କନକ ବ୍ୟୁରୋ : ଲୋକସଭାରେ ପାରିତ ହୋଇଛି ନାଗରିକ ସଂଶୋଧନ ବିଲ୍ ୨୦୧୯ । ଏବେ କେବଳ ରାଜ୍ୟସଭାରେ ପାରିତ ହେବା ଅପେକ୍ଷାରେ ରହିଛି । ଏଭଳି ସ୍ଥିତିରେ ଓଡିଶାର କେନ୍ଦ୍ରାପଡାରେ ରହୁଥିବା ବାଂଲାଦେଶୀଙ୍କ ମଧ୍ୟରେ ଛନକା ପଶିଛି । ତେବେ ପାକିସ୍ତାନ ବିଭାଜନ ଏବଂ ବାଂଲାଦେଶ ଗଠନ ଭିତରେ ଶରଣାର୍ଥୀ କାହିଁକି ନିଜ ଦେଶ ଛାଡି ଭାରତର ଶରଣ ନେଇଥିଲେ , ତାହା କ୍ୟାମେରା ସାମନାରେ କହିଛନ୍ତି । ଶରଣାର୍ଥୀଙ୍କ ମୁହଁରେ ସେଦିନର ସେହି କାହାଣୀ ଶୁଣିଲେ ଦେହ ଶିତେଇ ଉଠିବ ।
Kanak News is now on WhatsApp
Join and get latest news updates delivered to you via WhatsApp
ପାକିସ୍ତାନରୁ ବାଂଲାଦେଶ ଅଲଗା ହେବା ସମୟରେ ସୁବାସିନୀଙ୍କ ଭଳି ହଜାର ହଜାର ଲୋକ ଭିଟାମାଟି ଛାଡ଼ି ଚାଲି ଆସିଥିଲେ ବହୁତ ଦୂର । କାରଣ, ଘରୁ ଟାଣି ନେଇ କରାଯାଉଥିଲା ଦୁଷ୍କର୍ମ, ପାଦେ ପାଦେ ଥିଲା ମୃତ୍ୟୁର ଭୟ । ଆଉ ଶେଷରେ ଏହି ବାଂଲାଦେଶୀଙ୍କ ଠିକଣା ପାଲଟିଥିଲା କେନ୍ଦ୍ରାପଡ଼ା । ଜୀବନ ଭୟ ଓ ଇଜ୍ଜତ ବଂଚାଇବା ଆଶାରେ କେନ୍ଦ୍ରାପଡ଼ା ଜିଲ୍ଲା ମହାକାଳପଡ଼ାର ଏହି ଅପନ୍ତରା ସ୍ଥାନରେ ମୁଣ୍ଡ ଗୁଞ୍ଜିଥିଲେ ହଜାର ହଜାର ଲୋକ । ସାଂପ୍ରଦାୟିକ ଭେଦଭାବ, ନିର୍ଯାତନା, ଦୁଷ୍କର୍ମ, ଗଣଦୁଷ୍କର୍ମ, ହତ୍ୟା ଭଳି ଜଘନ୍ୟ ପ୍ରତାଡ଼ନା ଭିତରେ ଓଡ଼ିଶା ଚାଲିଆସିଥିଲେ ବାଂଲାଦେଶୀ ଶରଣାର୍ଥ ।
ପାକିସ୍ତାନ ବିଭାଜନ ଏବଂ ବାଂଲାଦେଶ ଗଠନ ଭିତରେ ଲକ୍ଷ ଲକ୍ଷ ଲୋକ ବାସହରା ହୋଇଗଲେ । ଆଉ ଏହା ପଛରେ ଥିଲା ଧାର୍ମିକ ବିଦ୍ୱେଷ । ୧୯୭୧ ମସିହାରେ ଯେତେବେଳେ ଇନ୍ଦିରା ଗାନ୍ଧୀ ଭାରତର ପ୍ରଧାନମନ୍ତ୍ରୀ ଥିଲେ, ଏହି ଶରଣାର୍ଥୀଙ୍କୁ ଭାରତ ବିଭିନ୍ନ ପ୍ରାନ୍ତରେ ଥଇଥାନ କରିଥିଲେ । ଆଉ ଏହି କ୍ରମରେ ମହାକାଳପଡ଼ା ବ୍ଲକର ଜମ୍ବୁ, ରାମନଗର, ବତୀଘର, ସୁନୀତା, ଫର୍ନାସୀ ଆଦି ପଂଚାୟତରେ ଏହି ଭଳି ହଜାର ହଜାର ବାଂଲାଦେଶୀଙ୍କ ଥଇଥାନ ହୋଇଥିଲା ।
ଏହି ନିର୍ଯାତନାର କାହାଣୀ ହିଁ ଲୋକସଭାରେ ଦୋହରାଇଥିଲେ ଗୃହମନ୍ତ୍ରୀ ଅମିତ ଶାହା, ଯେତେବେଳେ ସୋମବାର ମଧ୍ୟରାତ୍ରୀରେ ନାଗରିକ ସଂଶୋଧନ ବିଲ୍ ନେଇ ବିତର୍କ ଚାଲିଥିଲା । ଆଉ ଆଜି ଯେତେବେଳେ ନାଗରିକ ସଂଶୋଧନ ବିଲ୍ ୨୦୧୯ ଲୋକସଭାରେ ପାରିତ ହୋଇଛି ଏବଂ ରାଜ୍ୟସଭାରେ ପାରିତ ହେବା ଅପେକ୍ଷାରେ ରହିଛି, ଠିକ୍ ସେତିକି ବେଳେ ଏହି ବାଂଲାଦେଶୀ ଶରଣାର୍ଥୀଙ୍କ ମନରେ ଛନକା ପଶିଛି । କିନ୍ତୁ ଏହି ଶରଣାର୍ଥୀଙ୍କୁ ବିଚଳିତ ହେବାର କୌଣସି କାରଣ ନାହିଁ ବୋଲି ସ୍ପଷ୍ଟ କରିଛନ୍ତି ଗୃହମନ୍ତ୍ରୀ ।