କନକ ବ୍ୟୁରୋ : ବିହାର ମୁଖ୍ୟମନ୍ତ୍ରୀ ପଦରୁ ନୀତିଶ କୁମାର ଇସ୍ତଫା ଦେବା ପରେ ଜେଡିୟୁ-ଆରଜେଡି-କଂଗ୍ରେସ ମେଣ୍ଟ ସରକାର ଭାଙ୍ଗିଛି । ବିଜେପି ସହ ମିଶି ଜେଡିୟୁ ପୁଣିଥରେ ସରକାର ଗଠନ କରିବାକୁ ଯାଉଛି । ସନ୍ଧ୍ୟା ୫ଟାରେ ନୀତିଶ ପୁଣିଥରେ ମୁଖ୍ୟମନ୍ତ୍ରୀ ଶପଥ ନେବେ । ନୀତିଶଙ୍କ ସମେତ ୨ ଉପ-ମୁଖ୍ୟମନ୍ତ୍ରୀ ଓ ୬ ଜଣ କ୍ୟାବିନେଟ ମନ୍ତ୍ରୀ ମଧ୍ୟ ଶପଥ ନେବେ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ପରେ ନୀତିଶ କହିଛନ୍ତି, ଦଳ ଭିତରେ ଆଲୋଚନା ପରେ ଏଭଳି ନିଷ୍ପତ୍ତି ନିଆଯାଇଛି । ମେଣ୍ଟ ସରକାରର ସମସ୍ତ କାମର ଶ୍ରେୟ ଆରଜେଡି ନେଉଥିଲା । ମୁଁ କାମ କରିବାକୁ ଚାହୁଁଥିଲି, କିନ୍ତୁ ମୋତେ କାମ କରିବାକୁ ଦିଆଯାଉନଥିଲା । ମେଣ୍ଟ ସରକାରରେ ବହୁତ ଅସୁବିଧା ହେଉଥିଲା । ଦେଢ ବର୍ଷ ପୂର୍ବରୁ ହୋଇଥିବା ମେଣ୍ଟ ରେ ସ୍ଥିତି ସବୁକିଛି ଠିକ୍ ନଥିଲା । ନୂଆ ଗଠବନ୍ଧନକୁ ନେଇ ଲୋକ ଖରାପ ଭାବୁଥିଲେ । ମୁଁ ବହୁତ କିଛି କହିବାକୁ ଚାହୁଁଥିଲି କିନ୍ତୁ କହିପାରୁନଥିଲି । ମହାମେଣ୍ଟରୁ ଦଳ ଓହରି ଯାଇଛି ଏବଂ ମହାମେଣ୍ଟରେ କିଛି କାମ ହେଉନଥିବାରୁ ଦୁଃଖିତ ବୋଲି କହିଛନ୍ତି ନୀତୀଶ ।
ନୀତିଶ ମୁଖ୍ୟମନ୍ତ୍ରୀ ଭାବେ ଶପଥ ନେବାକୁ ଥିବା ବେଳେ ସମ୍ରାଟ ଚୌଧୁରୀ ଓ ବିଜୟ ସିହ୍ନା ଉପମୁଖ୍ୟମନ୍ତ୍ରୀ ହେବେ । ଏହାସହ ସମ୍ରାଟ ଚୌଧୁରୀ ବିଜେପି ବିଧାୟକ ଦଳ ନେତା ନିର୍ବାଚିତ ହୋଇଥିବା ବେଳେ ବିଜୟ ସିହ୍ନା ବିଜେପି ବିଧାୟକ ଦଳ ଉପନେତା ନିର୍ବାଚିତ ହୋଇଛନ୍ତି ।