କନକ ବ୍ୟୁରୋ: ଭାରତ ଫେରିବ ମେହୁଲ ଚୌକସି? ଡୋମିନିକାରେ ଡେରା ପକାଇଛି ଭାରତୀୟ ଦଳ । ପଳାତକ ମେହୁଲ ଚୌକସି ଗିରଫ ପରେ ଏବେ ଭାରତକୁ ଫେରାଇ ଆଣିବାକୁ ଉଦ୍ୟମ ଚାଲିଛି । ଭାରତର ଇଡି, ସିବିଆଇ ଭଳି ଏକାଧିକ ସଂସ୍ଥାର ୮ ଜଣିଆ ଟିମ୍ ଏବେ ଡୋମିନିକାରେ ଡେରା ପକାଇଛନ୍ତି । ବୁଧବାର ଡୋମିନିକା କୋର୍ଟରେ ଶୁଣାଣି ସମୟରେ କୋର୍ଟରେ ଚୌକସୀର ଅର୍ଥନୈତିକ ଅପରାଧର ଦସ୍ତାବିଜ ଦାଖଲ ସହ ଡୋମିନିକାର ସରକାରୀ ଓକିଲଙ୍କୁ ସହାୟତା କରିବ ଭାରତର ଏହି ପ୍ରତିନିଧି ଦଳ । ଏହାଛଡା ମେହୁଲ ଚୌକସି ଭାରତର ନାଗରିକ ବୋଲି ପ୍ରମାଣ ଦେଇ ପ୍ରତ୍ୟାର୍ପଣ ପାଇଁ କୋର୍ଟଙ୍କ ଅନୁମତି ଲୋଡିବ । କାରଣ ମେହୁଲ ଚୌକସି ୨୦୧୭ରୁ ଆଂଟିଗୁଆର ନାଗରିକତା ଗ୍ରହଣ କରିଥିବା ବେଳେ ୨୦୧୮ରୁ ସେଠାରେ ରହି ଆସୁଛି । ହେଲେ ଆଂଟିଗୁଆରୁ କ୍ୟୁବାକୁ ଫେରାର ହେବା ବେଳେ ଡୋମିନିକାରେ ଧରାପଡିଛି । ଚୌକିସି ଡୋମିନିକାର ନାଗରିକ ହୋଇନଥିବାରୁ ମୌଲିକ ଅଧିକାର ନେଇ କୌଣସି ଦାବି କରିପାରିବ ନାହିଁ ଓ ଭାରତକୁ ପ୍ରତ୍ୟାର୍ପଣ ପଥ ସହଜ ହେବ ବୋଲି ଅନୁମାନ କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଡୋମିନିକା କୋର୍ଟ ମେହୁଲକୁ ଭାରତ ପ୍ରତ୍ୟାର୍ପଣ ପାଇଁ ଅନୁମତି ଦେଲେ ଏହି ଟିମ ହିଁ ତାଙ୍କୁ ଡୋମିନିକାରୁ କତାର ଭାୟାଦେଇ ଭାରତ ଆଣିବ । ଦିଲ୍ଲୀ ପହଂଚିବା ପରେ ଦିଲ୍ଲୀ ଏୟାରପୋର୍ଟରେ ହିଁ ତାଙ୍କୁ ଗିରଫ ଘୋଷଣା କରାଯିବାର ସୂଚନା ରହିଛି । ମିଶନ ଚୋକସି ଟିମରେ ଡୋମିନିକା ଯାଇଛନ୍ତି ସିବିଆଇର ବ୍ୟାଙ୍କିଙ୍ଗ ଫ୍ରଡ ବିଭାଗର ମୁଖ୍ୟ ଶାରଦା ରାଉତଙ୍କ ନେତୃତ୍ୱରେ ଯାଇଛନ୍ତି ସିବିଆଇର ୨ଜଣ ଅଧିକାରୀ, ପ୍ରବର୍ତନ ନିର୍ଦ୍ଦେଶାଳୟର ୨ ଜଣ ଏବଂ ସିଆରପିଏଫର ୨ ଜଣ ଅଧିକାରୀ । ମେ ୨୬ ତାରିଖରେ ଚୌକସି ଧରା ପଡିବା ପରେ ଭାରତର ଏହି ଟିମ୍ ମେ ୨୮ ତାରିଖରେ ଛୋଟ ଦ୍ୱୀପ ଡୋମିନିକାରେ ପହଂଚିଥିଲା ।
ପଂଜାବ ନେସନାଲ ବ୍ୟାଙ୍କ ଠକେଇର ଅଭିଯୁକ୍ତ ଚୌକସି ୨୦୧୮ରେ ଭାରତରୁ ଫେରାର ପରେ ଭାରତରେ ରାଜନୈତିକ ବିବାଦ ଆରମ୍ଭ ହୋଇଥିଲା । ଠିକ ସେହିପରି ଏବେ ଚୌକସିର ଗିରଫ, ଆଂଟିଗୁଆରୁ ଡୋମିନିକା ଯାଏଁ ରାଜନୈତିକ ଝଡ ସୃଷ୍ଟି କରିଛି । ପଳାତକ ମେହୁଲ ଚୌକସି ଗିରଫ ପରେ ଡୋମିନିକାରେ ଏବେ ରାଜନୈତିକ ବିବାଦ ଆରମ୍ଭ ହୋଇଯାଇଛି । ଆଂଟିଗୁଆ ଓ ଡୋମିନିକାର ବିରୋଧୀ ଦଳ ଏବେ ମେହୁଲ ଚୌକସି ମାମଲାକୁ ନେଇ ସରକାରଙ୍କୁ ଟାର୍ଗେଟ କରିଛନ୍ତି । ଡୋମିନିକାର ବିରୋଧୀ ଦଳ ନେତା ଲିନାକ୍ସ ଲିଂଟନ ପ୍ରଧାନମନ୍ତ୍ରୀ ରୁଜଭେଲ୍ଟ ସ୍କେରିଟଙ୍କୁ ଟାର୍ଗେଟ କରି କହିଛନ୍ତି, ସରକାର ଜାଣିଶୁଣି ମେହୁଲକୁ ଆଂଟିଗୁଆରୁ ଗାଏବ କରି ଡୋମିନିକା ଆଣିଛନ୍ତି । ଦେଶରେ କୌଣସି ଆଇନ ବୋଲି କିଛି ନାହିଁ, ମେହୁଲ ଷଡଯନ୍ତ୍ରରେ ସରକାର ସାମିଲ ହୋଇ ଅନ୍ତର୍ଜାତୀୟସ୍ତରରେ ଦେଶର ଭାବମୂର୍ତିକୁ ଖରାପ କରିଛନ୍ତି । ସେହିପରି ଆଂଟିଗୁଆରେ ମଧ୍ୟ ପ୍ରଧାନମନ୍ତ୍ରୀ ଗେଷ୍ଟନ ବ୍ରାଉନଙ୍କୁ ନିଶାଣ କରିଛନ୍ତି ବିରୋଧୀ ଦଳ । ଅନ୍ୟପଟେ ମେହୁଲ ବିରୋଧୀ ଦଳଙ୍କୁ ପାଣ୍ଠି ଯୋଗାଉଥିବା ଅଭିଯୋଗ ଆଣିଛନ୍ତି ଖୋଦ ପ୍ରଧାନମନ୍ତ୍ରୀ ଗେଷ୍ଟନ ବ୍ରାଉନ । ଶାସନକୁ ଫେରିଲେ ଆଂଟିଗୁଆରେ ନିର୍ଭୟରେ ରହିବାକୁ ପ୍ରତିଶ୍ରୁତି ଦେଇ ବିରୋଧୀ ମେହୁଲ ଠାରୁ ଚାନ୍ଦା ନେଇଥିବା ଅଭିଯୋଗ କରିଛନ୍ତୁ ଗେଷ୍ଟନ ବ୍ରାଉନ ।