ବାଜେପେୟୀଙ୍କ ସହ ଖେଳିଥିବା ଖେଳ ମୋଦୀଙ୍କ ସହ ଖେଳିବେ କି ଚନ୍ଦ୍ରବାବୁ ନାଇଡୁ । ପଢନ୍ତୁ ୨୫ ବର୍ଷ ତଳେ ଟିଡିପି ପାଇଁ କେମିତି ଭାଙ୍ଗିଥିଲା ବିଜେପି ସରକାର
କନକ ବ୍ୟୁରୋ :ବିଜେପି ଓ ଏନଡିଏର ସହଯୋଗୀଦଳମାନେ ଆଜିର ବୈଠକରେ ଘୋଷଣା କରିଛନ୍ତି ନରେନ୍ଦ୍ର ମୋଦୀ ତୃତୀୟ ଥର ପାଇଁ ଦେଶର ପ୍ରଧାନମନ୍ତ୍ରୀ ହେବେ । ହେଲେ ନରେନ୍ଦ୍ର ମୋଦୀ ସେହିଦିନ ପର୍ଯ୍ୟନ୍ତ ପ୍ରଧାନମନ୍ତ୍ରୀ ରହିବେ ଯେଉଁଦିନ ପର୍ଯ୍ୟନ୍ତ ନୀତିଶ କୁମାର ଓ ଚନ୍ଦ୍ରବାବୁ ନାଇଡୁ ଏନଡିର ସହଯୋଗୀ ଭାବେ ରହିବେ । ହେଲେ ଆରମ୍ଭରୁ ବିଜେପିକୁ ସମର୍ଥନ ଦେବା ପୂର୍ବରୁ ଚନ୍ଦ୍ରବାବୁ ନାଇଡୁ ସର୍ତ ରଖିଛନ୍ତି ଯେ ତାଙ୍କୁ ବାଚସ୍ପତି ପଦ ଦରକାର ।
Kanak News is now on WhatsApp
Join and get latest news updates delivered to you via WhatsApp
ହେଲେ ଆଜି ଯେତେବେଳେ ଚନ୍ଦ୍ରବାବୁ ନାଇଡୁ ଲୋକସଭା ଅଧ୍ୟକ୍ଷ ପାଇଁ ଅଡି ବସିଛନ୍ତି, ସେଇଥିରୁ ମନେ ପଡୁଛି ୨୫ ବର୍ଷ ତଳେ ବାଜେପେୟୀଙ୍କ ସରକାର ଭାଙ୍ଗିବା କଥା । ଏହାକୁ ନଜର କରି ଭାବିବାକୁ ବାଧ୍ୟ କରୁଛି ଯେ, ୨୫ ବର୍ଷ ତଳେ ଟିଡିପି ଦ୍ୱାରା କିଭଳି ବାଜପେୟୀ ସରକାର ଭାଙ୍ଗିଯାଇଥିଲା ତାହା ବୋଧେ ବିଜେପି ନେତାମାନେ ଭୁଲି ଯାଇଛନ୍ତି । ଏବେ ଯଦି ଟିଡିପି ସେହି ଖେଳ ଖେଳିବ ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପାଇଁ ବଡ ମହଙ୍ଗା ପଡିବ ।
