କାହିଁକି ମୋହନ ମାଝୀଙ୍କୁ ମୁଖ୍ୟମନ୍ତ୍ରୀ ବାଛିଲା ବିଜେପି? ସତ୍ତା ପଛରେ କଣ ରହିଛି ସମୀକରଣ? ପଢନ୍ତୁ, ମୁଖ୍ୟମନ୍ତ୍ରୀ ବାଛିବା ପଛର ରାଜନୀତି ଗଣିତ…
କନକ ବ୍ୟୁରୋ: କୁହାଯାଏ ରାଜନୀତିରେ ସବୁଠୁ ଅଧିକ ଗୁରୁତ୍ୱପୂର୍ଣ୍ଣ ହେଉଛି ‘ସମୀକରଣ’ । ସତ୍ତାର ସମୀକରଣରେ ଯେଉଁ ନେତାଙ୍କ ଲେଖା ଛିଡିଲା, ସେ ନେତାଙ୍କ ଉପରେ ହାତୀ ସୁନାକଳସ ଢାଳିଲା ବୋଲି ବହୁ ଦିନରୁ କଥା ରହିଆସିଛି । ଆଉ ଏଥର ଓଡିଶା ରାଜନୀତିରେ ମୋହନ ମାଝୀଙ୍କୁ ମୁଖ୍ୟମନ୍ତ୍ରୀ ବାଛିବା ପଛରେ ସେମିତି କିଛି ସମୀକରଣ କାମ କରିଛି ବୋଲି ରାଜନୈତିକ ପଣ୍ଡିତମାନେ ଆକଳନ କରୁଛନ୍ତି । ପ୍ରଥମରେ ଆଦିବାସୀ ଚେହେରା, ଦ୍ୱିତୀୟରେ ଉତ୍ତର ଓଡିଶାକୁ ପ୍ରତିନିଧିତ୍ୱ ଆଉ ତୃତୀୟରେ ପଡୋଶୀ ରାଜ୍ୟରେ ବିଧାନସଭା ନିର୍ବାଚନକୁ ଆଖି ଆଗରେ ରଖି ବିଜେପି ମୋହନ ମାଝୀଙ୍କୁ ମୁଖ୍ୟମନ୍ତ୍ରୀ କରିଛି ବୋଲି ରାଜନୈତିକ ବିଶେଷଜ୍ଞମାନେ ଆଲୋଚନା କରୁଛନ୍ତି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଆଦିବାସୀ ଚେହେରା
କେନ୍ଦୁଝର ଆସନରୁ ଲଗାତାର ନିର୍ବାଚିତ ହେଇ ଆସୁଥିବା ମୋହନ ମାଝୀ ରାଜ୍ୟ ବିଜେପିର ଜଣେ ଟାଣୁଆ ଆଦିବାସୀ ନେତା । ଯେଉଁ କାରଣରୁ ମୁଖ୍ୟମନ୍ତ୍ରୀ ରେସରେ ଅଧ ଡଜନେରୁ ଅଧିକ ନେତା ରେସରେ ଥିଲେ ବି, ସମସ୍ତଙ୍କୁ ପଛରେ ପକେଇ ବାଜି ମାରି ନେଇଛନ୍ତି ମୋହନ ମାଝୀ । ସୁରେଶ ପୂଜାରୀ, କେଭି ସିଂହଦେଓ, ପ୍ରଭାତୀ ପରିଡା, ମନମୋହନ ସାମଲ, ମୁକେଶ ମହାଲିଙ୍ଗଙ୍କ ପରି ନେତା ଏଥର ମୁଖ୍ୟମନ୍ତ୍ରୀ ରେସରେ ଥିଲେ । ହେଲେ ସେ ସମସ୍ତଙ୍କୁ ପଛରେ ପକାଇ ବାଜିଗର ହେଇଛନ୍ତି ମୋହନ ମାଝୀ ।
ଅନ୍ୟପଟେ ବିରୋଧୀ ଆସନରେ ବସି ସରକାରକୁ ତୀକ୍ଷଣ୍ ତୀର ମାରିବାରେ ମଧ୍ୟ ମୋହନ ମାଝୀ ବେଶ୍ ମାହିର । ଗତ ସରକାରରେ ସେ ରାଜ୍ୟର ବିରୋଧୀ ଦଳ ମୁଖ୍ୟ ସଚେତକ ରହିଥିଲେ । ଏମିତି କି, ବାଚସ୍ପତିଙ୍କ ଉପରକୁ ଡାଲି ଫିଙ୍ଗିବାର ସାହାସ ମଧ୍ୟ ଦେଖାଇଥିଲେ । ତେଣୁ ଏମିତି ଜଣେ ଚେହେରାକୁ ଆଗକୁ ଆଣି, ରାଜ୍ୟରେ ସ୍ଥିର ସରକାର ଦେବାକୁ ଲକ୍ଷ୍ୟ ରଖିଛି ବିଜେପି ।
