କୁନି ପିଲାଙ୍କୁ କାହିଁକି ଦିଆଯାଉଛି ଏତେ ହୋମୱାର୍କ ? ମୋଦିଙ୍କ ନିକଟରେ ଅଭିଯୋଗ କଲେ କୁନି ଝିଅ, ସୋସିଆଲ୍ ମିଡିଆରେ ଭାଇରାଲ ହେଲା ଭିଡିଓ ।
କନକ ବ୍ୟୁରୋ : ପ୍ରଧାନମନ୍ତ୍ରୀଙ୍କୁ କୁନି ଝିଅର ପ୍ରଶ୍ନ…କାହିଁକି ଦିଆଯାଉଛି ଏତେ ହୋମୱାର୍କ ? ‘ପ୍ରିୟର ପ୍ରଧାନମନ୍ତ୍ରୀ, ମୋଦି ସାହେବ…ମୁଁ ଜାମ୍ମୁକାଶ୍ମୀରର ଜଣେ ୬ ବର୍ଷର ଝିଅ । ଆମ ସ୍କୁଲରେ ଯେଉଁ ହୋମୱାର୍କ ଦିଆଯାଉଛି, ତାକୁ ନେଇ ମୁଁ ଜମା ବି ଖୁସି ନାହିଁ । ମୁଁ ସକାଳ ୧୦ଟା ପୂର୍ବରୁ ଉଠେ, ୨ଟା ପର୍ଯ୍ୟନ୍ତ କ୍ଲାସ ଚାଲିଥାଏ । ପ୍ରଥମେ ଇଂରାଜୀ, ତାପରେ ଗଣିତ ଏବଂ ପରେ କମ୍ପ୍ୟୁଟର । ହୋମୱାର୍କ ଏତେ ଦିଆଯାଉଛି, ପଚାରନ୍ତୁ ନାହିଁ । ଛୋଟ ପିଲାମାନଙ୍କୁ ବଡ ପିଲାଙ୍କ ଭଳି ଏତେ କାମ କାହିଁକି ଦିଆଯାଏ ?’
Kanak News is now on WhatsApp
Join and get latest news updates delivered to you via WhatsApp
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭିଡିଓ ବାର୍ତା ଜରିଆରେ କିଛି ଏଭଳି ମନର କଥା ଶୁଣାଇଛି ଜଣେ କୁନି ଝିଅଟିଏ । ଜାମ୍ମୁକାଶ୍ମୀରର ଏହି ଝିଅର ଅଭିଯୋଗର ଭିଡିଓ ଏବେ ସୋସିଆଲ୍ ମିଡିଆରେ ଚର୍ଚ୍ଚା ସାଉଁଟିଛି । କୁନି ଝିଅଟି ଅତି ନୀରିହ ଢଙ୍ଗରେ ତାଙ୍କ ଶିକ୍ଷକଙ୍କ ବିଷୟରେ ପ୍ରଧାନମନ୍ତ୍ରୀଙ୍କ ନିକଟରେ ଅଭିଯୋଗ କରୁଛି ।
କୁନି ଝିଅଟି କହୁଛି ଯେ, ମ୍ୟାଡାମ୍ ବହୁତ ହୋମୱାର୍କ ଦେଉଛନ୍ତି, ଏବଂ ଲମ୍ବା ସମୟ ଧରି କ୍ଲାସ ଚାଲୁଛି, ଏତେ ଚାପ କୁନି ଛୁଆଟି କେମିତି ସହିବ । ତେବେ କୁନି ଝିଅର ଅଭିଯୋଗର ଏହି ଭିଡିଓକୁ ଜାମ୍ମୁକାଶ୍ମୀରର ଏଲଜି ତଥା ଉପରାଜ୍ୟପାଳ ମନୋଜ ସିହ୍ନା ଗୁରୁତର ସହ ନେଇଛନ୍ତି । ଆଉ ଛୋଟ ପିଲାଙ୍କ ହୋମୱାର୍କ ନେଇ ଏକ ନିୟମ ଆଣିବାକୁ ସେ ଜାମ୍ମୁକାଶ୍ମୀର ଶିକ୍ଷା ବିଭାଗକୁ ନିର୍ଦ୍ଦେଶ ଦେଇଛନ୍ତି ।
ତେବେ ପିଲାଟିର ଏଭଳି ମନର କଥା ଶୁଣି ଉପରାଜ୍ୟପାଳ କହିଛନ୍ତି, ଏହା ଅତ୍ୟନ୍ତ ମଧୁର ଅଭିଯୋଗ । ତେବେ କିପରି ଭାବେ ଛୋଟ ପିଲାଙ୍କ ଉପରେ ହୋମୱାର୍କର ଭାର ହ୍ରାସ କରାଯିବ, ସେଦିଗରେ ନୂଆ ଶିକ୍ଷାନୀତି ଆଣିବାକୁ ସେ ଶିକ୍ଷା ବିଭାଗକୁ କହିଛନ୍ତି ।
କରୋନା ମହାମାରୀ ସହ ସାରା ଦେଶ ଲଢୁଥିବା ବେଳେ, ଛୋଟ ପିଲାଙ୍କୁ ସଂକ୍ରମଣରୁ ରକ୍ଷା କରିବା ପାଇଁ ସ୍କୁଲଗୁଡିକୁ ବନ୍ଦ ରଖାଯାଇଛି । ତେବେ ପାଠପଢାରେ ଯେମିତି କୌଣସି ପ୍ରଭାବ ନପଡେ, ସେଥିପାଇଁ ଅନଲାଇନ୍ କ୍ଲାସ୍ ଜାରି ରହିଛି । ପିଲାମାନଙ୍କୁ ସକାଳଠାରୁ ଅପରାହ୍ନ ଯାଏଁ ଅନଲାଇନ୍ କ୍ଲାସ କରିବାକୁ ପଡୁଛି । ଆଉ ଏହାରି ଭିତରେ ଜାମ୍ମୁକାଶ୍ମୀରର ଏହି କୁନି ଝିଅଟିର ଭିଡିଓ ସୋସିଆଲ୍ ମିଡିଆରେ ବେଶ୍ ଚର୍ଚ୍ଚା ସାଉଁଟିଛି ।