କନକ ବ୍ୟୁରୋ: କିଏ ହେବେ କଂଗ୍ରେସର ବିଧାୟକ ଦଳ ନେତା, ଏନେଇ ଆରମ୍ଭ ହୋଇ ଯାଇଛି ଅଙ୍କକଷା । ଚଳିତ ନିର୍ବାଚନରେ ୧୪ଟି ଆସନ ହାତେଇଛି କଂଗ୍ରେସ । ଏଥିରେ ଅଧିକାଂଶ ବିଧାୟକ ପ୍ରଥମ ଥର ପାଇଁ ନିର୍ବାଚିତ ହୋଇଛନ୍ତି । ଏମାନଙ୍କ ମଧ୍ୟରୁ କାହାକୁ ନେତା କଲେ, ଦଳ ବିଧାନସଭାରେ ନିଜର ସ୍ୱର ଉଠାଇପାରିବ, ସେ ନେଇ ଆଲୋଚନା କରିଛନ୍ତି ପ୍ରଭାରୀ ଅଜୟ କୁମାର ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସର ୯ରୁ ୯୦ ମିଶନ ସଫଳ ହୋଇନଥିଲେ ବି, ୨୦୧୯ ତୁଳନାରେ ଅଧିକ ବିଧାନସଭା ଆସନ ଜିତିବାରେ ସକ୍ଷମ ହୋଇଛି ଦଳ । କିନ୍ତୁ ଜିତିଥିବା ୧୪ କଂଗ୍ରେସ ବିଧାୟକଙ୍କ ମଧ୍ୟରୁ ୩ଜଣଙ୍କୁ ଛାଡିଦେଲେ, ଅଧିକାଂଶ ପ୍ରଥମ ଥର ପାଇଁ ବିଧାନସଭାକୁ ନିର୍ବାଚିତ ହୋଇ ଆସିଛନ୍ତି । ନବ ନିର୍ବାଚିତ ବିଧାୟକଙ୍କୁ ଡାକି ପ୍ରଭାରୀ ଭୁବନେଶ୍ୱରରେ ବୈଠକ କରି ବିଧାୟକ ଦଳ ନେତା କାହାକୁ କଲେ, ଦଳ ବିଧାନସଭାରେ ନିଜର ସ୍ୱର ଉଠାଇପାରିବ, ସେ ନେଇ ଆଲୋଚନା କରିଛନ୍ତି । ଅନ୍ୟପଟେ ଏଆଇସିସିରେ ଲବି କରିବା ପାଇଁ ତାରାଙ୍କ ସମେତ ଓଡିଶାର ଆଉ କିଛି ନେତା ଦିଲ୍ଲୀ ଯାଇଛନ୍ତି । ସୂଚନା ଅନୁସାରେ କିଛି ନେତା ତାରାଙ୍କୁ ବିଧାୟକ ଦଳ ନେତା ହିସାବରେ ଚାହୁଁଥିବାବେଳେ, ଆଉ କିଛି ଚାହୁଁନାହାନ୍ତି ।
ଆସନ୍ତାକାଲି ଦିଲ୍ଲୀରେ ଏଆଇସିସିର ସିଡବ୍ଲ୍ୟୁସିସି ବୈଠକ ବସୁଛି । ଏହି ବୈଠକରେ ପ୍ରଭାରୀ ଓ ପିସିସି ସଭାପତି ଯୋଗ ଦେବେ । ଏହି ବୈଠକରେ ଓଡିଶାରେ କଂଗ୍ରେସର ପରାଜୟକୁ ନେଇ ବରିଷ୍ଠ ନେତାଙ୍କ ସହ ଆଲୋଚନା ହେବ । ଦିଲ୍ଲୀରୁ ଫେରିବା ପରେ ଭୁବନେଶ୍ୱରରେ ଓଡିଶା କଂଗ୍ରେସର ଉଭୟ ବିଜୟୀ ଓ ପରାଜିତ ପ୍ରାର୍ଥୀଙ୍କ ସହ ବୈଠକ କରିବେ ପ୍ରଭାରୀ । ସେହି ବୈଠକରେ ୨୦ ହଜାରରୁ କମ୍ ଭୋଟରେ ହାରିଥିବା ନେତାଙ୍କୁ ୨୦୨୯ ନିର୍ବାଚନ ପାଇଁ ପ୍ରସ୍ତୁତ ହେବାକୁ ସଂଗଠନ ଦାୟିତ୍ୱ ଦିଆଯିବ । ଦଳ କେଉଁ ଆସନରେ, କଣ ପାଇଁ ହାରିଲା, ରିପୋର୍ଟ ପ୍ରସ୍ତୁତ କରି ଦିଲ୍ଲୀ ପଠାଇବେ । ଏଥିସହ ଓଡିଶା କଂଗ୍ରେସକୁ ମଜବୁତ କରିବା ପାଇଁ କାର୍ଯ୍ୟ ଜାରି ରଖିବେ ବୋଲି କହିଛନ୍ତି ପ୍ରଭାରୀ ଅଜୟ କୁମାର ।
୨୦୧୯ ତୁଳନାରେ କଂଗ୍ରେସ ରାଜ୍ୟରେ ଭଲ ପ୍ରଦର୍ଶନ କରିଥିଲେ ବି ଦଳୀୟ କନ୍ଦଳ, ଦଳୀୟ ନେତୃତ୍ୱ, ନେଇଥିବା କିଛି ନିଷ୍ପତିକୁ ନେଇ, ଉଠିଥିବା ବିବାଦକୁ ସମାଧାନ କରିବାରେ ଅସଫଳ ଥିଲେ ପିସିସି ସଭାପତି । ତେଣୁ ଆଗକୁ ଏଆଇସିସି ଓଡିଶାରେ କଂଗ୍ରେସର ନେତୃତ୍ୱ ପରିର୍ବତନ କରୁଛି ନା ଶରତଙ୍କ ଉପରେ ଭରଷା କରୁଛି ତା ଉପରେ ସମସ୍ତଙ୍କ ନଜର ରହିଛି ।