କାହିଁକି ମାଡିଆସିଲା ମୃତ୍ୟୁର ତାର ? ଛାତି ଥରିଉଠିବା ଭଳି ଦୁର୍ଘଟଣା ପାଇଁ କିଏ ଦାୟୀ ? କାଠଗଡ଼ାରେ ୩ ଦୋଷୀ !
କନକ ବ୍ୟୁରୋ : ଦୁର୍ଘଟଣାର ଏହା ଏପରି ଏକ ଲୋମଟାଙ୍କୁରା କାହାଣୀ, ଯାହା ଆଉ କେବେ କେଉଁଠି ନଘଟୁ । ପୁଅର ନିର୍ବନ୍ଧ ପାଇଁ ହସଖୁସିରେ ବାହାରିଥିବା ଏକ ପରିବାରର ସ୍ପପ୍ନ, ମଝି ରାସ୍ତାରେ ଯେ ଏମିତି ଛାରଖାର ହୋଇଯିବ, ତାହା କେହି ବିଶ୍ୱାସ ବି କରିପାରୁନାହାନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗଞ୍ଜାମ ଜିଲ୍ଲା ମେନ୍ଦ୍ରାଜପୁରଠାରେ ଏକ ଘରୋଇ ବସ୍ ୧୧କେଭି ବିଦ୍ୟୁତ ତାର ସଂସ୍ପର୍ଶରେ ଆସିବାରୁ ପୁରା ବସରେ କରେଣ୍ଟ ଲାଗି ଯାଇଥିଲା । ସମସ୍ତେ ଏକ ବଡ ଧରଣର ବିଦ୍ୟୁତ୍ ଝଟକାରେ ଚିତ୍କାର କରି ଉଠିଥିଲେ । ପୁରା ବସରେ କରେଂଟ ଏତେ ଜୋର ଥିଲା ଯେ ସେଥିରୁ ମୁକୁଳିବା କଷ୍ଟକର ହୋଇପଡିଥିଲା ।
ଏଭଳି ଏକ ଦୁର୍ଘଟଣାକୁ ନେଇ ସାରା ରାଜ୍ୟ ଶୋକରେ ବୁଡି ରହିଥିବା ବେଳେ, ଏହି ଅଘଟଣ ପାଇଁ କିଏ ଦାୟୀ, ସେନେଇ ଚାଲିଛି କାରଣ ଖୋଜା । ଏହି ଛାତିଥରା ଘଟଣାକୁ ନେଇ କାଠଗଡାକୁ ଟାଣିହୋଇଯାଇଛନ୍ତି ବସର ଡ୍ରାଇଭର, ପୂର୍ତ ବିଭାଗ ଏବଂ ବିଦ୍ୟୁତ ବିଭାଗ । କିଏ ଦାୟୀ, ଆଉ କାହାର ଭୁଲ ପାଇଁ ଏତେ ବଡ ଅଘଟଣ ଘଟିଗଲା, ସେନେଇ ଉଠୁଛି ବଡ ପ୍ରଶ୍ନ ।
କାଠଗଡାର ପ୍ରଥମ ଦୋଷୀ, ବିଦ୍ୟୁତ ବିଭାଗ !
ଗଞ୍ଜାମରେ ବିଦ୍ୟୁତ ତାର ସଂସ୍ପର୍ଶରେ ଯାତ୍ରୀବାହୀ ବସ ଆସିବା ପଛରେ ସାମ୍ନାକୁ ଆସିଛି ବିଜୁଳି ବିଭାଗର ଚରମ ଅବହେଳା । ରାସ୍ତାଠାରୁ ୬.୧ମିଟର ଉଚ୍ଚତାରେ ବିଦ୍ୟୁତ ତାର ଟାଣିବାକୁ ନିୟମ ରହିଥିବା ବେଳେ ମାତ୍ର ୩.୧୪ମିଟର ଉଚ୍ଚତାରେ ଟଣା ଯାଇଥିଲା ୧୧କେଭିର ବିଦ୍ୟୁତ ତାର । ଯେଉଁଥିପାଇଁ ଘଟିଥିଲା ଏଭଳି ଲୋମଟାଙ୍କୁରା ଦୁର୍ଘଟଣା । ଏନେଇ ହୁଏତ ତଦନ୍ତ ଚାଲିବ ଆଉ କାର୍ଯ୍ୟାନୁଷ୍ଠାନ ବି ହେବ । ହେଲେ ଅବହେଳା ପାଇଁ ଯେଉଁମାନଙ୍କ ଜୀବନ ଚାଲିଗଲା ତାର ଭରଣା କିନ୍ତୁ ଅସମ୍ଭବ ।
କାଠଗଡାର ଦ୍ୱିତୀୟ ଦୋଷୀ, ବସ୍ ଡ୍ରାଇଭର !
