କନକ ବ୍ୟୁରୋ : ଟି-୨୦ ବିଶ୍ୱକପରୁ ଟିମ୍ ଇଣ୍ଡିଆ ବିଦା ହେବା ପରେ ଦଳରେ ବଡ ଧରଣର ପରିବର୍ତ୍ତନର ଆଭାସ ମିଳିଛି । ଟି-୨୦ ବିଶ୍ୱକପ ପରେ କୋହଲି ଏହି ଫର୍ମାଟରୁ ଅଧିନାୟକ ପଦ ଛାଡିଥିବା ବେଳେ ନ୍ୟୁଜିଲାଣ୍ଡ ବିପକ୍ଷ ସିରିଜ ପାଇଁ ରୋହିତ ଶର୍ମାଙ୍କୁ ଏହି ଗୁରୁଦାୟିତ୍ୱ ଦିଆଯାଇଛି । ନ୍ୟୁଜିଲାଣ୍ଡ ବିପକ୍ଷ ସିରିଜ ପାଇଁ କୋହଲିଙ୍କୁ ବିଶ୍ରାମ ଦିଆଯାଇଥିବା ବେଳେ ରୋହିତଙ୍କୁ ଅଧିନାୟକ ନିଯୁକ୍ତ କରାଯାଇଛି । ତେବେ ଏସବୁ ଭିତରେ ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ ଖୁବଶୀଘ୍ର କୋହଲିଙ୍କ ଦିନିକିଆ ଅଧିନାୟକତ୍ୱକୁ ନେଇ ବଡ ନିଷ୍ପତ୍ତି ନେଇପାରେ ବୋର୍ଡ । ଚର୍ଚ୍ଚା ଅନୁଯାୟୀ, ୨୦୨୩ ବିଶ୍ୱକପ ପୂର୍ବରୁ ଟି-୨୦ ଓ ଦିନିକିଆ ଫର୍ମାଟରେ ଏବେ ଜଣେ ଅଧିନାୟକ ଚାହୁଁଛି ବୋର୍ଡ । ତେଣୁ କୋହଲିଙ୍କ ଅଧିନାୟକତ୍ୱକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ବିସିସିଆଇର ଜଣେ ବରିଷ୍ଠ ଅଧିକାରୀ ନିଜ ନାଁକୁ ଗୋପନ ରଖିବା ସର୍ତ୍ତରେ କହିଛନ୍ତି ଦିନିକିଆ ଅଧିନାୟକ ଭାବେ କୋହଲିଙ୍କୁ ଆଉ ସୁଯୋଗ ଦେଇନପାରେ ବୋର୍ଡ । ତେବେ କୋହଲି ଟେଷ୍ଟ ଦଳର ଅଧିନାୟକ ରହିବେ । ତେବେ ଦିନିକିଆ ଅଧିନାୟକତ୍ୱକୁ ନେଇ ବିସିସିଆଇ ପକ୍ଷରୁ କୌଣସି ସ୍ପଷ୍ଟ ସଂକେତ ମିଳିନାହିଁ । କିନ୍ତୁ ୨୦୨୩ ବିଶ୍ୱକପ ପୂର୍ବରୁ ଧଳା ବଲ ମ୍ୟାଚ୍ ପାଇଁ ଜଣେ କ୍ୟାପଟେନଙ୍କୁ ଦାୟିତ୍ୱ ଦେଇପାରେ ବୋର୍ଡ । ଅନ୍ୟପଟେ ରୋହିତଙ୍କ ସହ ରାହୁଲଙ୍କୁ ମଧ୍ୟ ଟିମ୍ ଇଣ୍ଡିଆର ମଙ୍ଗ ସମ୍ଭାଳିବା ପାଇଁ ପ୍ରସ୍ତୁତ କରୁଛି ବିସିସିଆଇ । ଯେଉଁଥିପାଇଁ ନ୍ୟୁଜିଲାଣ୍ଡ ବିପକ୍ଷ ସିରିଜ ପାଇଁ ତାଙ୍କୁ ଉପଅଧିନାୟକ ଦାୟିତ୍ୱ ଦିଆଯାଇଛି । ଯେତେବେଳେ ରୋହିତ ଶର୍ମାଙ୍କୁ ବିଶ୍ରାମ ଦିଆଯିବ ସେତେବେଳେ ଦଳର ମଙ୍ଗ ସମ୍ଭାଳିବେ ରାହୁଲ । ତେବେ ସବୁଠୁ ବଡ କଥା ହେଉଛି, ନ୍ୟୁଜିଲାଣ୍ଡ ବିପକ୍ଷ ସିରିଜ ପାଇଁ ଘୋଷଣା ହୋଇଥିବା ଟିମରେ ହାର୍ଦ୍ଦିକ ପାଣ୍ଡ୍ୟାଙ୍କୁ ସ୍ଥାନ ମିଳିନାହିଁ । ହାର୍ଦ୍ଦିକଙ୍କ ସ୍ଥାନରେ ଭେଙ୍କଟେଶ ଆୟରଙ୍କୁ ସୁଯୋଗ ଦିଆଯାଇଛି । ସେହିଭଳି ଋତୁରାଜ ଗାଏକ୍ୱାଡ ଓ ହର୍ଷଲ ପଟେଲଙ୍କୁ ମଧ୍ୟ ଟିମରେ ସାମିଲ କରାଯାଇଛି ।
ଫିଟନେସ ନଥିବା କାରଣରୁ ହାର୍ଦ୍ଦିକଙ୍କୁ ଦଳରୁ ବାଦ୍ ଦିଆଯାଇଥିବା କୁହାଯାଉଛି । ଯାହା ହାର୍ଦ୍ଦିକଙ୍କ କ୍ୟାରିୟର ପାଇଁ ବଡ ଝଟକା ଲାଗିପାରେ । କାରଣ ଘୋଷଣା ହୋଇଥିବା ଦଳରୁ ହାର୍ଦ୍ଦିକଙ୍କ ସ୍ଥାନରେ ଯଦି କେହି ଭଲ ବ୍ୟାଟିଂ କରନ୍ତି ତେବେ ପୁଣିଥରେ ଟିମକୁ କମବ୍ୟାକ୍ କରିବା ହାର୍ଦ୍ଦିକଙ୍କ ପାଇଁ ସ୍ୱପ୍ନ ପାଲଟିପାରେ । କାରଣ ଟି-୨୦ ବିଶ୍ୱକପରେ ହାର୍ଦ୍ଦିକଙ୍କ ଠାରୁ ସେଭଳି ଇନିଂସ ଦେଖିବାକୁ ମିଳିନଥିଲା ଯାହା ଚୟନକର୍ତ୍ତାଙ୍କୂୁ ପ୍ରଭାବିତ କରିବ । ଏହାଛଡା ଅଲରାଉଣ୍ଡର ଭାବେ ଟିମରେ ଚୟନ ହୋଇଥିଲେ ମଧ୍ୟ ପାକିସ୍ତାନ ବିପକ୍ଷ ଗୁରୁତ୍ୱପୂର୍ଣ୍ଣ ମ୍ୟାଚରେ ବୋଲିଂ କରିନଥିଲେ । ଯାହା ଦଳକୁ ବ୍ୟାକଫୁଟକୁ ଠେଲି ଦେଇଥିଲା । ତେଣୁ ହାର୍ଦ୍ଦିକଙ୍କୁ ଟିମକୁ ଫେରିବାକୁ ହେଲେ ଉଭୟ ବୋଲିଂ ଓ ବ୍ୟାଟିଂରେ ଦମଦାର ପ୍ରଦର୍ଶନ କରିବାକୁ ପଡିବ । ସେହିଭଳି ବିଶ୍ୱକପରେ ପ୍ରଭାବୀ ପ୍ରଦର୍ଶନ କରିପାରିନଥିବା ଭୁବନେଶ୍ୱର କୁମାରଙ୍କୁ ମଧ୍ୟ ଆଉ ଏକ ସୁଯୋଗ ଦିଆଯାଇଛି । ଯେହେତୁ ଦଳରେ କୌଣସି ଅନୁଭବୀ ବୋଲର ନାହାନ୍ତି ତେଣୁ ଭୁବନେଶ୍ୱରଙ୍କୁ ବୋଲିଂ ମଙ୍ଗ ସମ୍ଭାଳିବାକୁ ସୁଯୋଗ ଦିଆଯାଇଛି । ହୁଏତ ଏହା ଭୁବନେଶ୍ୱରଙ୍କ ପାଇଁ ଶେଷ ସୁଯୋଗ ହୋଇପାରେ । ତେଣୁ ନ୍ୟୁଜିଲାଣ୍ଡ ବିପକ୍ଷ ମ୍ୟାଚରେ ଭୁବନେଶ୍ୱରକୁ ଶ୍ରେଷ୍ଠ ପ୍ରଦର୍ଶନ କରିବାକୁ ପଡିବ ନଚେତ ଦଳରୁ ଆଉଟ ହୋଇପାରନ୍ତି ଭୁବନେଶ୍ୱର । କାରଣ ଆଗକୁ ବିଶ୍ୱକପ ରହିଛି । ତେଣୁ ଏବେଠାରୁ ଦଳର ବୋଲିଂ ବାହିନୀକୁ ଶକ୍ତିଶାଳୀ କରିବାକୁ ଚାହୁଁଛି ବୋର୍ଡ ।