ନିର୍ବାଚନ ପାଇଁ ବିଜେଡିର ନୂଆ ରଣନୀତି । ଜନତାଙ୍କ ଅର୍ଥରେ ନିର୍ବାଚନୀ ବୈତରଣୀ ପାର ହେବାକୁ ସୋସିଆଲ ମିଡ଼ିଆରେ ଚାନ୍ଦା ମାଗିଲା ଦଳ ।
କନକ ବ୍ୟୁରୋ: ନୂଆ ଓଡ଼ିଶା ନା ନିର୍ବାଚନ ପାଇଁ ବିଜେଡିକୁ ଲୋଡ଼ା ଦାନ ଅର୍ଥ ? ନିର୍ବାଚନ ଯେତେ ପାଖଉଛି ରାଜନୀତି ଦୃଶ୍ୟ ପଟ କଡ଼ ଲେଉଟାଇବାରେ ଲାଗିଛି । ଆଉ ବିଜୟ ହାସଲ କରିବା ପାଇଁ ନୂଆ ନୂଆ ଉପାୟ ବାହାର କରୁଛନ୍ତି ବିଭିନ୍ନ ରାଜନୈତିକ ଦଳ । ଏହାରି ମଧ୍ୟରେ ଶାସକ ବିଜେଡି ସୋସିଆଲ ମିଡିଆରେ ଆରମ୍ଭ କରିଥିବା ଏକ ଅଭିଯାନକୁ ନେଇ ଚର୍ଚ୍ଚା ଜୋର ଧରିଛି । ବିଜେଡି ଅଫିସିଆଲ ସୋସିଆଲ ସାଇଟ ଜରିଆରେ ଲୋକଙ୍କୁ ଡ଼ୋନେସନ୍ ବା ଚାନ୍ଦା ମାଗୁଥିବା ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟତଃ ବିଜେଡି ଏହାକୁ ଅଧିକ କ୍ରିୟାଶୀଳ କରିବା ପାଇଁ ମୋବାଇଲ ଆଣ୍ଡ୍ରଏଡ଼ ଆପ୍ ଏବଂ www.bjdodisha.org.in ଅଫିସିଆଲ ୱେବସାଇଟର ସାହାଯ୍ୟ ନେଇଛି । ଯେଉଁଥିରେ ୫ଟଙ୍କା, ୧୦ ଟଙ୍କା, ୫୦ଟଙ୍କା, ୧୦୦ଟଙ୍କା, ୨୦୦ ଟଙ୍କା ୫୦୦ଟଙ୍କା ଏବଂ ୧୦୦୦ ଟଙ୍କା ଆପଣ ବିଜେଡିକୁ ଦାନ କରିପାରିବେ । ଏହା ବିଜେଡିକୁ ବଳ ଦେବା ସହ ନୂଆ ଓଡ଼ିଶା ଗଠନ କ୍ଷେତ୍ରରେ ସହାୟକ ହେବ ବୋଲି ଦଳ ଦର୍ଶାଇବାକୁ ଚାହିଁଛି । ତେବେ ରାଜ୍ୟରେ ୧୯ ବର୍ଷ ହେବ ଶାସନ ଗାଦି ବସିଥିବା ବିଜୁ ଜନତା ଦଳକୁ ହଟାତ୍ କାହିଁକି ଦାନ ଅର୍ଥ ଲୋଡ଼ା ପଡ଼ିଲା ତାକୁ ନେଇ ଏବେ ସୋସିଆଲ ମିଡ଼ିଓ ସହ ବିଭିନ୍ନ ରାଜନୈତିକ ମହଲରେ ହଟ୍ ଟପିକ୍ ପାଲଟିଛି ।
କେବଳ ବିଜେଡି ନୁହେଁ ପୂର୍ବରୁ ଏଭଳି ଦାନ ଅର୍ଥ ବିଜେପି ଓ କଂଗ୍ରେସ ଦଳକୁ ଲୋଡ଼ା ପଡ଼ିଛି । ଦେଶର ଧନୀ ଦଳଭାବେ ଗଣାଯାଉଥିବା ବିଜେପି ଆଗାମୀ ନିର୍ବାଚନ ବୈତରଣୀ ପାର ହେବାପାଇଁ ବିଭିନ୍ନ ଜରିଆରେ ଦାନ ଅର୍ଥ ଅନୁରୋଧ କରୁଥିବା ସୋସିଆଲ ମିଡ଼ିଆରେ ଦେଖିବାକୁ ମିଳିଛି । ସେହିଭଳି ଦେଶର ସର୍ବପୂରାତନ ରାଜନୈତିକ ଦଳ କଂଗ୍ରେସକୁ ମଧ୍ୟ ଦାନ ଅର୍ଥର ଆବଶ୍ୟକତା ପଡ଼ିଥିବା ଦେଖିବାକୁ ମିଳିଥିଲା । ସବୁଠାରୁ ରୋଚକ ବିଷୟ ହେଲା ଯେ, କିଏ କେଉଁ କାର୍ଯ୍ୟ ପାଇଁ ରାଜ୍ୟ ବା ଦେଶବାସୀଙ୍କ ଠାରୁ ଅନୁରୋଧ କରୁଛି ତାହାର ଅସଲ ଚିତ୍ର ପଦାକୁ ଆସିପାରୁନି । ଯାହାକୁ ବିଭିନ୍ନ ମହଲରେ ନେଇ ତର୍କବିତର୍କ ଲାଗିରହିଛି ।