କମିପାରେ ପେଟ୍ରୋଲ ଓ ଡଜେଲର ଦାମ ! ପେଟ୍ରୋଲିୟମକୁ ଜିଏସଟି ଅଧିନକୁ ଆଣିବା ନେଇ ଅର୍ଥମନ୍ତ୍ରୀଙ୍କ ବୟାନ ପରେ ବଢୁଛି ଚର୍ଚ୍ଚା

କନକ ବ୍ୟୁରୋ : ଦେଶରେ ଲାଗିରହିଥିବା ଦରବୃଦ୍ଧି ମଧ୍ୟରେ ସାଧାରଣ ଲୋକଙ୍କ ପାଇଁ ସବୁଠାରୁ ଅଧିକ ଚିନ୍ତାର ବିଷୟ ହେଉଛି ପେଟ୍ରୋଲ ଓ ଡିଜେଲର ଦାମ । ସାରା ଦେଶରେ ଏବେ ପେଟ୍ରୋଲ ଓ ଡିଜେଲ ଲିଟର ପ୍ରତି ୧୦୦ଟଙ୍କାରୁ ଅଧିକ ରହିଛି । ବିରୋଧୀଦଳମାନେ ଏହି ପ୍ରସଙ୍ଗରେ ସରକାରଙ୍କୁ ଘେରୁଥିବା ବେଳେ ଏହା ସରକାରଙ୍କ ଅଧିନ ନୁହେଁ ବୋଲି ସଫେଇ ଦେଉଛନ୍ତି ସରକାର । ସେପଟେ ଦୀର୍ଘଦିନ ହେବ ପେଟ୍ରୋଲିୟମକୁ ଜିଏସଟି ଅଧିନକୁ ଆଣିବାକୁ ଦାବି ହେଉଥିବା ବେଳେ ଏହା ଉପରେ ବୟାନ ଦେଇଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ଅର୍ଥମନ୍ତ୍ରୀ କହିଛନ୍ତି କି ଯଦି ସବୁ ରାଜ୍ୟର ସରକାରମାନେ ସହମତି ପ୍ରକାଶ କରନ୍ତି ତେବେ ପେଟ୍ରୋଲିୟମକୁ ଜିଏସଟି ଅନ୍ତର୍ଭୁକ୍ତ କରାଯାଇପାରେ ।

ସେପଟେ ଅର୍ଥମନ୍ତ୍ରୀ କହିଛନ୍ତି କି କିଛିବର୍ଷ ହେବ ସରକାର ଦେଶର ଆର୍ଥିକ ବୃଦ୍ଧି କରିବାକୁ ପ୍ରୟାସ କରିବା ସହ ସାଧାରଣ ଲୋକଙ୍କ ବ୍ୟୟବୃଦ୍ଧି କରିବାକୁ ଯୋଜନା କରୁଛନ୍ତି । ଉଦ୍ୟୋଗ ମଣ୍ଡଳ ପିଏଚଡି ଚ୍ୟାମ୍ବର ଅଫ୍ କମର୍ସ ଆଣ୍ଡ ଇଣ୍ଡଷ୍ଟ୍ରୀଜର ସଦସ୍ୟଙ୍କ ସହ ବଜେଟ ବୈଠକ ପରେ ଅର୍ଥମନ୍ତ୍ରୀ ଏକ ବୈଠକ କରିଥିଲେ । ଏଥିରେ ସେ କହିଛନ୍ତି କି, ପେଟ୍ରୋଲିୟମକୁ ଜିଏସଟି ଅଧିନକୁ ଆଣିବା ନେଇ ନିୟମ ରହିଛି । ହେଲେ ଏନେଇ ପ୍ରଥମେ ସମସ୍ତ ରାଜ୍ୟସରକାରଙ୍କ ସହମତି ଆବଶ୍ୟକ ।

ସୂଚନା ଥାଉକି ୫ଟି ପେଟ୍ରୋଲିୟମ ପଦାର୍ଥ ଯଥା କଞ୍ଚାତେଲ, ହାଇସ୍ପିଡ ଡିଜେଲ, ପ୍ରାକୃତିକ ଗ୍ୟାସ ଓ ବିମାନ ଇନ୍ଧନ ଏବେ ଜିଏସଟି ଅଧିନରେ ନାହିଁ । ଏହିସବୁ ଉତ୍ପାଦକୁ ଜିଏସଟି ଅଧିନକୁ ଆଣିବାକୁ ହେଲେ ଜିଏସଟି ପରିଷଦ ବିଚାର କରିବ । ସେପଟେ ଜିଏସଟି ପରିଷଦ ବୈଠକ ଫେବୃଆରୀ ୧୮ ତାରିଖରେ ବସୁଥିବାରୁ ଏଥର ଏହା ଉପରେ ଆଲୋଚନା ହୋଇପାରେ ।