କାହିଁକି ଅଫିସରଙ୍କ ଉପରେ ରାଗିଥିଲେ କେନ୍ଦ୍ରମନ୍ତ୍ରୀ? ପଢନ୍ତୁ, କ’ଣ କହିଲେ ବିଶ୍ୱେଶ୍ୱର ଟୁଡୁ…
କନକ ବ୍ୟୁରୋ: ଅଫିସରଙ୍କୁ ଟାର୍ଗେଟ କରି ବିବାଦରେ ଥିବା କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ ଏବେ ମୁହଁ ଖୋଲିଛନ୍ତି । କାହିଁକି ଅଫିସରଙ୍କ ଉପରେ ସେ ରାଗିଥିଲେ, ସେନେଇ ନିଜେ କହିଛନ୍ତି ମନ୍ତ୍ରୀ । ଜଣେ କେନ୍ଦ୍ରମନ୍ତ୍ରୀ ହୋଇଥିବା ସତ୍ତ୍ୱେ ଅଫିସର ଓ ଜିଲ୍ଲା ପ୍ରଶାସନ ପ୍ରୋଟକଲ ମାନୁନାହାଁନ୍ତି ବୋଲି ସେ ଅଭିଯୋଗ ଆଣିଛନ୍ତି । ଆଉ ତା ସହିତ ଜିଲ୍ଲପାଳ ଓ ଅନ୍ୟ ଅଧିକାରୀ ବିଜେଡିର କର୍ମୀଭାବେ କାମ କରୁଛନ୍ତି ବୋଲି ସେ ଅଭିଯୋଗ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏସବୁ ଭିତରେ ବାରିପଦା ସର୍କିଟ ହାଉସର ଏକ ଘଟଣା, କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁଙ୍କ କ୍ରୋଧର ପ୍ରମୁଖ କାରଣ ବୋଲି କୁହାଯାଉଛି । ଏକଥା ନିଜେ କହିଛନ୍ତି କେନ୍ଦ୍ରମନ୍ତ୍ରୀ । ଏଠାରେ ମନ୍ତ୍ରୀଙ୍କ ରହିବା ନେଇ ଦିଲ୍ଲୀରୁ ସୂଚନା ଦିଆଯାଇଥିଲା କିନ୍ତୁ ଅଫିସରମାନେ ମନ୍ତ୍ରୀଙ୍କ ପାଇଁ କେବଳ ଗୋଟିଏ ସାଧାରଣ ରୁମ୍ ରଖିଥିଲେ । ପରେ ତାଗିଦ କରିବାରୁ ତିନିଟି ରୁମ ରଖାଗଲା । ତେବେ ମନ୍ତ୍ରୀଙ୍କ କହିବା ଅନୁସାରେ ତାଙ୍କ ପାଇଁ ଭିଆଇପି ରୁମଟି ରଖାଗଲା ନାହିଁ । ଏହି ରୁମ ରାଜ୍ୟ ଏସସିଏସଟି ନିର୍ଦ୍ଦେଶିକା ପୁନମ ଗୁହାଙ୍କ ପାଇଁ ରଖାଯାଇଥିଲା । କେନ୍ଦ୍ରମନ୍ତ୍ରୀଙ୍କ ଆସିବା ନେଇ ପୂର୍ବରୁ ସୂଚନା ଥିବା ସତ୍ତ୍ୱେ କାହିଁକି ଏଭଳି କରାହେଲା, ତାହା ବୁଝାପଡ଼ୁନାହିଁ ।
ତେବେ କେନ୍ଦ୍ର ଆଦିବାସୀ ମନ୍ତ୍ରାଳୟର ଦାୟିତ୍ୱରେ ଥିବା ବିଶ୍ୱେଶ୍ୱରଙ୍କୁ ଜିଲ୍ଲାର ସରକାରୀ ବାବୁମାନେ କାହିଁକି ଅଣଦେଖା କଲେ, ତାର କାରଣ ମଧ୍ୟ ନିଜେ ମନ୍ତ୍ରୀ କହିଛନ୍ତି । କେନ୍ଦ୍ରମନ୍ତ୍ରୀ ସେମାନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନେଇପାରିବେ ନାହିଁ ବୋଲି ଏଭଳି ଅଣଦେଖା କରାଯାଇଥିବା ସେ ଅଭିଯୋଗ କରିଛନ୍ତି । ବାରିପଦା ସର୍କିଟ ହାଉସର ଏହି ଘଟଣାକୁ ନେଇ ସର୍କିଟ ହାଉସ ଦାୟିତ୍ୱରେ ଥିବା ମୟୁରଭଞ୍ଜ ଏଡିଏମ ରୁଦ୍ରନାରାୟଣ ମହାନ୍ତିଙ୍କ ସହ ଏନେଇ କଥା ହୋଇଥଲେ କନକ ନ୍ୟୁଜର ପ୍ରତିନିଧି । ସେ କହିଥିଲେ, ମନ୍ତ୍ରୀଙ୍କ ରୁମ ରିଜରଭେସନ୍ ପାଇଁ ନିର୍ଦ୍ଦିଷ୍ଟ ରୁମ ନମ୍ବର ଉଲ୍ଲେଖ ହୋଇ ନ ଥିଲା । ତେଣୁ ପ୍ରଶ୍ନ ଉଠୁଛି, ଏଡିଏମଙ୍କ ଯୁକ୍ତି କେତେ ଗ୍ରହଣଯୋଗ୍ୟ ।
କେନ୍ଦ୍ରମନ୍ତ୍ରୀଙ୍କୁ ଅଫିସରମାନେ କିଭଳି ଅଣଦେଖା କରନ୍ତି, ସେହି ଚିତ୍ର ଦେଖିବାକୁ ମିଳିଥିଲା ଚମ୍ପୁଆ ଓ କୁଚିଣ୍ଡାରେ । କେନ୍ଦ୍ରମନ୍ତ୍ରୀ ସମୀକ୍ଷା ପାଇଁ ଆସିଥିଲେ, ହେଲେ ଜିଲ୍ଲାପାଳ କିମ୍ବା ବରିଷ୍ଠ ଅଧିକାରୀ ବୈଠକରେ ଉପସ୍ଥିତ ରହି ନ ଥିଲେ । ତଳସ୍ତରର ଅଫିସରମାନେ ଯୋଗ ଦେଇଥିଲେ । ତେଣୁ ଆଶ୍ଚର୍ଯ୍ୟ ଲାଗୁଛି, ମୋଦୀଙ୍କ ମନ୍ତ୍ରୀ କ’ଣ ଏତେ ଅସହାୟ? ଜିଲ୍ଲାର ସାଧାରଣ ସରକାରୀ ବାବୁମାନେ ବି ତାଙ୍କୁ ଏଭଳି ଅଣଦେଖା କରିବାକୁ ସାହସ କରୁଛନ୍ତି କିପରି…