ଲୋକସଭା ବାଚସ୍ପତି ପଦ ଟିଡିପିକୁ ଦେବା କାହିଁକି ବିପଦ, ତାହାର ଏକ ପୁରୁଣା ଇତିହାସ ରହିଛି । ୨୫ ବର୍ଷ ତଳେ ଦେଶରେ ବାଜପେୟୀଙ୍କ ନେତୃତ୍ୱରେ ଏନଡିଏ ସରକାର ଚାଲିଥିଲା । ସେହି ଶାସନକାଳ ମଧ୍ୟରେ ବିରୋଧୀ ବାଜପେୟୀଙ୍କ ବିରୋଧରେ ଅବିଶ୍ୱାସ ପ୍ରସ୍ତାବ ଆଣିଥିଲେ । ଏଣୁ ବାଜପେୟୀ ସରକାର ସଂସଦରେ ୧୯୯୯ ଏପ୍ରିଲ ୧୭ ତାରିଖରେ ଏହି ପ୍ରସ୍ତାବ ଉପରେ ବହୁମତ ପ୍ରମାଣ କରିବାକୁ ଚେଷ୍ଟା କରିଥିଲେ । ସେହି ସମୟରେ ବିଜେପିର ଚାଣକ୍ୟ କୁହାଯାଉଥିବା ପ୍ରମୋଦ ମହାଜନଙ୍କର ବିଶ୍ୱାସ ଥିଲା କି, ବାଜପେୟୀଙ୍କ ପାଖରେ ବହୁମତ ରହିଛି ଓ ସେ ସରକାର ବଂଚାଇବାରେ ସଫଳ ହେବେ । ସେତେବେଳେ ଏନଡିଏ ସରକାରରୁ ମାୟାବତୀ ଅଲଗା ହୋଇସାରିଥିଲେ । ଏହାସହ ବିଜେପି ପାଖରେ ବହୁମତ ମଧ୍ୟ ରହିଥିଲା । ହେଲେ ହଠାତ୍ ଲୋକସଭା ଅଧ୍ୟକ୍ଷ ଓଡିଶାର ସାଂସଦ ଗରିଧର ଗମାଙ୍ଗଙ୍କୁ ଭୋଟିଂ ଅଧିକାର ଦେଇଦେଇଥିଲେ ।
ଗରିଧର ଗମାଙ୍ଗ ଲୋକସଭାରେ ସାଂସଦ ଥିଲେ, ହେଲେ ଫେବୃଆରୀ ୧୭ ତାରିଖ ୧୯୯୯ ମସିହାରେ ସେ ଓଡିଶାର ମୁଖ୍ୟମନ୍ତ୍ରୀ ପଦରେ ଥିଲେ । ପ୍ରମୋଦ ମହାଜନଙ୍କ ଧାରଣା ଥିଲା କି, ଗିରିଧର ଗମାଙ୍ଗ ସାଂସଦ ପଦରୁ ଇସ୍ତଫା ଦେଇ ଓଡିଶାର ମୁଖ୍ୟମନ୍ତ୍ରୀ ହୋଇଛନ୍ତି । ହେଲେ କଂଗ୍ରେସ ମନେ ରଖିଥିଲା ଗିରିଧର ଗମାଙ୍ଗ ସାଂସଦ ପଦରୁ ଇସ୍ତଫା ଦେଇନାହାଁନ୍ତି । ହେଲେ ଯେତେବେଳେ ଗରିଧର ଗମାଙ୍ଗ ସଂସଦରେ ପହଂଚି ଭୋଟ ଦେବାକୁ ଯାଇଥିଲେ, ସେତେବେଳେ ବିଜେପି ସାଂସଦମାନେ ଗମାଙ୍ଗଙ୍କ ବିରୋଧରେ ବାଚସ୍ପତିଙ୍କ ନିକଟରେ ଅଭିଯୋଗ କରିଥିଲେ । ହେଲେ ସେତେବେଳେ ଲୋକସଭାରେ ଅଧ୍ୟକ୍ଷ ଥିବା ଟିଡିପି ସାଂସଦ ଜିଏମ ବାଲଯୋଗୀ ଗିରିଧର ଗମାଙ୍ଗଙ୍କୁ ଭୋଟ ଦେବାକୁ ଅନୁମତି ଦେଇଥିଲେ । ବାସ୍ ଗୋଟିଏ ଭୋଟ ପାଇଁ ବାଜପେୟୀଙ୍କ ସରକାର ଭାଙ୍ଗି ଯାଇଥିଲା । ଆଜିର ଦିନରେ ସେହିକଥା ମନେପକାଇଲେ, ଭବିଷ୍ୟତରେ ଟିଡିପି ପୁଣିଥରେ ମୋଦୀଙ୍କ ସହ ସେହି ଖେଳ ଖେଳିବ ନାହିଁ ତ !