କନକ ବ୍ୟୁରୋ : ବରିଷ୍ଠ ବିଜେଡି ନେତା ପ୍ରସନ୍ନ ପାଟ୍ଟଶାଣୀଙ୍କ ମୁହଁରେ ମୋଦୀଙ୍କ ପ୍ରଶଂସା । କନକ ନ୍ୟୁଜର କାର୍ଯ୍ୟକ୍ରମରେ ଭାଗ ନେଇ ପାଟ୍ଟଶାଣୀ କହିଛନ୍ତି ଯେ, ଯଦି ପ୍ରଧାନମନ୍ତ୍ରୀ ଆଲୋଚନା ପାଇଁ ଡାକିବେ, ସେ କ’ଣ ଅସ୍ୱୀକାର କରିବେ ? ସେ କହିଛନ୍ତି, ଉଭୟ ମୋଦୀ ଓ ନବୀନଙ୍କ ସହ ତାଙ୍କର ଭଲ ସମ୍ପର୍କ ରହିଛି । ନବୀନ ପଟ୍ଟନାୟକ ନମ୍ବର ୱାନ ମୁଖ୍ୟମନ୍ତ୍ରୀ ହୋଇ ଓଡ଼ିଶା ପାଇଁ ଯାହା କରିଛନ୍ତି ତାହା ଅତୁଳନୀୟ । ତେବେ ସେ ଏବେ ଦଳ ପରିବର୍ତନ କରୁ ନାହାନ୍ତି ଓ ବିଜେପି ଯିବାର ପ୍ରଶ୍ନ ଉଠୁ ନାହିଁ ବୋଲି କହିଛନ୍ତି ପାଟ୍ଟଶାଣୀ ।
Kanak News is now on WhatsApp
Join and get latest news updates delivered to you via WhatsApp
ନିକଟରେ ପାଟ୍ଟଶାଣୀଙ୍କୁ ମୋଦୀ ସରକାରଙ୍କ ପକ୍ଷରୁୁ କୌଣସି ରାଜ୍ୟର ରାଜ୍ୟପାଳ ଭାବେ ଦାୟିତ୍ୱ ଦିଆଯିବା ନେଇ ସମ୍ଭାବନା ଥିବା ଚର୍ଚ୍ଚା ହୋଇଥିଲା । କାରଣ ୨୦୧୯ ନିର୍ବାଚନ ପରଠାରୁ ଲଗାତାର ଭାବେ ବିଜେଡିରେ କୋଣଠେସା ହୋଇ ରହିଛନ୍ତି ପ୍ରସନ୍ନ । ଏପରିକି ରାଜ୍ୟସଭା ସାଂସଦ ହେବାକୁ ମନ ବଳାଇଥିଲେ ମଧ୍ୟ ଦଳ ପକ୍ଷରୁ ତାଙ୍କୁ ସେଭଳି ସୁଯୋଗ ଦିଆଯାଇନାହିଁ । ଯେଉଁଥିପାଇଁ ଦୀର୍ଘ ଦିନ ହେବ ଦଳ ଉପରେ ପାଟ୍ଟଶାଣୀ ଅସନ୍ତୁଷ୍ଟ ଥିବା କୁହାଯାଉଛି । ଏହାଛଡା ବିଭିନ୍ନ ଦଳୀୟ କାର୍ଯ୍ୟକ୍ରମରେ ମଧ୍ୟ ପାଟ୍ଟଶାଣୀଙ୍କୁ ଆଉ ଆଗଭଳି ସେତେଟା ଦେଖିବାକୁ ମିଳୁନାହିଁ । ସମୟ ବିତିବା ସହ ପାଟ୍ଟଶାଣୀଙ୍କ ରାଜନୀତି କ୍ୟାରିୟର ମଧ୍ୟ ଅନ୍ଧାର ଭିତରକୁ ଠେଲି ହେବା ଆରମ୍ଭ କରିଛି । ଆଉ ନିଜ ରାଜନୈତିକ କ୍ୟାରିୟରକୁ ବଞ୍ଚାଇବା ପାଇଁ ପାଟ୍ଟଶାଣୀ ବିଜେପି ମୁହାଁ ହେଉଥିବା ଚର୍ଚ୍ଚା ହେଉଛି ।
ବରିଷ୍ଠ ନେତା ପ୍ରସନ୍ନ ପାଟ୍ଟଶାଣୀ ପ୍ରଥମରୁ ହିଁ ବିଜେଡି ରାଜନୀତି ସହ ଜଡିତ ଅଛନ୍ତି । ଅନେକବାର ସାଂସଦ ଓ ବିଧାୟକ ହୋଇଥିବା ପାଟ୍ଟଶାଣୀଙ୍କୁ ୨୦୧୯ ନିର୍ବାଚନରେ ଦଳ ଟିକେଟ ଦେଇନଥିଲା । ସେତେବେଳେ ତାଙ୍କୁ ରାଜ୍ୟସଭା ଲଡୁ ଦିଆଯିବା ନେଇ କାଳେ ପ୍ରତିଶ୍ରୁତି ମିଳିଥିଲା । କିନ୍ତୁ ଏହା ଭିତରେ ବିଜେଡି ଅନ୍ୟ ନେତାଙ୍କୁ ରାଜ୍ୟସଭା ପଠାଇଥିଲେ ମଧ୍ୟ ପାଟ୍ଟଶାଣୀ ନିଜ ପାଳି କେବେ ଆସିବ ତାହାକୁ ଅପେକ୍ଷା କରି ରହିଛନ୍ତି ।