କନକ ବ୍ୟୁରୋ: ୨୦୧୯ ସାଧାରଣ ନିର୍ବାଚନରେ ଶାସକ ବିଜେଡି ସହ ତିନି ଜାତୀୟ ଦଳ ବିଜେପି, କଂଗ୍ରେସ ଓ ବାମଦଳକୁ ପ୍ରତିନିଧିତ୍ୱ କରିବାକୁ ସୁଯୋଗ ଦେଇଥିବା ଏକମାତ୍ର ଜିଲ୍ଲା ସୁନ୍ଦରଗଡରେ କିଏ ପିନ୍ଧିବ ପଞ୍ଚାୟତ ଶିରପା? ଏହି ପ୍ରଶ୍ନ ସେତେବେଳେ ଉଠିଛି, ଯେତେବେଳେ ୨୦୧୭ ପଞ୍ଚାୟତ ନିର୍ବାଚନ ପରେ ବଦଳିଯାଇଛି ସୁନ୍ଦରଗଡ ଜିଲ୍ଲାର କିଛି ଟାଣୁଆ ନେତାଙ୍କ ଆଭିମୁଖ୍ୟ । କାରଣ ଜିଲ୍ଲାର ସର୍ବାଧିକ ପ୍ରମୁଖ ନେତା ଏବେ ନିଜ କ୍ୟାମ୍ପ ଛାଡି ଅନ୍ୟ ଦଳରେ ।
Kanak News is now on WhatsApp
Join and get latest news updates delivered to you via WhatsApp
୨୦୧୯ ସାଧାରଣ ନିର୍ବାଚନ ପୂର୍ବରୁ ସୁନ୍ଦରଗଡ ବିଧାୟକ ଥିବା ଯୋଗେଶ ସିଂ କଂଗ୍ରେସ ଛାଡି ବିଜେଡି ଟିକେଟରେ ମୈଦାନକୁ ଓହ୍ଲାଇଥିଲେ । ଫଳସ୍ୱରୂପ ବିଜେଡି ଟିକେଟ ଆଶାୟୀ କୁସୁମ ଟେଟେ ପଦ୍ମ ଶିବିରକୁ ଲମ୍ଫ ଦେଇ ଏବେ ବିଧାୟିକା ଅଛନ୍ତି । ସେହିପରି ସମତାକ୍ରାନ୍ତି ଦଳରେ ଥିବା ଆଦିବାସୀ ନେତା ଜର୍ଜ ତିର୍କୀ ଏବେ କଂଗ୍ରେସ ପାଇଁ କାମ କରୁଛନ୍ତି । ଆଉ ଅଳ୍ପ ଦିନ ପୂର୍ବରୁ କଂଗ୍ରେସ ଛାଡି ବିଜେଡି ସହ ହାତ ମିଳାଇଛନ୍ତି ପୂର୍ବତନ କଂଗ୍ରେସ ବିଧାୟକ ପ୍ରଫୁଲ୍ଲ ମାଝୀ । ତେଣୁ ୨୦୨୪ ସାଧାରଣ ନିର୍ବାଚନ ପୂର୍ବରୁ ଏହି ପଞ୍ଚାୟତ ନିର୍ବାଚନରେ ପତିଆରା ବଜାୟ ରଖିବା ସବୁ ନେତାଙ୍କ ପାଇଁ ବଡ ଆହ୍ୱାନ ହୋଇଛି ।
ଗୁରୁତ୍ୱପୂର୍ଣ୍ଣ କଥା ହେଉଛି, ନିଜ ଦଳର ମହିଳା କର୍ମୀଙ୍କ ଅଭିଯୋଗ ପରେ ବରିଷ୍ଠ ବିଜେପି ନେତା ତଥା ସାଂସଦ ଜୁଏଲ ଓରାମ ଏବେ ଅଜ୍ଞାତବାସରେ । ସେ ପଞ୍ଚାୟତ ଲଢେଇରେ ଦଳ ପାଇଁ ଓହ୍ଲାଇବେ କି ନାହିଁ ତାହା ସ୍ପଷ୍ଟ ହୋଇପାରୁନି । ତେଣୁ ୨୦୧୭ରେ ଶାସକ ବିଜେଡିକୁ କଡା ଟକ୍କର ଦେଇଥିବା ବିଜେପି ପାଇଁ ଏଥର ନିର୍ବାଚନ ସହଜ ହୋଇନପାରେ ।
୨୦୧୭ ପଞ୍ଚାୟତ ନିର୍ବାଚନରେ ବିଜେଡି ଅଧ୍ୟକ୍ଷ ପଦ ହାତେଇଥିଲେ ମଧ୍ୟ ଏଥିପାଇଁ ଶାସକଦଳକୁ ଢେର କସରତ କରିବାକୁ ପଡିଥିଲା । କାରଣ ୩୫ ଜିଲ୍ଲା ପରିଷଦ ଆସନ ବିଶିଷ୍ଟ ଏହି ଜିଲ୍ଲାରେ ବିଜେଡି – ୧୪ , ବିଜେପି – ୧୩, କଂଗ୍ରେସ – ୫କୁ ଆସନ ମିଳିଥିବା ବେଳେ ସିପିଆଇ ସିପିଏମ ଓ ସ୍ୱାଧୀନ ପ୍ରାର୍ଥୀଙ୍କୁ ଗୋଟିଏ ଗୋଟିଏ ଆସନ ମିଳିଥିଲା । ତେଣୁ ସୁନ୍ଦରଗଡ ଦଖଲ ଏବେ ସବୁ ଦଳ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି ।