କନକ ବ୍ୟୁରୋ: ମଙ୍ଗଳବାର ଦେଶର ଚର୍ଚ୍ଚିତ ଯୁବ ନେତା ତଥା ଜେଏନୟୁର ପୂର୍ବତନ ଛାତ୍ର ସଭାପତି କହ୍ନେୟା କୁମାର କଂଗ୍ରେସରେ ସାମିଲ ହୋଇଛନ୍ତି । ରାହୁଲ ଗାନ୍ଧୀଙ୍କ ଉପସ୍ଥିତିରେ କହ୍ନେୟା ଓ ଗୁଜରାଟର ସ୍ୱାଧୀନ ବିଧାୟକ ଜିଗ୍ନେଶ ମୱାନୀ ହାତ ଧରିଛନ୍ତି । ଆଉ ଦଳରେ ସାମିଲ ହେବା ପରେ କହ୍ନେୟା କାହିଁକି କଂଗ୍ରେସରେ ସାମିଲ ହୋଇଛନ୍ତି ସେ ନେଇ ସ୍ପଷ୍ଟ ଉତ୍ତର ରଖିଛନ୍ତି ।
କହ୍ନେୟା କହିଛନ୍ତି, ତାଙ୍କୁ ଲାଗୁଛି ଏ ଦେଶରେ କିଛି ଲୋକ କେବଳ ଲୋକ ନୁହଁନ୍ତି, ସେମାନେ ଏକ ଚିନ୍ତାଧାରା । ସେମାନେ ଦେଶର ପରମ୍ପରା, ସଂସ୍କୃତି, ଇତିହାସ, ମୂଲ୍ୟବୋଧ, ବର୍ତ୍ତମାନ ଓ ଭବିଷ୍ୟତକୁ ଖରାବ କରିବାକୁ ଚେଷ୍ଟା କରୁଛନ୍ତି । ଏଥିସହ ଯଦି ଏପରି ପରିସ୍ଥିତିରେ କଂଗ୍ରେସ ବଞ୍ଚି ରହିବନି ତେବେ ଦେଶ ବଞ୍ଚି ରହିବନି ବୋଲି କହିଛନ୍ତି ଯୁବ ନେତା କହ୍ନେୟା କୁମାର ।
Kanak News is now on WhatsApp
Join and get latest news updates delivered to you via WhatsApp
ଏଥିସହ ସେ ଆହୁରି ମଧ୍ୟ କହିଛନ୍ତି ଯେ, ପ୍ରଧାନମନ୍ତ୍ରୀ ଏବେ ଅଛନ୍ତି, ଆଗରୁ ଥିଲେ ଏବଂ ଆଗକୁ ମଧ୍ୟ ରହିବେ । ହେଲେ ଏବେ ସବୁଠାରୁ ବଡ ବିରୋଧୀ ଦଳକୁ ଯଦି ଜୀବିତ ନରଖାଯିବ ତେବେ ଦେଶ ମଧ୍ୟ ବଞ୍ଚିରହିବନି । ବଡ ଜାହାଜ ଯଦି ବଞ୍ଚିନରୁହେ ତେବେ ଛୋଟ ଛୋଟ ମାଛଙ୍କୁ କଦାପି ବଞ୍ଚାଇ ରଖିହେବନି । କଂଗ୍ରେସ ହିଁ ଏହି ଦେଶକୁ ସଠିକ୍ ନେତୃତ୍ୱ ଦେଇପାରିବ ବୋଲି କହ୍ନେୟା କହିଛନ୍ତି ।
ମୋର କଂଗ୍ରେସ ଉପରେ ଭରସା ଅଛି । କଂଗ୍ରେସ ଗୋଟିଏ ଗଣତାନ୍ତ୍ରିକ ଦଳ । କ୍ଷମତାକୁ ପ୍ରଶ୍ନ ପଚାରିବାକୁ କଂଗ୍ରେସ ତାଙ୍କୁ ସବୁବେଳେ ସାଥ୍ ଦେବ ବୋଲି କହ୍ନେୟା କହିଛନ୍ତି । ଅନ୍ୟପଟେ ଆରଏସଏସ୍ ଉପରେ ଟାର୍ଗେଟ କରି ସେ କହିଛନ୍ତି, ସଂଘ ଏକ ପରିବାର ନୁହେଁ । ନିଜ ପରିବାରକୁ ଛାଡି ଯେଉଁ ପରିବାର ତିଆରି କରାଯାଏ ତାକୁ କେବେ ବି ପରିବାର କହିହେବନି ବୋଲି କହ୍ନେୟା କହିଛନ୍ତି ।
