କନକ ବ୍ୟୁରୋ : ପ୍ରଧାନମନ୍ତ୍ରୀ ମୋଦି ନିଜର ଦମଦାର ଭାଷଣ ବଳରେ ସମସ୍ତଙ୍କୁ ବାନ୍ଧି ରଖିବାର କ୍ଷମତା ରଖିଛନ୍ତି । ଘଣ୍ଟା ଘଣ୍ଟା ଧରି ଭାଷଣ ଦେବାରେ ମାହିର ମୋଦି । ସେ ମନ କି ବାତ କାର୍ଯ୍ୟକ୍ରମ ହେଉ କି ନିର୍ବାଚନୀ ସଭା । ପ୍ରାୟ ପ୍ରତ୍ୟେକ ଦିନ କିଛି ନା କିଛି କାର୍ଯ୍ୟକ୍ରମରେ ମୋଦିଙ୍କ ଭାଷଣ ଶୁଣିବାକୁ ମିଳେ । ଘଣ୍ଟା ଘଣ୍ଟା ଧରି ମୋଦି ଭାଷଣ ଦେଉଥିବା ବେଳେ ଆଦୌ କେବେ ଥକନ୍ତି ନାହିଁ ବରଂ ନିଜର ଓଜ୍ୱସୀ ଭାଷଣ ବଳରେ ସମସ୍ତଙ୍କୁ ବାନ୍ଧି ରଖିବାର କଳା ଜାଣିଛନ୍ତି ମୋଦି । ଯେଉଁଥିପାଇଁ ମୋଦିଙ୍କ ଭାଷଣ ଶୁଣିବାକୁ ହଜାର ହଜାର ସଂଖ୍ୟାରେ ଲୋକେ ଭିଡ ଜମାଇଥାନ୍ତି । ନିଜ ଭାଷଣରେ ମୋଦି ଯେଉଁ ଶବ୍ଦ ବ୍ୟବହାର କରିଥାନ୍ତି ତାହାକୁ ବେଶ ପସନ୍ଦ କରନ୍ତି ଲୋକେ । ଏପରିକି ଭାଷଣ ମାଧ୍ୟମରେ ବିରୋଧୀଙ୍କୁ ମୋଦିଙ୍କ ଟାର୍ଗେଟ କରିବାର ଶୈଳୀ ମଧ୍ୟ ନିଆରା । ଆଉ ଏଭଳିସ୍ଥଳେ ସାଧାରଣ ଲୋକଟିର ମନରେ ପ୍ରଶ୍ନ ଉଠିବା ସ୍ୱାଭାବିକ ଯେ, ପ୍ରଧାନମନ୍ତ୍ରୀ ମୋଦିଙ୍କ ପାଇଁ ଭାଷଣ କିଏ ଲେଖନ୍ତି? ପ୍ରଧାନମନ୍ତ୍ରୀ ମୋଦି ନିଜେ ଏହି ଭାଷଣ ଲେଖନ୍ତି ନା ଏଥିପାଇଁ କୌଣସି ଟିମ୍ ମଧ୍ୟ ରହିଛି । ଯଦି କୌଣସି ଟିମ୍ ଏହି ଭାଷଣ ଲେଖୁଥାନ୍ତି ତେବେ ଏଥିପାଇଁ ସେମାନଙ୍କୁ କେତେ ଟଙ୍କା ମିଳିିଥାଏ? ଆଉ ସାଧାରଣ ଲୋକଟିର ମନରେ ଉଠୁଥିବା ଏଭଳି ଅସମାହିତ ପ୍ରଶ୍ନର ଉତ୍ତର ପିଏମଓ ବା ପ୍ରଧାନମନ୍ତ୍ରୀ କାର୍ଯ୍ୟାଳୟ ପକ୍ଷରୁ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମ ଇଣ୍ଡିଆ ଟୁଡେ ପକ୍ଷରୁ ପ୍ରଧାନମନ୍ତ୍ରୀ ମୋଦିଙ୍କ ଭାଷଣ ବାବଦରେ କିଛି ପ୍ରଶ୍ନର ଉତ୍ତର ଜାଣିବାକୁ ସୂଚନା ଅଧିକାର ଆଇନ ବଳରେ ପିଏମଓକୁ ତଥ୍ୟ ମଗାଯାଇଥିଲା । ପିଏମଓ ପକ୍ଷରୁ ଆସିଥିବା ଉତ୍ତରରେ କୁହାଯାଇଥିଲା ଯେ, ନିଜର ଭାଷଣର ଶେଷ ସ୍ପର୍ଶ ପ୍ରଧାନମନ୍ତ୍ରୀ ମୋଦି ନିଜେ ଦେଇଥାନ୍ତି । ଯେଉଁ କାର୍ଯ୍ୟକ୍ରମକୁ ମୋଦି ଯାଇଥାନ୍ତି, ସେହି କାର୍ଯ୍ୟକ୍ରମର ଆବଶ୍ୟକତାକୁ ଦୃଷ୍ଟିରେ ରଖି ବିଭିନ୍ନ ବ୍ୟକ୍ତିବିଶେଷ, ଅଧିକାରୀ, ବିଭାଗ, ସଙ୍ଗଠନ ଠାରୁ ସଂଗ୍ରହ କରାଯାଇଥିବା ତଥ୍ୟ ପ୍ରଧାନମନ୍ତ୍ରୀ ମୋଦିଙ୍କୁ ଦିଆଯାଇଥାଏ । ଆଉ ଏହି ତଥ୍ୟକୁ ଏକାଠି କରି ଭାଷଣ ପ୍ରସ୍ତୁତ କରାଯାଇଥାଏ, ଯାହାକୁ ଶେଷ ସ୍ପର୍ଶ ଦେଇଥାନ୍ତି ପ୍ରଧାନମନ୍ତ୍ରୀ ମୋଦି ।
ତେବେ ପ୍ରଧାନମନ୍ତ୍ରୀ ମୋଦିଙ୍କ ଭାଷଣ ଲେଖିବା ପାଇଁ କୌଣସି ଟିମ୍ ରହିଛନ୍ତି କି? ଯଦି ଅଛନ୍ତି ତେବେ ଟିମର ମେମ୍ବର କେତେ ଜଣ ରହିଛନ୍ତି ଓ ଏମାନଙ୍କୁ କେତେ ଟଙ୍କା ପେମେଣ୍ଟ ଦିଆଯାଏ । ଏଭଳି ପ୍ରଶ୍ନ ଇଣ୍ଡିଆ ଟୁଡେ ପକ୍ଷରୁ ପଚରାଯାଇଥିଲେ ମଧ୍ୟ ଏହି ପ୍ରଶ୍ନର ଉତ୍ତର ପିଏମଓ ପକ୍ଷରୁ ଦିଆଯାଇନାହିଁ ।
ପ୍ରଧାନମନ୍ତ୍ରୀ ମୋଦିଙ୍କ ନିଜର ଅସାଧାରଣ ଭାଷଣ ବଳରେ ଲୋକଙ୍କୁ ମନ୍ତ୍ରମୁଗ୍ଧ କରିଦିଅନ୍ତି । ବିକାଶମୂଳକ କଥାକୁ ମୋଦି ଏତେ ସ୍ପଷ୍ଟତା ଓ ପ୍ରଭାବୀ ଢଙ୍ଗରେ କହିଥାନ୍ତି ଯାହାକୁ ନେଇ ଦେଶରେ ଚର୍ଚ୍ଚା ହୋଇଥାଏ । ସେହିଭଳି ବିରୋଧୀଙ୍କୁ ଟାର୍ଗେଟ କରିବାର ଶୈଳୀ ମଧ୍ୟ ମୋଦିଙ୍କର ନିଆରା । କେତେବେଳେ ଗୁରୁଗାମ୍ଭୀର୍ଯ୍ୟ ପୂର୍ଣ୍ଣ ଶବ୍ଦରେ ବିରୋଧୀଙ୍କ ଉପରେ ବର୍ଷିଥାନ୍ତି ତ ପୁଣି କେତେବେଳେ ମଜାଳିଆ ଅନ୍ଦାଜରେ ବିରୋଧୀଙ୍କର ଭୂଲକୁ ଲୋକଙ୍କ ସାମ୍ନାକୁ ଆଣିଥାନ୍ତି । ଆଉ ସବୁଠୁ ବଡ କଥା ହେଲା ନିଜର ଦମଦାର ଭାଷଣ ବଳରେ ୨୦୧୪ରେ କଂଗ୍ରେସକୁ ବ୍ୟାକଫୁଟକୁ ଠେଲି ଦେଇଥିଲେ ମୋଦି । ଜବାହାରଲାଲ ନେହେରୁ, ଇନ୍ଦିରା ଗାନ୍ଧୀ, ଅଟଳ ବିହାରୀ ବାଜପେୟୀଙ୍କ ଭଳି ପ୍ରଧାନମନ୍ତ୍ରୀ ମୋଦି ମଧ୍ୟ ନିଜ ଭାଷଣ ନିଜେ ପ୍ରସ୍ତୁତ କରିଥାନ୍ତି ।