କନକ ବ୍ୟୁରୋ: ବହୁ ଦିନ ଧରି ଯାହାକୁ ସମସ୍ତଙ୍କର ଅପେକ୍ଷା ଥିଲା ଏବେ ସେହି ଦିନ ଆସିସାରିଛି । ଆଜିଠୁ ଆରମ୍ଭ ହେବାକୁ ଯାଉଛି କ୍ରିକେଟର ମହାକୁମ୍ଭ ଦିନିକିଆ ବିଶ୍ୱକପ୍ । ଅହମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଆଜି ମୁହାଁମୁହିଁ ହେବାକୁ ଯାଉଛନ୍ତି ନ୍ୟୁଜିଲାଣ୍ଡ ଏବଂ ଇଂଲଣ୍ଡ । ତେବେ ଏହା ପୂର୍ବରୁ ସୋସିଆଲ୍ ମିଡିଆଠୁ ଆରମ୍ଭ କରି ସବୁଠୁ ଗୋଟିଏ କଥା ଚର୍ଚ୍ଚାରେ ରହିଛି । ଏଥର ବିଶ୍ୱକପ୍ ମ୍ୟାଚ୍ ପୂର୍ବରୁ କାହିଁକି ହେଲାନି ଓପନିଂ ସେରେମନି?

Advertisment

ବିଶ୍ୱକପ୍ ଆରମ୍ଭ ହେବାର ଗୋଟିଏ ଦିନ ପୂର୍ବରୁ ଓପନିଂ ସେରେମନୀ ଦେଖିବାକୁ ମିଳିଥାଏ । ୨୦୧୧ ବିଶ୍ୱକପରେ ମଧ୍ୟ ସେହି ସମାନ ଧାରା ଦେଖିବାକୁ ମିଳିଥିଲା । ଓପନିଂ ସେରେମନୀ ଉତ୍ସବରେ ଏକାଠି ହେଇଥିଲେ ସବୁ ଟିମର କ୍ୟାପଟେନ୍ । ହେଲେ ଏଥର କିନ୍ତୁ ବିଶ୍ୱକପ୍ ମ୍ୟାଚ୍ ଆରମ୍ଭ ହେବା ପୂର୍ବରୁ ଓପନିଂ ସେରେମନୀର ଆୟୋଜନ କରାଯାଇନି । ଯାହାକୁ ନେଇ ଅନେକ ପ୍ରଶ୍ନ ଠିଆ ହେଇଛି ।

ମିଳିଥିବା ସୂଚନା ମୁତାବକ, ବିସିସିଆଇ ବିଶ୍ୱକପ୍ ଓପନିଂ ସେରେମନୀ କରିିବାକୁ ଏଥର ଆଦୌ ପ୍ଲାନ୍ କରିନଥିଲା । ହେଲେ ଗଣମାଧ୍ୟମରେ କିନ୍ତୁ ଏନେଇ ଖବର ପ୍ରକାଶ ପାଇଥିଲା । ଆଉ ବୋର୍ଡକୁ ଏ ସମ୍ପର୍କରେ ପଚରାଯିବାରୁ ବୋର୍ଡ ଏ କଥାକୁ ସିଧା ସିଧା ମନା କରିଦେଇଥିଲା । ଯାହା ପରେ ଏଥର ବିଶ୍ୱକପରେ ଓପନିଂ ସେରେମନୀର ଆୟୋଜନ ହେବ ନାହିଁ ବୋଲି ପକ୍କା ହେଇଥିଲା ।

ସୂଚନାଯୋଗ୍ୟ ଯେ, ୨୦୧୧ ପରେ ଭାରତ ଏକାକି ଭାବେ ଆୟୋଜନ କରୁଛି ଦିନିକିଆ ବିଶ୍ୱକପ୍ । ୪୬ ଦିନ ଧରି ଚାଲିବାକୁ ଥିବା ଏହି ଟୁର୍ଣ୍ଣାମେଣ୍ଟରେ ମୋଟ ୪୮ଟି ମ୍ୟାଚ୍ ଖେଳାଯିବ । ବିଶ୍ୱର ୧୦ଟି ବଡ ବଡ ଦେଶ ଏଥର ବିଶ୍ୱକପରେ ଭାଗ ନେଉଛନ୍ତି । ତେଣୁ ଏଥର ବିଶ୍ୱକପରେ କଡା ଟକ୍କର ଦେଖିବାକୁ ମିଳିପାରେ ।