ବର୍ଷେ ତଳେ ସହିଦ୍ ସ୍ୱାମୀଙ୍କୁ ବିଦାୟ ଦେଇ ପୁରା ଦେଶକୁ କନ୍ଦାଇଥିଲେ ବୀରାଙ୍ଗନା , ଆଜି ସେନାରେ ଭର୍ତ୍ତି ହେବାକୁ କରୁଛନ୍ତି ପ୍ରସ୍ତୁତି
ଗତବର୍ଷ ଆଜିର ଦିନରେ ଭାରତମାତାର ଜଣେ ବୀର ସନ୍ତାନ ବୀରଗତି ପ୍ରାପ୍ତ କରିଥିଲେ । ଏହାଠାରୁ ଅଧିକ ଦୁଃଖଦାୟକ ଥିଲା ତାଙ୍କ ସାହସୀ ପତ୍ନୀଙ୍କ ବକ୍ତବ୍ୟ । ମନରେ ବେଦନାର ପାହାଡ , ଆଖିରେ ଅଶ୍ରୁର ଜୁଆର ଥାଇ ବି ସେ ସ୍ୱାମୀଙ୍କୁ ସଲାମ୍ କରି ଆଇ ଲଭ୍ ୟୁ କହି ବିଦାୟ ଦେଇଥିଲେ । ବର୍ଷେ ତଳେ ଆଜିର ଦିନରେ ହିଁ ଆତଙ୍କବାଦୀଙ୍କ ସହ ଲଢେଇ କରୁ କରୁ ଦେଶ ପାଇଁ ଜୀବନ ଦେଇଥିଲେ ମେଜର୍ ବିଭୁତି ଶଙ୍କର ଢୋଣ୍ଡିିୱାଲ୍ ।
Kanak News is now on WhatsApp
Join and get latest news updates delivered to you via WhatsApp
ଶେଷ ବିଦାୟ ସମୟରେ ତାଙ୍କ ପତ୍ନୀ ନିକିତା କୌଲଙ୍କ ବକ୍ତବ୍ୟ ସେତେବେଳେ ସାରା ଦେଶର ଆଖିରେ ଲୁହ ଆଣିଦେଇଥିଲା । ବିବାହର ମାତ୍ର ୧୦ ମାସ ଭିତରେ ସ୍ୱାମୀଙ୍କୁ ହରାଇବା କେତେ କଷ୍ଟ ତାହା ସେହି ଗୋଟିଏ ଭିଡିଓରୁ ଜଣାପଡିଥିଲା ଯେଉଁଥିରେ ବୀର ଯବାନଙ୍କ ବୀର ପତ୍ନୀ କହୁଥିଲେ , “ତୁମକୁ ସଲାମ୍ ବିଭୁ , ଘର କଥା ନିଜ କଥା ତୁମେ ଚିନ୍ତା ନକରି ଦେଶ ପାଇଁ ଜୀବନକୁ ସମର୍ପର୍ଣ କଲ । ତୁମର ଏହି ବଳିଦାନ ପାଇଁ ମୁଁ ଗର୍ବିତ , ଆଇ ଲଭ୍ ୟୁ ।”
ତେବେ ବର୍ଷେ ପରେ କିଭଳି ରହିଛି ନିକିତାଙ୍କ ଜୀବନ । ସ୍ୱାମୀଙ୍କୁ ହରାଇ ସାହସୀ ସ୍ତ୍ରୀ କ’ଣ କେବେ ଚୁପ୍ ବସିପାରେ । ପ୍ରତିଶୋଧ ନେବା ପାଇଁ ପ୍ରସ୍ତୁତି କରୁଛନ୍ତି ସହିଦ୍ ମେଜର୍ ବିଭୁତି ଶଙ୍କର ଢୋଡିୟାଲଙ୍କ ପତ୍ନୀ ନିକିତା । ସେନାରେ ଯୋଗ ଦେବାକୁ ଘରୁ ଗୋଡ଼ କାଢିବେ ନିକିତା । ସ୍ୱାମୀଙ୍କ ବଳିଦାନକୁ ବ୍ୟର୍ଥ ହେବାକୁ ଦେବେନାହିଁ ।
ଏଥିପାଇଁ ସବୁ ପରୀକ୍ଷା ଏବଂ ସାକ୍ଷାତକାରରେ ପାସ୍ କରି କେବଳ ମ୍ୟାରିଟ୍ ତାଲିକାକୁ ଚାହିଁରହିଛନ୍ତି ଏହି ସାହସୀ ମହିଳା । ଫେବୃୟାରୀ ୧୮ , ୨୦୧୯ ପୁଲୱାମାର ପିଙ୍ଗଲିନା ଗାଁରେ ଆତଙ୍କୀଙ୍କ ସହ ଏନକାଉଣ୍ଟର ସମୟରେ ସହିଦ୍ ହୋଇଥିଲେ ମେଜର୍ ବିଭୁତି ଢୋଡିୟାଲ । ସହିଦ୍ ମେଜର୍ ବିଭୁତି ଢୋଡିୟାଲଙ୍କୁ ମରଣୋପରାନ୍ତ ସୋର୍ଯ୍ୟ ଚକ୍ରରେ ସମ୍ମାନିତ କରାଯାଇଥିଲା ।
