ମ୍ୟାଲେରିଆରୁ ମିଳିବ ମୁକ୍ତି । ପ୍ରଥମେ ଆଫ୍ରିକା ଦେଶରେ ହେବ ଟିକାକରଣ । ଜାଣନ୍ତୁ ଗୁରୁତ୍ୱପୂର୍ଣ୍ଣ ତଥ୍ୟ ।

କନକ ବ୍ୟୁରୋ: ମ୍ୟାଲେରିଆରୁ ମିଳିବ ମୁକ୍ତି । ଏନେଇ ବିଶ୍ୱ ସ୍ୱାସ୍ଥ୍ୟ ସଂଗଠନ (ଡବ୍ଲ୍ୟୁଏଚଓ) ଆରମ୍ଭ କରିଛି ଅଭିଯାନ । ତିନୋଟି ଆଫ୍ରିକୀୟ ଦେଶରେ ବିଶ୍ୱର ପ୍ରଥମ ମ୍ୟାଲେରିଆ ନିରୋଧୀ ଟିକାକରଣ କରାଯିବାକୁ ଘୋଷଣା କରିଛି। କିନ୍ତୁ ଏହାର ସବୁଠାରୁ ବଡ ସମର୍ଥକ ବିଲ୍ ଏବଂ ମେଲିଣ୍ଡା ଗେଟ୍ସ ଫାଉଣ୍ଡେସନ୍ ଟିକାର ମୂଲ୍ୟ ଉପରେ ଚିନ୍ତା ପ୍ରକଟ କରିଛନ୍ତି ଏବଂ ଟିକାକରଣ କାର୍ୟ୍ୟକ୍ରମକୁ ଆର୍ଥିକ ସହାୟତା ନଦେବାକୁ ନିଷ୍ପତ୍ତି ନେଇଛନ୍ତି। ଡବ୍ଲ୍ୟୁଏଚଓ ଏହି ଟିକାକୁ ମ୍ୟାଲେରିଆ ବିରୁଦ୍ଧରେ ଲଢେଇରେ ଏକ "ଐତିହାସିକ" ସଫଳତା ବୋଲି ବର୍ଣ୍ଣନା କରିଛି, କିନ୍ତୁ ବିଲ୍ ଆଣ୍ଡ ମେଲିଣ୍ଡା ଗେଟ୍ସ ଫାଉଣ୍ଡେସନ୍ ଚଳିତ ସପ୍ତାହରେ ଆସୋସିଏଟେଡ୍ ପ୍ରେସ୍ କୁ କହିଛି ଯେ ଏହା ଆଉ ଟିକାକୁ ଆର୍ଥିକ ସହାୟତା ପ୍ରଦାନ କରିବ ନାହିଁ। ଫାଉଣ୍ଡେସନର ଏପରି ନିଷ୍ପତ୍ତିରେ ବୈଜ୍ଞାନିକମାନେ ନିରାଶ ହୋଇଛନ୍ତି ।ଫାଉଣ୍ଡେସନର ଏପରି ନକାରାତ୍ମକ ନିଷ୍ପତ୍ତିରେ ଆଫ୍ରିକା ପରି ଦେଶରେ ଲକ୍ଷଲକ୍ଷ ଶିଶୁଙ୍କର ମୃତ୍ୟୁ ହୋଇପାରେ ବୋଲି ବୈଜ୍ଞାନିକମାନେ ଚେତାବନୀ ଦେଇଛନ୍ତି ।

ଏଥିସହିତ, ଏହି ନିଷ୍ପତ୍ତି ଜନସ୍ୱାସ୍ଥ୍ୟରେ ସମସ୍ୟାର ସମାଧାନ ପାଇଁ ଭବିଷ୍ୟତର ପ୍ରୟାସରେ ବାଧାସୃଷ୍ଟି କରିପାରେ । ଗ୍ଲାକ୍ସୋସ୍ମିଥ୍ କ୍ଲାଇନ୍ (ଜିଏସ୍ କେ) ଟିକା ଯାହାକୁ 'ମୋସ୍କାରିକ୍ସ' କୁହାଯାଏ ତାହା ପ୍ରାୟ ୩୦ ପ୍ରତିଶତ ପ୍ରଭାବଶାଳୀ ।ଏହି ଟିକାକୁ ଚାରି ଡୋଜ୍ ନେବାକୁ ପଡିବ । ହେଲେ ଗେଟ୍ସ ଫାଉଣ୍ଡେସନର ମ୍ୟାଲେରିଆ ସମ୍ବନ୍ଧୀୟ କାର୍ୟ୍ୟକ୍ରମର ନିର୍ଦ୍ଦେଶକ ଫିଲିପ୍ ୱେଲଖଫ୍ କହିଛନ୍ତି ଯେ "ମ୍ୟାଲେରିଆ ଟିକାର କାର୍ୟ୍ୟକାରିତା ଆମ ଚାହୁଁଥିବା ତୁଳନାରେ ବହୁତ କମ୍"। ଗେଟ୍ସ ଫାଉଣ୍ଡେସନର ଟିକା ଉପରେ ୨୦୦ ନିୟୁତ ଡଲାର ଖର୍ଚ୍ଚ କରିବା ଏବଂ ଏହାକୁ ବଜାରକରଣ କରିବା ପାଇଁ ଅନେକ ଦଶନ୍ଧି ବିତାଇବା ପରେ ଏଥିରୁ ବାହାର କରିବା ନିଷ୍ପତ୍ତି ଉପରେ ବିସ୍ତୃତ ବିବରଣୀ ଦେଇ ୱେଲଖଫ୍ କହିଛନ୍ତି ଯେ ଟିକା ଅପେକ୍ଷାକୃତ ମହଙ୍ଗା ଏବଂ ଏହାର ଯୋଗାଣ ଚ୍ୟାଲେଞ୍ଜପୂର୍ଣ୍ଣ।