ଖୁବଶୀଘ୍ର ଖୋଲିବ ରତ୍ନଭଣ୍ଡାର । ପୁରୀରେ ମହାପ୍ରଭୁଙ୍କ ଗଜାନନ ବେଶ ଦର୍ଶନ ପରେ ଆଇନମନ୍ତ୍ରୀଙ୍କ ବୟାନ

କନକ ବ୍ୟୁରୋ: ଖୁବ ଶୀଘ୍ର ଖୋଲିବ ଶ୍ରୀମନ୍ଦିରର ରତ୍ନଭଣ୍ଡାର । ସ୍ନାନପୂର୍ଣ୍ଣିମାରେ ଶ୍ରୀଜିଉଙ୍କ ଗଜବେଶ ଦର୍ଶନ କରିବା ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଏହି ବଡ ବୟାନ ଦେଇଛନ୍ତି । ମୁଖ୍ୟମନ୍ତ୍ରୀ ମୋହନ ମାଝିଙ୍କ ସହ ମହାପ୍ରଭୁଙ୍କ ଗଜବେଶ ଦର୍ଶନ କରିଥିଲେ ପୃଥ୍ୱୀରାଜ ହରିଚନ୍ଦନ । ଦର୍ଶନ କରି ଫେରିବା ସମୟରେ ଗଣମାଧ୍ୟମ ପ୍ରତିନିଧି ଆଇନ ମନ୍ତ୍ରୀଙ୍କୁ ରତ୍ନଭଣ୍ଡାର ଖୋଲିବା ବାବଦରେ ପ୍ରଶ୍ନ କରିଥିଲେ ।

ଗଣମାଧ୍ୟମର ପ୍ରଶ୍ନର ଉତ୍ତର ଦେଇ ଆଇନ ମନ୍ତ୍ରୀ କହିଛନ୍ତି ରାଜ୍ୟ ସରକାର ରତ୍ନଭଣ୍ଡାର ଖୋଲିବା ନେଇ ଶୀଘ୍ର ନିଷ୍ପତି ନେଉଛନ୍ତି । ରତ୍ନଭଣ୍ଡାର ଖୋଲିବା ନେଇ ପ୍ରାରମ୍ଭିକ ଆଲୋଚନା ମଧ୍ୟ ସରିଛି । ରତ୍ନଭଣ୍ଡାର ଖୋଲିବା ତାରିଖ ଧାର୍ଯ୍ୟ ହେଲେ ଜଣେଇ ଦିଆଯିବ । ରତ୍ନଭଣ୍ଡାର ଖୋଲିବା ଦିନେ କି ଦୁଇ ଦିନର କାମ ନୁହେଁ । ପୂର୍ବଥର ରତ୍ନଭଣ୍ଡାର ଖୋଲିବା ସହ ଗଣତି ମଣତି ପାଇଁ ୭୦ ଦିନ ସମୟ ଲାଗିଥିଲା । ଏଥର ମଧ୍ୟ ଲମ୍ବା ସମୟ ଲାଗିବ । ଶୀଘ୍ର ରତ୍ନଭଣ୍ଡାର ଖୋଲିବା ପାଇଁ ରାଜ୍ୟ ସରକାର ନିଷ୍ପତ୍ତି ନେଉଛନ୍ତି ବୋଲି କହିଛନ୍ତି ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ।