ପୋଲିଂ ବୁଥରୁ ଇଭିଏମ ଧରି ରାତି ସାରା ଚାଲି ଚାଲି ଆସିଲେ ପୋଲିଂ ଅଧିକାରୀ । ନକ୍ସଲ ଭୟରେ ମୋବାଇଲ ବନ୍ଦ କରି ଅନ୍ଧାର ରାସ୍ତାରେ ଚାଲିଲେ ୧୫ କଲୋମିଟର
ପୋଲିଂ ବୁଥରୁ ଇଭିଏମ ଧରି ରାତି ସାରା ଚାଲି ଚାଲି ଆସିଲେ ପୋଲିଂ ଅଧିକାରୀ
କନକ ବ୍ୟୁରୋ : ନିର୍ବାଚନ ସାରି ରାତିରେ ଚାଲି ଚାଲି ଫେରିଲେ ଗଣତନ୍ତ୍ରର ନିର୍ଭିକ ସୈନିକ । ମାଓବାଦୀଙ୍କ ଭୟରେ ଗାଡିରେ ନଆସି ଇଭିଏମ-ଭିଭିପ୍ୟାଟ୍ ଧରି ଜଙ୍ଗଲ ରାସ୍ତାରେ ଚାଲି ଚାଲି ଫେରିଲେ ପୋଲିଂ କର୍ମଚାରୀ । ଏମିତି ସାହସ ଦେଖାଇଛନ୍ତି କନ୍ଧମାଳ ବାଲିଗୁଡାର ବୁଥ ନମ୍ବର ୧୩୭ ଓ ୧୩୮ ନମ୍ବର ବୁଥ କର୍ମଚାରୀ । ଆଉ ଏମାନଙ୍କୁ ବାଟ କଢେଇ ଆଣିଛନ୍ତି ସିଆରପିଏଫ ଯବାନ । ରାତି ୮ଟାରେ ମତ ସଂଗ୍ରହ ସାରିବା ପରେ ମାଓବାଦୀମାନେ ଏହି ଦୁଇଟି ବୁଥ୍ କ୍ୟାପ୍ଚର କରିବା ପାଇଁ ଯୋଜନା କରୁଥିବା ସିଆରପିଏଫ ଯବାନ ଜାଣିବାକୁ ପାଇଥିଲେ । ମାଓବାଦୀମାନେ କୁର୍ତଙ୍ଗଗଡରୁ ସିଲାକୁ ସଂଯୋଗ କରୁଥିବା ମୁଖ୍ୟ ରାସ୍ତାରେ ଗଛ ପକାଇ ରାସ୍ତା ଅବରୋଧ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଏହାସହ ସିର୍ଲାକୁ ସଂଯୋଗ କରୁଥିବା ଅନ୍ୟ ୩ଟି ରାସ୍ତାକୁ ମଧ୍ୟ ମାଓବାଦୀମାନେ ସିଲ କରିଦେଇଥିବା ନେଇ ଖବର ମିଳିବା ପରେ ସଜାଗ ହୋଇଯାଇଥିଲେ ସିଆରପିଏଫ ଯବାନ । ବୁଥରେ ପହଂଚି ତୁରନ୍ତ ବୁଥ ଖାଲି କରିବା ପାଇଁ କହିଥିଲେ । ଆଉ ପୋଲିଂ କର୍ମଚାରୀ ବୁଥରେ ନିଜର ସବୁ ଆସବାବ ପତ୍ର ଛାଡି କେବଳ ଇଭିଏମ ଓ ଭିଭିପ୍ୟାଟ୍କୁ ଧରି ରାତି ପ୍ରାୟ ସାଢେ ୮ଟା ସୁଦ୍ଧା ତୁମୁଡିବନ୍ଧ ଅଭିମୁଖେ ବାହାରିଥିଲେ । ଲ୍ୟାଣ୍ଡମାଇନ ବିସ୍ଫୋରଣ ଓ ଗୁଳିମାଡର ଭୟ ଭିତରେ ପାହାଡ ଜଙ୍ଗଲ ରାସ୍ତା ଦେଇ ସକାଳେ ତୁମୁଡିବନ୍ଧରେ ପହଂଥିଲେ ପୋଲିଂ କର୍ମଚାରୀ ।
ରାତିରେ ଜଙ୍ଗଲ ଭିତରେ ଚାଲିବା ବେଳେ ମୋବାଇଲ ସୁଇଚ୍ ଅଫ କରିବା ସହ ୧୦ଫୁଟ୍ ବ୍ୟବଧାନରେ ଜଣେ ଜଣେ ଚାଲିବା ପାଇଁ ସିଆରପିଏଫ ଯବାନ କହିଥିଲେ । ରାତିରେ ଚାଲିବା ବେଳେ ୩ଟି ପାହାଡ ଓ ୨ରୁ ୩ଟି ୬୦ଫୁଟର ଗାତକୁ ଅତିକ୍ରମ କରି ଆସିଛନ୍ତି ଏମାନେ । ରାତି ପ୍ରାୟ ୨ଟା ସୁଦ୍ଧା ତୁମୁଡିବନ୍ଧ ଥାନା ନିକଟରେ ପହଂଚିଥିଲେ ପୋଲିଂ କର୍ମଚାରୀ ଓ ସିଆରପିଏଫ ଯବାନ । ତୁମୁଡିବନ୍ଧ ନିକଟ ଏକ ନଦି ବନ୍ଧରେ କିଛି ସମୟ ବିଶ୍ରାମ କରିବା ପରେ ପୁଣି ଚାଲିବା ଆରମ୍ଭ କରି ଦେଇଥିଲେ ।
ରାତିରେ ପ୍ରାୟ ୭ରୁ ୮ ଘଂଟା ଧରି ୧୭ କିଲୋମିଟର ଚାଲିବା ପରେ ସକାଳ ସୁଦ୍ଧା ପୋଲିଂ କର୍ମଚାରୀଙ୍କୁ ସୁରକ୍ଷିତ ତୁମୁଡିବନ୍ଧରେ ପହଂଚାଇଥିଲେ ସିଆରପିଏଫ ଯବାନ । ୧୩୭ ଓ ୧୩୮ ନମ୍ବର ବୁଥ୍ ନୁହେଁ ଏଭଳି ଆହୁରି ୫ଟି ବୁଥର ପୋଲିଂ କର୍ମଚାରୀ ଜଙ୍ଗଲ ଭିତରେ ରାତି ସାରା ଚାଲିବା ପରେ ବାଲିଗୁଡା ବ୍ଲକରେ ପହିଂଚିଛନ୍ତି । ପୋକାରୀ ୧ ନମ୍ବର, ୨ ନମ୍ବର ବୁଥ୍, କାରାମି, ପାରିଗଡ, ଲଂଜାମୀର ଗୋଟିଏ ଲେଖାଏଁ ବୁଥ କର୍ମଚାରୀ ସାରା ରାତି ଜଙ୍ଗଲରେ ଚାଲିବା ପରେ ଇଭିଏମ ଓ ଭିଭିପ୍ୟାଟ୍ ସହ ବାଲିଗୁଡା ବ୍ଲକ ଅଫିସରେ ପହଂଚିଛନ୍ତି ।