କର୍ଣ୍ଣାଟକରେ କିଏ ଗଢ଼ିବ ସରକାର? ଏକଜିଟ୍ ପୋଲରେ କଂଗ୍ରେସକୁ ବହୁମତ ମିଳିବା ନେଇ ସମ୍ଭାବନା   

କନକ ବ୍ୟୁରୋ: କର୍ଣ୍ଣାଟକରେ କିଏ ଗଢ଼ିବ ସରକାର । ଆଉ ଦିନକ ପରେ ଆସିବ ଫଇସଲା । ତେବେ ଏହା ପୂର୍ବରୁ ଏକଜିଟ୍ ପୋଲ ସାମ୍ନାକୁ ଆସିଛି । ଯେଉଁଥିରେ କଂଗ୍ରେସ ସବୁଠାରୁ ବଡ଼ ଦଳ ଭାବେ ଉଭା ହୋଇଛି । ଅର୍ଥାତ୍ କର୍ଣ୍ଣାଟକରେ ଏଥର କଂଗ୍ରେସ ସରକାର ଗଠନ କରିବ ବୋଲି ଅନୁମାନ କରିଛନ୍ତି ଅଧିକାଂଶ ଏକଜିଟ୍ ପୋଲ । ଏକଜିଟ୍ ପୋଲ ଗୁଡ଼ିକୁ ନେଇ ହୋଇଥିବା ‘ପୋଲ ଅଫ୍ ପୋଲସ୍’ରେ ଝୁଲା ସରକାର ନେଇ ସ୍ପଷ୍ଟ କରାଯାଇଛି । ଇଣ୍ଡିଆ ଟୁଡେ-ଏକ୍ସିସ ମାଇଁ ଇଣ୍ଡିଆ ସର୍ଭେ ଅନୁସାରେ, ଏଥର କର୍ଣ୍ଣାଟକରେ କଂଗ୍ରେସ ସରକାର ହେବ । ସେହିପରି ନ୍ୟୁଜ-୨୪- ଟୁଡେଜ୍ ଚାଣକ୍ୟ ମଧ୍ୟ କଂଗ୍ରେସ ସପକ୍ଷରେ ସର୍ଭେ କରିଛି । ତେବେ ଅଧିକାଂଶ ସଂସ୍ଥା ଓ ଟିଭି ଚ୍ୟାନେଲ ଝୁଲା ସରକାର ନେଇ ଇସାରା ଦେଇଛନ୍ତି । ଏବେ ଆସନ୍ତୁ ନଜର ପକାଇବା କ’ଣ କହୁଛି ଏକଜିଟ୍ ପୋଲ?

                                                  କର୍ଣ୍ଣାଟକ ଏକଜିଟ୍ ପୋଲ

ସେପଟେ ବୁଥ୍ ବାହୁଡା ମତ ପରେ ବିଭିନ୍ନ ରାଜନୈତିକ ଦଳ ନିଜର ପ୍ରତିକ୍ରିୟା ରଖିଛନ୍ତି । ଏକଜିଟ୍ ପୋଲର ଆକଳନ ଖାରଜ କରିଛନ୍ତି କର୍ଣ୍ଣାଟକ ମୁଖ୍ୟମନ୍ତ୍ରୀ ବସଭରାଜ ବୋମ୍ମଇ । କହିଛନ୍ତି, ରାଜ୍ୟରେ ବିଜେପି ପୁଣି ଥରେ ସରକାର ଗଢିବ । ଏକ୍ଜିଟ୍ ପୋଲ ସବୁବେଳେ ସତ ହୁଏନାହିଁ ବୋଲି କହିଛନ୍ତି ମୁଖ୍ୟମନ୍ତ୍ରୀ । ସେପଟେ ଏକଜିଟ୍ ପୋଲଗୁଡ଼ିକ ଉପରେ ଭରସା ଦେଖାଇନାହାନ୍ତି କର୍ଣ୍ଣାଟକ କଂଗ୍ରେସର ପ୍ରଦେଶ କମିଟି ଅଧ୍ୟକ୍ଷ ଡିକେ ଶିବକୁମାର । କହିଛନ୍ତି ଯେ କର୍ଣ୍ଣାଟକରେ ତାଙ୍କ ସହ ୧୪୬ରୁ ଅଧିକ ଆସନ ଜିତିବ । ଏବଂ ରାଜ୍ୟରେ ସରକାର ଗଠନ ନେଇ ଦୃଢୋକ୍ତି ମଧ୍ୟ ପ୍ରକାଶ କରିଛନ୍ତି ।

କର୍ଣ୍ଣାଟକରେ ଏଥର ରେକର୍ଡ ସଂଖ୍ୟକ ମତଦାନ ହୋଇଛି । କର୍ଣ୍ଣାଟକରେ ଏଥର ୭୨ ଦଶମିକ ୬୭ ପ୍ର୍ତିଶତ ମତଦାନ ହୋଇଛି । ତେବେ ଆଗକୁ ମଧ୍ୟ ଏହି ସଂଖ୍ୟା ଆହୁରି ବଢ଼ିପାରେ । କାରଣ ପୋଷ୍ଟାଲ ବାଲାଟ ଓ ହୋମ୍ ଭୋଟିଂ ସଂଖ୍ୟା ଏପର୍ଯ୍ୟନ୍ତ ଗଣନା କରାଯାଇନାହିଁ । ୨୦୧୮ ମସିହାରେ ୭୨ ଦଶମିକ ୪୪ ପ୍ରତିଶତ ମତଦାନ ହୋଇଥିଲା ବେଳେ ୨୦୧୩ରେ ୭୧ ଦଶମିକ ୮୩ ପ୍ରତିଶତ ଭୋଟ ପଡ଼ିଥିଲା । ଅର୍ଥାତ୍ ଚଳିତଥର ଭୋଟିଂ ହାର ବୃଦ୍ଧିଯାଇଛି, ଯାହା ପରିବର୍ତନ ଆଡ଼କୁ ଇସାରା କରୁଛି ବୋଲି ବିଶେଷଜ୍ଞ ମତ ଦେଇଛନ୍ତି ।