍ଟ ହୋଇନାହିଁ । ତେବେ ଏହା ଡେଲ୍ଟା ଭୂତାଣୁ ଠାରୁ ୩ ଗୁଣ ଅଧିକ ସଂକ୍ରମକ ବୋଲି କହୁଛନ୍ତି ବୈଜ୍ଞାନିକ ।