କନକ ବ୍ୟୁରୋ: ପୁଣି କଂଗ୍ରେସର ମଙ୍ଗ ଧରିପାରନ୍ତି ରାହୁଲ ଗାନ୍ଧୀ । ଶନିବାର କଂଗ୍ରେସ ସିଡବ୍ଲୁସି ବୈଠକ ବସିଥିବାବେଳେ ଏହି ବୈଠକରେ ଏନେଇ ସଙ୍କେତ ମିଳିଛି । ଆଜି କଂଗ୍ରେସର ସିନିୟର ନେତାମାନେ ପୁଣି ରାହୁଲଙ୍କୁ କଂଗ୍ରେସ ଅଧ୍ୟକ୍ଷ ପଦ ସମ୍ଭାଳିବାକୁ ପ୍ରସ୍ତାବ ଦେଇଥିଲେ, ଯାହାର ଉତ୍ତର ରଖି ରାହୁଲ କହିଥିଲେ ସେ ନେଇ ବିଚାର କରିବେ । ଯାହାପରେ ସେ ପୁଣି କଂଗ୍ରେସ ଅଧ୍ୟକ୍ଷ ପଦକୁ ଫେରିପାରନ୍ତି ବୋଲି ରାଜନୀତି କରିଡରରେ ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଆଜି ଦିଲ୍ଲୀରେ ବସିଥିବା କଂଗ୍ରେସ କାର୍ଯ୍ୟକାରୀ କମିଟିର ବୈଠକରେ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ କଂଗ୍ରେସ ଅଧ୍ୟକ୍ଷ ପଦ ପାଇଁ ରାହୁଲ ଗାନ୍ଧୀଙ୍କ ନାମ ସୁପାରିଶ କରିଥିଲେ । ଯାହାକୁ ଅନ୍ୟ ସଦସ୍ୟମାନେ ମଧ୍ୟ ଗ୍ରହଣ କରିବା ସହିତ ଏଥିରେ ସହମତି ପ୍ରକାଶ କରିଥିଲେ । ତେବେ ରାହୁଲ ଗାନ୍ଧୀ କଂଗ୍ରେସ ନେତୃତ୍ୱ ନେବା ନେଇ ବିଚାର କରିବେ ବୋଲି କହିଛନ୍ତି । ଏହି ବୈଠକ ପରେ କଂଗ୍ରେସର ବରିଷ୍ଠ ନେତା ଅମ୍ବିକା ସୋନୀ କହିଛନ୍ତି, ରାହୁଲ ଗାନ୍ଧୀଙ୍କୁ କଂଗ୍ରେସ ଅଧ୍ୟକ୍ଷ କରାଯିବା ନେଇ ବୈଠକରେ ସହମତି ପ୍ରକାଶ ପାଇଛି । ହେଲେ ସେ ଏହି ଦାୟିତ୍ୱରେ ରହିବେ କି ନାହିଁ ତାହା ସମ୍ପୂର୍ଣ୍ଣ ରୂପେ ତାଙ୍କ ଉପରେ ନିର୍ଭର କରୁଛି । ହେଲେ ସବୁ ନେତା ରାହୁଲ ଗାନ୍ଧୀଙ୍କୁ ପାର୍ଟିର ଅଧ୍ୟକ୍ଷ କରିବାକୁ ଚାହୁଛନ୍ତି ବୋଲି ସେ କହିଛନ୍ତି ।
ଅନ୍ୟପଟେ ଏହି ବୈଠକରେ ସୋନିଆ ଗାନ୍ଧୀ ଜି-୨୩ର ନେତାଙ୍କୁ କଡା ବାଣୀ ଶୁଣାଇଛନ୍ତି । ସେ ହିଁ କଂଗ୍ରେସର ପୂର୍ଣ୍ଣକାଳୀନ ସଭାପତି ବୋଲି ସୋନିଆ ଗାନ୍ଧୀ କହିଛନ୍ତି । ତା ସହିତ ତାଙ୍କ ସହିତ କଥା ହେବାକୁ ଦଳର ନେତାମାନେ ଗଣମାଧ୍ୟମର ସାହାଯ୍ୟ ନିଅନ୍ତୁ ନାହିଁ ବୋଲି ଆଜି ଜି-୨୩ ନେତାଙ୍କୁ ଟାର୍ଗେଟ କରି କହିଛନ୍ତି ସୋନିଆ । ତେବେ ଦଳରେ ରହିବାକୁ ହେଲେ ଅନୁଶାସନ ଏବଂ ନିୟମ ମାନିବାକୁ ହେବ ବୋଲି ସେ ସ୍ପଷ୍ଟ କରିଛନ୍ତି ।
ସୂଚନାଯୋଗ୍ୟ ଯେ, ୨୦୧୯ ସାଧାରଣ ନିର୍ବାଚନରେ କଂଗ୍ରେସ ଶୋଚନୀୟ ପରାଜୟ ବରଣ କରିଥିଲା । ଏହାପରେ ଏହି ପରାଜୟ ପାଇଁ ନିଜକୁ ଦାୟୀ କରି କଂଗ୍ରେସ ଅଧ୍ୟକ୍ଷ ପଦରୁ ଇସ୍ତଫା ଦେଇଥିଲେ ରାହୁଲ ଗାନ୍ଧୀ । ଏହାପରଠାରୁ ସୋନିଆ ଗାନ୍ଧୀ ଦଳର ଅନ୍ତରୀଣ ଅଧ୍ୟକ୍ଷ ପଦରେ ଅଛନ୍ତି । ତେବେ ପୁଣିଥରେ ଏହି ପଦ ରାହୁଲ ଗାନ୍ଧୀଙ୍କ ପାଖକୁ ଫେରିପାରେ ବୋଲି ଚର୍ଚ୍ଚା ହେଉଛି।