୪୮ ଆସନରେ କାହାକୁ ପ୍ରାର୍ଥୀ କରିବ ବିଜେଡି ? ଆଶାୟୀଙ୍କୁ ନେଇ ଅଙ୍କ କଷୁଛି ଦଳ । କାହା ଉପରେ ଭରସା କରିବ ଦଳ, କିଏ ପଡ଼ିବେ ବାଦ
କନକ ବ୍ୟୁରୋ : ବଜେଡି ୯୯ ବିଧାନସଭା ଓ ୨୦ ଲୋକସଭା ଆସନ ପାଇଁ ପ୍ରାର୍ଥୀ ଘୋଷଣା କରିବା ପରେ ଏବେ ସାରାରାଜ୍ୟର ନଜର ଅଟକିଛି ଅବଶିଷ୍ଟ ୪୮ ଆସନରୁ କାହାକୁ ପ୍ରାର୍ଥୀ କରିବ ଦଳ । ପ୍ରାର୍ଥୀ ଚୟନ ପାଇଁ ନବୀନ ନିବାସରୁ ଶଂଖ ଭବନ ପର୍ଯ୍ୟନ୍ତ ତୁହାକୁ ତୁହା ବୈଠକ ବସୁଛି । କାହାକୁ ଟିକେଟ ଦେଲେ ବିଜୟ ସମ୍ଭାବନା, ଅଧିକ ଅଛି, ତା ଉପରେ ଅଙ୍କ କଷୁଛନ୍ତି ନେତା । ତେବେ ସୂଚନା ଅନୁସାରେ ଅଧିକାଂଶ ଆସନରେ ପ୍ରାର୍ଥୀ ଚୂଡାନ୍ତ ହୋଇ ସାରିଛି । କିନ୍ତୁ ଆଉ କିଛି ଆସନରେ ପ୍ରାର୍ଥୀ ଚୟନ ପାଇଁ ଚାଲିଛି କସରତ । ..
Kanak News is now on WhatsApp
Join and get latest news updates delivered to you via WhatsApp
ଦୁଇଟି ପର୍ଯ୍ୟାୟରେ ୯୯ ବିଧାନସଭା ଆସନରେ ବିଜେଡି ପ୍ରାର୍ଥୀ ଘୋଷଣା କରିଥିବା ବେଳେ ୪୮ ଆସନରେ ପ୍ରାର୍ଥୀ ଦେଇନାହିଁ ଦଳ । ଏହା ଭିତରେ ଏମିତି କିଛି ଆସନ ଅଛି, ଯାହାକୁ ନେଇ ଏଯାଏଁ ଦୂର ହୋଇପାରିନି ଦ୍ୱନ୍ଦ୍ୱ । ହେଲେ ଆଶା ଛାଡିନାହାନ୍ତି ନେତା । ନବୀନ ନିବାସ ଆସି ଟିକେଟ ପାଇଁ ଶେଷ ଲବି ଚଳାଇଛନ୍ତି । କିନ୍ତୁ ଅଧିକାଂଶ ଆସନରେ ଆଶାୟୀଙ୍କ ସଂଖ୍ୟା ଅଧିକ ଥିବାରୁ ଅଙ୍କକଷା କରୁଛନ୍ତି ବିଜେଡିର ଥିଙ୍କ୍-ଟ୍ୟାଙ୍କ୍ । ହେଲେ, ଏହି ଆସନରେ ବିଜୟ ସମ୍ଭାବନା ଅଧିକ ଥିବା ପ୍ରାର୍ଥୀଙ୍କୁ ଟିକେଟ ଦେବାକୁ ରଣନୀତି କରୁଛି । କିନ୍ତୁ ଏନେଇ ଦଳ ପକ୍ଷରୁ କିଛି କହିନଥିଲେ ବି ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁସାରେ,
– ଭୁବନେଶ୍ୱର ଲୋକସଭା କ୍ଷେତ୍ର ଅଧିନରେ ଥିବା ଭୁବନେଶ୍ୱର ମଧ୍ୟ, ଜୟଦେବ, ଖୋର୍ଦ୍ଧା ଓ ଜଟଣୀକୁ ନେଇ ଦଳ ହିସାବ କିତାବ କରୁଛି । କିନ୍ତୁ ଭୁବନେଶ୍ୱର ମଧ୍ୟ ଆସନରେ ଅନନ୍ତ ଓ ଅମରେଶଙ୍କ କଳି ପରେ କାହାକୁ ଟିକେଟ ମିଳିବ? ସେନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି ।
