ଓଡିଶାରେ କାହିଁକି ସମ୍ଭବପର ହୋଇପାରୁନି ମେଟ୍ରୋ ଟ୍ରେନ ସେବା । ଭୁବନେଶ୍ୱରରେ କେବେ ଚାଲିବ ମେଟ୍ରୋ ଟ୍ରେନ । ପଢନ୍ତୁ, ଏହି ରିପୋର୍ଟ
କନକ ବ୍ୟୁରୋ: କଟକ ଭୁବନେଶ୍ୱର ମେଟ୍ରୋଟ୍ରେନର ଆଶା ମଉଳି ଯାଇଛି । ଭୁବନେଶ୍ୱରରେ ମେଟ୍ରୋ ଟ୍ରେନ ନେଇ କେନ୍ଦ୍ର ସରକାର ସ୍ପଷ୍ଟ କରିଛନ୍ତି ଯେ ରାଜ୍ୟର କୌଣସି ପ୍ରସ୍ତାବ କେନ୍ଦ୍ର ପାଖରେ ନାହିଁ । କିନ୍ତୁ ୨୦୧୪ ମସିହାରୁ ମେଟ୍ରୋ ଟ୍ରେନ ପାଇଁ ଅନେକ ପୁଳାପୁଳା ପ୍ରତିଶ୍ରୁତି ଦେଇଆସିଛନ୍ତି ରାଜ୍ୟ ସରକାର । ହେଲେ କାହିଁକି ଓଡିଶାରେ ସମ୍ଭବପର ହୋଇପାରୁନି ମେଟ୍ରୋ ଟ୍ରେନ ସେବା?
Kanak News is now on WhatsApp
Join and get latest news updates delivered to you via WhatsApp
ଟ୍ୱିନ ସିଟିରେ ମେଟ୍ରୋ ଟ୍ରେନକୁ ନେଇ ବୈଠକ ପରେ ବୈଠକ ବସିଛି ଆଉ ଅନେକ ପ୍ରତିଶ୍ରୁତି ମଧ୍ୟ ମିଳିଛି । କିନ୍ତୁ ଏହି ସବୁ ଭିତରେ ଓଡିଶାବାସୀଙ୍କୁ ଲାଗିଛି ଏକ ଶକ୍ତ ଝଟକା । ଓଡିଶାରେ ମେଟ୍ରୋଟ୍ରେନ ନେଇ କୌଣସି ପ୍ରସ୍ତାବ କେନ୍ଦ୍ର ପାଖରେ ନାହିଁ ବୋଲି କହିଛନ୍ତି କେନ୍ଦ୍ର ଗୃହ ନିର୍ମାଣ ଓ ନଗରାଂଚଳ ବ୍ୟାପାର ମନ୍ତ୍ରୀ ହରଦୀପ ସିଂ ପୁରୀ । ଗତ ୧୦ତାରିଖରେ ବିଜେପିର ରାଜ୍ୟସଭା ସାଂସଦ ଅଶ୍ୱିନୀ ବୈଷ୍ଣବ ଓଡିଶାରେ ମେଟ୍ରୋ ରେଳ ନେଟୱାର୍କ ପାଇଁ କୌଣସି ଯୋଜନା ଅଛି କି ବୋଲି ପ୍ରଶ୍ନ ରଖିଥିଲେ । ପଚାରିଥିବା ପ୍ରଶ୍ନର ଉତ୍ତରରେ ବିଭାଗୀୟ ମନ୍ତ୍ରୀ କହିଥିଲେ ମେଟ୍ରୋ ଟ୍ରେନ ରାଜ୍ୟ ସରକାରଙ୍କ ଦାୟିତ୍ୱ । ରାଜ୍ୟ ସରକାର ପ୍ରସ୍ତାବ ରଖିଲେ କେନ୍ଦ୍ର ସରକାର ଏଥିପାଇଁ ଆର୍ଥିକ ସହାୟତା ଯୋଗାଇଦେବେ । କିନ୍ତୁ ଓଡିଶା ପକ୍ଷରୁ କୌଣସି ପ୍ରସ୍ତାବ ଆସିନାହିଁ ବୋଲି କହିଥିଲେ ।
ଏସବୁ ଭିତରେ ଭୁବନେଶ୍ୱର- କଟକ ମେଟ୍ରୋ ଟ୍ରେନ ଚଳାଚଳ ପାଇଁ ରାଜ୍ୟ ସରକାର ଓ କେନ୍ଦ୍ର ସରକାର ରଖିଆସିଥିବା ପ୍ରତିଶ୍ରୁତି ଉପରେ ଟିକେ ନଜର ପକାନ୍ତୁ…
ଅଗଷ୍ଟ ୨୩, ୨୦୧୪
ସ୍ଥାନ: ସଚିବାଳୟ
ହାଇଦ୍ରାବାଦର ବାଲାଜୀ ରେଳରୋଡ ସିଷ୍ଟମ ଲିମିଟେଡ ସହ ରାଜ୍ୟ ସରକାରଙ୍କ ନଗର ଉନ୍ନୟନ ବିଭାଗର ହୋଇଥିଲା ଏମଓୟୁ ସ୍ୱାକ୍ଷର । ଏନେଇ କଟକ ଭୁବନେଶ୍ୱର ୩୦କିମି ମେଟ୍ରୋ ରେଳ ପାଇଁ ଡିଟେଲ ପ୍ରୋଜେକ୍ଟ ରିପୋର୍ଟ ପ୍ରସ୍ତୁତ ହୋଇଥିଲା । ୫ବର୍ଷ ଭିତରେ କାମ ସାରିବାପାଇଁ ଲକ୍ଷ୍ୟ ରଖାଯାଇଥଲା ।
ଏପ୍ରିଲ ୭, ୨୦୧୯
ବିଜେପିର ପୂର୍ବତନ ରାଷ୍ଟ୍ରୀୟ ଅଧ୍ୟକ୍ଷ ତଥା ବର୍ତମାନର ଗୃହମନ୍ତ୍ରୀ ଅମିତ ଶାହ କଟକ ଭୁବନେଶ୍ୱର ମେଟ୍ରୋ ପାଇଁ ମଧ୍ୟ ପ୍ରତିଶ୍ରୁତି ଦେଇଥିଲେ ।
ଏପ୍ରିଲ ୨୧, ୨୦୧୯
ବିଜେଡିର ଥିଲା ଇସ୍ତାହାର, ୨୦୧୯ ରେ ସରକାରକୁ ଆସିଲେ କଟକ ଭୁବନେଶ୍ୱରରେ ହେବ ଟ୍ୱିନସିଟି ମେଟ୍ରୋ ସେବା ।
ଜୁନ ୨୫, ୨୦୧୯
ସ୍ଥାନ: ବିଧାନସଭା
ରାଜ୍ୟ ସରକାରଙ୍କ ସଫଳତାର ବାର୍ତା କହି ଖୁବଶୀଘ୍ର କଟକରୁ ଭୁବନେଶ୍ୱର ମେଟ୍ରୋ ଟ୍ରେନ ଚାଲିବ ବୋଲି କହିଥିଲେ ରାଜ୍ୟପାଳ ପ୍ରଫେସର ଗଣେଶୀ ଲାଲ ।
ଏତେ ସବୁ ପ୍ରତିଶ୍ରୁତି ଭିତରେ ବିତିଲାଣି ୭ବର୍ଷ, କିନ୍ତୁ ସ୍ୱପ୍ନରେ ରହିଯାଇଛି ରାଜ୍ୟର ପ୍ରଥମ ମେଟ୍ରୋ ଟ୍ରେନ । ଭୁବନେଶ୍ୱରରେ ଜନସଂଖ୍ୟା ଧୀରେଧୀରେ ବଢିବାରେ ଲାଗିଛି । ତା ସହିତ ଯାତାୟତରେ ଟ୍ରାଫିକ ଭଳି ମଧ୍ୟ ଅନେକ ସମସ୍ୟା ଉପୁଜୁଛି । ଇନ୍ଦୋର, ହାଇଦ୍ରାବାଦ, କୋଚି, କାନପୁର, କୋଲକାତା, ପାଟଣା ଭଳି ସହରରେ ମେଟ୍ରୋ ବ୍ୟବସ୍ଥା ହୋଇପାରୁଛି । କିନ୍ତୁ ଦେଶର ଏକ ନମ୍ବର ସ୍ମାର୍ଟସିଟି କୁହାଯାଉଥିବା ଭୁବନେଶ୍ୱରରେ କାହିଁକି ମେଟ୍ରୋ ଟ୍ରେନ ସମ୍ଭବପର ହୋଇପାରୁନିି ନା ଏଥିରେ ସରକାରଙ୍କ ଆନ୍ତରିକତା ଅଭାବ ରହୁଛି, ତାହା ସବୁଠୁ ବଡ ପ୍ରଶ୍ନ ।