ଉତ୍ତର ଓଡିଶାକୁ ପ୍ରତିନିଧିତ୍ୱ
ଏଥର କେନ୍ଦ୍ର ମନ୍ତ୍ରୀମଣ୍ଡଳରେ ଓଡିଶାରୁ ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନ, ସୁନ୍ଦରଗଡ ସାଂସଦ ଜୁଏଲ ଓରାମଙ୍କୁ କ୍ୟାବିନେଟରେ ସ୍ଥାନ ମିଳିଥିଲା । ଏ ଦୁଇଟି ଆସନ ହେଉଛି ପଶ୍ଚିମ ଓଡିଶାର । ତେଣୁ ପଶ୍ଚିମ ଓଡିଶା ବଦଳରେ ଅନ୍ୟ ଅଞ୍ଚଳକୁ ମଧ୍ୟ ସମାନ ପ୍ରତିନିଧିତ୍ୱ ଦେବାକୁ ବିଜେପି ଏପରି ସମୀକରଣ ଠିକ୍ କରିଥିବା ଆଲୋଚନା ହେଉଛି ।
ମୋହନ ମାଝୀ କେନ୍ଦୁଝରରୁ ଆସୁଥିବାରୁ ତାଙ୍କୁ ମୁଖ୍ୟମନ୍ତ୍ରୀ ବାଛି ସରକାରରେ ଉତ୍ତର ଓଡିଶାକୁ ପ୍ରତିନିଧିତ୍ୱ ଦେଇଛି ବିଜେପି । ସେହିପରି ପଶ୍ଚିମ ଓଡିଶାର ଟାଣୁଆ ନେତା କେଭି ସିଂହଦେଓଙ୍କୁ ଉପ-ମୁଖ୍ୟମନ୍ତ୍ରୀ କରିଛି ଦଳ । ତା ସହିତ ଉପକୂଳ ନେତା ତଥା ମହିଳା ଚେହେରା ଭାବେ ଦଳ ନିମାପଡା ବିଧାୟିକା ପ୍ରଭାତୀ ପରିଡାଙ୍କୁ ମଧ୍ୟ ଉପ-ମୁଖ୍ୟମନ୍ତ୍ରୀ ଆସନରେ ବସାଇବା ସହିତ ସରକାରରେ ସବୁ ଅଞ୍ଚଳକୁ ସମାନ ପ୍ରତିନିଧିତ୍ୱ ଦେବାକୁ ଚେଷ୍ଟା କରିଥିବା କୁହାଯାଉଛି ।
ଗୋଷ୍ଠୀ କନ୍ଦଳରେ ପୂର୍ଣ୍ଣଚ୍ଛେଦ
ରାଜ୍ୟ ବିଜେପିରେ ଅଧିକାଂଶ ସମୟରେ ଗୋଷ୍ଠୀ କନ୍ଦଳ କଥା ସାମ୍ନାକୁ ଆସିଥାଏ । ହେଲେ ରାଜନୈତିକ ବିଶେଷଜ୍ଞଙ୍କ କହିବା ମୁତାବକ, ମୋହନ ମାଝୀ ହେଉଛନ୍ତି ଏମିତି ଜଣେ ନେତା, ଯିଏକି ଗୋଷ୍ଠୀ କନ୍ଦଳରେ ରୁହନ୍ତି ନାହିଁ । ରାଜ୍ୟ ବିଜେପିର ପ୍ରତିଟି ଗୋଷ୍ଠୀର ଲୋକ ତାଙ୍କୁ ପସନ୍ଦ କରିବା ସହିତ ତାଙ୍କ କଥାରେ ହଁ ଭରିଥାନ୍ତି । ତେଣୁ ଗୋଷ୍ଠୀ କନ୍ଦଳରେ ପୂର୍ଣ୍ଣଚ୍ଛେଦ ପକାଇବାକୁ ମୋହନଙ୍କୁ ବିଜେପି ମୁଖ୍ୟମନ୍ତ୍ରୀ ବଛାଯାଇଥିବା ଅନୁମାନ କରାଯାଉଛି । ତା ସହିତ ତାଙ୍କ ପାଖରେ ଦୀର୍ଘ ଦିନର ଅଭିଜ୍ଞତା ରହିଛି । ଶିକ୍ଷକତା ସହିତ ସେ ଜଣେ ଉଚ୍ଚଶିକ୍ଷିତ ନେତା । ଏହାବାଦ୍ ବିରୋଧୀ ଦଳରେ ଥିବା ସମୟରେ ସେ ଗୁରୁତ୍ୱପୂର୍ଣ୍ଣ ପଦ ପଦବୀରେ ରହି ଆସିଛନ୍ତି । ତେଣୁ ଏହି ସବୁ ସମୀକରଣକୁ ଦେଖି ମୋହନଙ୍କୁ ଦଳ ବାଛିଥିବା କୁହାଯାଉଛି ।
ମୋହନଙ୍କୁ ବାଛିବା ପଛରେ ଝାଡଖଣ୍ଡ ନିର୍ବାଚନ
ଓଡିଶାର ମୁଖ୍ୟମନ୍ତ୍ରୀ ଭାବେ ବିଜେପି ମୋହନ ମାଝୀଙ୍କୁ ବାଛିବା ପଛରେ ଆଗାମୀ ଝାଡଖଣ୍ଡ ବିଧାନସଭାର ଗନ୍ଧ ବାରିଛନ୍ତି ରାଜନୈତିକ ବିଶେଷଜ୍ଞ । ଆଗକୁ ଝାଡଖଣ୍ଡରେ ବିଧାନସଭା ନିର୍ବାଚନ ହେବାକୁ ଅଛି, ଆଉ ଏହା ପୂର୍ବରୁ ଆଦିବାସୀ କାର୍ଡ ଖେଳି ପଡୋଶୀ ଝାଡଖଣ୍ଡରେ ଭୋଟ୍ ହାତେଇବାକୁ ଲକ୍ଷ୍ୟ ରଖିଛି ପଦ୍ମ ଦଳ ।
କାହିଁକି ନା, ଗତ ଲୋକସଭା ନିର୍ବାଚନରେ ଝାଡଖଣ୍ଡର ୧୪ରୁ ୧୨ ଲୋକସଭା ଆସନ ଜିତିଥିବା ଏନଡିଏ, ଏଥର ୨୦୨୪ରେ ମାତ୍ର ୯ଟି ଆସନ ଜିତିପାରିଛି । ତେଣୁ ଆଗକୁ ଏଠାରେ ବିଧାନସଭା ନିର୍ବାଚନ ହେବାକୁ ଥିବାରୁ, ମୋହନ ମାଝୀଙ୍କ ଭଳି ଆଦିବାସୀ ଚେହେରାଙ୍କୁ ସାମ୍ନାକୁ ଆଣି ଝାଡଖଣ୍ଡର ଆଦିବାସୀ ଭୋଟରଙ୍କ ଉପରେ ପ୍ରଭାବ ପକାଇବାକୁ ଚେଷ୍ଟା କରିଛି ଭାରତୀୟ ଜନତା ପାର୍ଟି । ଜେଏମଏମ୍ ନେତା ହେମନ୍ତ ସୋରେନଙ୍କ ଗିରଫ ପରେ ଏଠାରେ ବିଜେପି ପାଇଁ ସାମାନ୍ୟ ଅଡୁଆ ପରିସ୍ଥିତି ସୃଷ୍ଟି ହେଇଛି । ଆଉ ଏହାକୁ କାଉଣ୍ଟର କରିବାକୁ ଦଳ ମୋହନଙ୍କୁ ମୁଖ୍ୟମନ୍ତ୍ରୀ ଆସନ ଭେଟି ଦେଇଛି ବୋଲି ରାଜନୈତିକ ପଣ୍ଡିତମାନେ କହିବା ଆରମ୍ଭ କରିଛନ୍ତି ।
ସୂଚନାଯୋଗ୍ୟ ଯେ, ଆସନ୍ତାକାଲି ମୋହନ ମାଝୀ ରାଜ୍ୟର ୧୫ ତମ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବେ । ଭୁବନେଶ୍ୱରର ଜନତା ମଇଦାନରେ ଏହି ଭବ୍ୟ ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ଗୃହମନ୍ତ୍ରୀ ଅମିତ ଶାହା ପ୍ରମୁଖ ଏଥିରେ ଯୋଗ ଦେବେ ।