– କେନ୍ଦୁଝର ଲୋକସଭା ଆସନରେ ଧନୁର୍ଜୟ ସିଦ୍ଧୁଙ୍କୁ ବିଜେଡି ପ୍ରାର୍ଥୀ କରିବା ପରେ ଘୋଷଣା ହୋଇନଥିବା ୫ ବିଧାନସଭା ଆସନର ଟିକେଟ ଆଶାୟୀ ଦ୍ୱନ୍ଦ୍ୱରେ ପଡିଛନ୍ତି । ବିଶେଷକରି ଚମ୍ପୁଆ ଆସନରୁ ବିଜେଡି ପୁଣି ମିନାକ୍ଷୀଙ୍କୁ ରିପିଟ୍ କରୁଛି କି ନୂଆ ଚେହେରାକୁ ସାମନାକୁ ଆଣୁଛି? ତା ଉପରେ ରହିଛି ସମସ୍ତଙ୍କ ନଜର ।
– ବାଲେଶ୍ୱର ସଂସଦୀୟ କ୍ଷେତ୍ର ଅଧିନରେ ଥିବା ୪ ବିଧାନସଭା ଆସନ ପାଇଁ ବିଜେଡି ପ୍ରାର୍ଥୀ ଘୋଷଣା କରିନାହିଁ । କିନ୍ତୁ ସୋର ଆସନରେ ବିଧାୟକ ଥିବା ପର୍ଶୁରାମ ଧଡାଙ୍କ ଟିକେଟ କାଟି ମାଧବ ଧଡାଙ୍କୁ ଦଳ ଟିକେଟ ଦେବା ପରେ, ବାଲେଶ୍ୱର ସଦର, ଭୋଗରାଇ, ରେମୁଣା, ନୀଳଗିରିରେ ଦଳ କାହାକୁ ଭରଷା କରିବ ? ସେ ନେଇ ଚିନ୍ତାରେ ପଡିଛନ୍ତି ନେତା ।
– କେନ୍ଦ୍ରାପଡା ଲୋକସଭା ଆସନର ସାଲେପୁର ଓ କେନ୍ଦ୍ରାପଡା ଆସନ ପାଇଁ ବିଜେଡି ପ୍ରାର୍ଥୀ ଘୋଷଣା କରିନଥିବାରୁ ଦଳ କିଛି ଭିନ୍ନ ନିଷ୍ପତି ନେଇପାରେ ବୋଲି ଚର୍ଚ୍ଚା ହେଉଛି । ବର୍ତମାନର ବିଧାୟକଙ୍କ ସ୍ଥାନରେ ନୂଆ ମୁହଁକୁ ଭରସା କରିପାରେ ବୋଲି ଆଲୋଚନା ହେଉଛି ।
କେବଳ ଏହି କେତୋଟି ଆସନ ନୁହେଁ,ବାକି ଥିବା ସମସ୍ତ ୪୮ ଆସନରେ ଆଶାୟୀ ଥିବା ବିଜେଡି ନେତା ଚିନ୍ତାରେ ଅଛନ୍ତି । ଏମିତିକି ବିଧାୟକ ଥିବା ନେତାମାନେ ଟିକେଟ କଟିବା ଭୟରେ ଅଛନ୍ତି । ତେବେ ବିଜେଡିର ରଣନୀତି କାହାକୁ ଜଣାନଥିବାରୁ ସୁପ୍ରିମୋ ଦଳର ବିଜୟ ପାଇଁ କିଛି ବି ନିଷ୍ପତି ନେଇପାରନ୍ତି ବୋଲି କହିଛନ୍ତି ରାଜନୀତି ସମୀକ୍ଷକ ।
ଦଳ ଘୋଷଣା କରିଥିବା ୯୯ ଆସନ ମଧ୍ୟରୁ ମାତ୍ର ୭ ଜଣ ବିଧାୟକଙ୍କ ଟିକେଟ କଟିଛି । ଆଉ କେତେ ଜଣଙ୍କ ଟିକେଟ କଟିବ ନା ସମସ୍ତଙ୍କ ଉପରେ ଭରସା କରିବେ ସୁପ୍ରିମୋ ତା ଉପରେ ସମସ୍ତଙ୍କ ନଜର ।