କାହିଁକି ଅଧ ରାତିରେ ହୋଇଥିଲା ବାଲାକୋଟ ଏୟାରଷ୍ଟ୍ରାଇକ । ଏହା ଉପରୁ ପରଦା ହଟାଇଛନ୍ତି ବାୟୁସେନା ମୁଖ୍ୟ ବିଏସ ଧନୱା । ଜାତୀୟ ଗଣମାଧ୍ୟମ ଇଣ୍ଡିଆ ଟୁଡେ କନକ୍ଲେଭରେ ବାଲୋକୋଟ ଏୟାରଷ୍ଟ୍ରାଇକକୁ ନେଇ ବଡ କଥା କହିଛନ୍ତି ବାୟୁସେନା ମୁଖ୍ୟ । ଭଲ ରଣକୌଶଳ ଜାଣିଥିବା ଦେଶ ରାତିରେ ହିଁ ଆକ୍ରମଣ କରିଥାନ୍ତି । ଗଲ୍ଫ ଯୁଦ୍ଧ ସମୟରେ ମଧ୍ୟ ସମାନ ସ୍ଥିତି ଦେଖିବାକୁ ମିଳିଥିଲା । ଏହି ଯୁଦ୍ଧର ଆରମ୍ଭ ରାତିରୁ ହିଁ ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ବାୟୁସେନା ମୁଖ୍ୟଙ୍କ ଅନୁଯାୟୀ, ଯେଉଁ ଦେଶ ପାଖରେ ଭଲ ରଣକୌଶଳ ରହିଥାଏ ସେ ଦେଶ ରାତିରେ ଆକ୍ରମଣ କରିଥାନ୍ତି । ସେହିଭଳି ଯେଉଁ ଦେଶ ପାଖରେ ଯୁଦ୍ଧ ପାଇଁ ସେଭଳି ଖାସ୍ ରଣନୀତି ନଥାଏ ସେହି ଦେଶ ଦିନରେ ଆକ୍ରମଣ କରିଥାନ୍ତି । ଏହାପୂର୍ବରୁ ପଡୋଶୀ ପାକିସ୍ତାନ ବାରମ୍ବାର କହି ଆସୁଥିଲା ଯେ, ଭାରତ ରାତିରେ ଆକ୍ରମଣ କରି ପଳାୟନ କଲା । ତେବେ ଧନୱା କହିଛନ୍ତି, ପୁଲୱାମା ଆକ୍ରମଣ ପରେ ଫେବ୍ରୃଆରୀ ୨୬ରେ ବାଲାକୋଟରେ ଥିବା ଆତଙ୍କବାଦୀ ଶିବିରରେ ରାତି ଅଧିଆ ବମ ବର୍ଷା କରିଥିଲା ଭାରତୀୟ ବାୟୁସେନା । କେହି କିଛି ଭାବିବା ପୂର୍ବରୁ ଧ୍ୱଂସ ପାଇସାରିଥିଲା ଆତଙ୍କୀ ଶିବିର । ଆଉ ଏହାସହ ସଫଳ ହୋଇଥିଲା ଅପରେସନ ବନ୍ଦର ।
ଧନୱା କହିଛନ୍ତି, ରାତି ଅଧିଆ ଏହି ଅପରେସନ କରାଯାଇଥିବାରୁ ଭାରତକୁ ବଡ ସଫଳତା ମିଳିଥିଲା । ଏହାର ପରଦିନ ପାକିସ୍ତାନ ବାୟୁସେନାର ଯୁଦ୍ଧ ବିମାନ ଆକ୍ରମଣ କରିବାକୁ ଭାରତ ସୀମାକୁ ପଶିଥିଲା । ତେବେ ଭାରତୀୟ ସେନାର ପାଲଟା ଆକ୍ରମଣରେ ଆକାଶପଥରେ ହିଁ କ୍ରାସ ହୋଇଯାଇଥିଲା ପାକିସ୍ତାନର ଯୁଦ୍ଧ ବିମାନ । ତେବେ ଏହି ଅପରେସନରେ କେଉଁ ଅସ୍ତ୍ରଶସ୍ତ୍ର ବ୍ୟବହାର ହୋଇଥିଲା ସେ ବାବଦରେ କହିବାକୁ ମନା କରିଛନ୍ତି ବାୟୁସେନା ମୁଖ୍ୟ । କିନ୍ତୁ ସବୁ ପ୍ରକାର ଆକ୍ରମଣର ମୁକାବିଲା ପାଇଁ ଭାରତୀୟ ବାୟୁସେନା ପ୍ରସ୍ତୁତ ଅଛି । କେବଳ ସରକାରଙ୍କ ନିଷ୍ପତି ଦେଲେ ବାୟୁସେନା ନିଜର ପରାକ୍ରମ ଦେଖାଇବ ବୋଲି କହିଛନ୍ତି ବାୟୁସେନା ମୁଖ୍ୟ ବିଏସ ଧନୱା ।