ଅନ୍ୟପଟେ ଗୁଜରାଟର ସ୍ୱାଧୀନ ବିଧାୟକ ଜିଗ୍ନେଶ ମେୱାନୀ ମଧ୍ୟ ଆଜି ବିଜେପି ଉପରେ ଜୋରଦାର ବର୍ଷିଛନ୍ତି । ଆମ ସମ୍ବିଧାନ ଓ ଗଣତନ୍ତ୍ର ଏବେ ବିପଦରେ ଅଛି । ଆଜି ଭାଇ-ଭାଇ ଶତ୍ରୁ ପାଲଟି ଯାଇଛନ୍ତି । କାନପୁର ଓ ଦିଲ୍ଲୀରୁ ହିଁ ପ୍ରତିଟି ନିଷ୍ପତ୍ତି ନିଆଯାଉଛି । କିଛି ବି ହେଲେ ଆମକୁ ଦେଶର ସମ୍ବିଧାନ, ଲୋକତନ୍ତ୍ରକୁ ପୁଣି ଠିଆ କରିବାକୁ ପଡିବ ବୋଲି ସେ କହିଛନ୍ତି । ଖାଲି ସେତିକି ନୁହେଁ ଜିଗ୍ନେଶ ଆହୁରି ମଧ୍ୟ କହିଛନ୍ତି ଯେ, ସେ ଜଣେ ସ୍ୱାଧୀନ ବିଧାୟକ । ତେଣୁ ସେ ଆଜି ଔପଚାରିକ ଭାବେ କଂଗ୍ରେସରେ ସାମିଲ ହୋଇପାରିନାହାଁନ୍ତି । ହେଲେ ୨୦୨୨ ନିର୍ବାଚନ ସେ କଂଗ୍ରେସ ଚିହ୍ନରୁ ହିଁ ଲଢିବେ ବୋଲି ଆଜି ଘୋଷଣା କରିଛନ୍ତି ।
ସୂଚନାଯୋଗ୍ୟ ଯେ, ଜ୍ୟୋତିରାଦିତ୍ୟ ଓ ସୁସ୍ମିତା ଦେବଙ୍କ ଭଳି ଯୁବ ନେତା କଂଗ୍ରେସର ହାତ ଛାଡୁଥିବା ବେଳେ କହ୍ୱେୟା ଓ ଜିଗ୍ନେଶଙ୍କ ଭଳି ଯୁବନେତାଙ୍କୁ ଦଳରେ ସାମିଲ କରି ବିଜେପିକୁ କଡା ଟକ୍କର ଦେବାକୁ ଲକ୍ଷ୍ୟ ରଖିଛି । ଆଗାମୀ ୨୦୨୪ ନିର୍ବାଚନକୁ ଦୃଷ୍ଟିରେ ରଖି ଏଭଳି ଋଣନୀତି କଂଗ୍ରେସ ପ୍ରସ୍ତୁତ କରୁଥିବା କୁହାଯାଉଛି । ବିହାରରେ ଗତ ୩ ଦଶକ ହେବ ହାତ ଟେକି ପାରୁନି କଂଗ୍ରେସ । ଏପରିକି ବିହାରରେ ମହାଗଠବନ୍ଧନ କରି ଦଳକୁ ନିର୍ବାଚନ ଲଢିବାକୁ ପଡୁଛି । ତେଣୁ ବିହାରରେ ପୁଣିଥରେ କଂଗ୍ରେସକୁ କମବ୍ୟାକ କରାଇବାକୁ କହ୍ନେୟା କୁମାରଙ୍କୁ ସାଥୀରେ ନେଇଥାଇପାରେ କଂଗ୍ରେସ । ସେହିଭଳି ଗୁଜୁରାଟରେ ଗତ ନିର୍ବାଚନରେ ବିଜେପିକୁ କଡା ଟକ୍କର ଦେଇଥିଲା କଂଗ୍ରେସ । ତେଣୁ ଏଥର ଶାସନ କ୍ଷମତାରେ ବସିବାକୁ କଂଗ୍ରେସ ଜିଗ୍ନେଶଙ୍କ ଭଳି ଯୁବ ଚେହେରାଙ୍କୁ ଦଳରେ ସାମିଲ କରିଛି । ଯେଉଁମାନେ ବିଭିନ୍ନ ଆନ୍ଦୋଳନର ନେତୃତ୍ୱ ନେଉଥିବେ ଏବଂ ସଂଘର୍ଷ କରି ରାଜନୀତିରେ ନିଜର ପରିଚୟ ହାସଲ କରିଥିବେ ସେହିଭଳି ଚେହେରାଙ୍କ ହାତ ଧରିବାକୁ ଚାହୁଁଛି କଂଗ୍ରେସ । ପୂରା ଦେଶକୁ ବିଜେପି ଗୁଜୁରାଟ ମଡେଲ ଦେଖାଉଥିବା ବେଳେ ଗୁଜୁରାଟରେ ଦଳକୁ ଧରାଶାୟୀ କରିବାକୁ ଉଦ୍ୟମ କରୁଛି କଂଗ୍ରେସ । ଯାହାଦ୍ୱାରା ପୂରା ଦେଶକୁ ଏକ ଭିନ୍ନ ବାର୍ତ୍ତା ଯିବ ଏବଂ କଂଗ୍ରେସ ପୁଣିଥରେ ଶାସନ କ୍ଷମତାକୁ ଫେରିପାରିବ ।