ଯଦିଓ ରାସ୍ତାରେ ବିଦ୍ୟୁତ ତାର ଝୁଲିପଡିଥିଲା, ବସର ଡ୍ରାଇଭର ଏହାକୁ ଦେଖିପାରିଲେନି କେମିତି । ଆଉ କୁହାଯାଉଛି ପ୍ରଥମେ ଯେତେବେଳେ ଏହି ରାସ୍ତା ଦେଇ ପରିବାର ଲୋକଙ୍କୁ ଆଣିବାକୁ ବସଟି ଯାଇଥିଲା, ସେତେବେଳେ ମଧ୍ୟ ଝୁଲି ରହିଥିବା ଏହି ମୃତ୍ୟୁର ତାରରେ ସଂସ୍ପର୍ଶରେ ଆସିଥିଲା ବସ୍ । କିନ୍ତୁ ସେତେବେଳେ କରେଂଟ ନଥିବା କାରଣରୁ କୌଣସି ଅଘଟଣ ଘଟିନଥିଲା । ଆଉ ଯଦି ଏକଥା ସତ, ତେବେ କେମିତି ଜାଣିଶୁଣି ପୁଣି ସେଇ ଭୁଲ କଲେ ବସ୍ ଡ୍ରାଇଭର । ଯେତେବେଳେ ତାରଟି ଝୁଲି ରହିଥିଲା, ବସର ଡ୍ରାଇଭର ସଚେତନ ହେଲେନି କେମିତି । ଏହି ଦୁର୍ଘଟଣାରେ କେଉଁଠି ନା କେଉଁଠି ନିଜର ସାମାନ୍ୟ ଭୁଲ ପାଇଁ ବସର ଡ୍ରାଇଭର ମଧ୍ୟ କାଠଗଡାକୁ ଟାଣି ହୋଇଛନ୍ତି ।
କାଠଗଡାର ତୃତୀୟ ଦୋଷୀ, ପୂର୍ତ ବିଭାଗ !
ଦୁର୍ଘଟଣା ନେଇ ସମସ୍ତ ଦୋଷ ଯେ କେବଳ ବିଦ୍ୟୁତ ବିଭାଗର ତାହା କହିଲେ ଭୁଲ୍ ହୋଇଯିବ । ଏଭଳି ଅଘଟଣ ପାଇଁ କେଉଁଠି ନା କେଉଁଠି ଦାୟୀ ପୂର୍ତ ବିଭାଗ । କାରଣ କିଛି ଦିନ ଏଠାରେ ରାସ୍ତା କାମ କରାଯାଇଥିଲା । ରାସ୍ତା କାମ କଲାବେଳେ କିଛି ଫୁଟ୍ ମଧ୍ୟ ପୋତାଯାଇଥିଲା । ଫଳରେ ରାସ୍ତାର ଉଚ୍ଚତା ମଧ୍ୟ ବୃଦ୍ଧି ପାଇଥିଲା । ତେବେ ଏନେଇ ବିଦ୍ୟୁତ ବିଭାଗକୁ ଅବଗତ କରାଇବାର ଥିଲା । ଯଦି ରାସ୍ତାର ଉଚ୍ଚତା ବୃଦ୍ଧି ପାଇଛି, ସେହି ଅନୁସାରେ ବିଦ୍ୟୁତ ତାରର ଉଚ୍ଚତା ମଧ୍ୟ ବଢାଇବାର ଥିଲା । ଆଉ ସବୁଠୁ ବଡ କଥା ହେଉଛି ବିଦ୍ୟୁତ ଖୁଂଟଟି ରାସ୍ତା ଉପରେ ମଧ୍ୟ ରହିଥିଲା । ଏନେଇ ବିଦ୍ୟୁତ ବିଭାଗକୁ ଅବଗତ କରାଇଥିଲେ, ହୁଏତ ଖୁଂଟକୁ ସ୍ଥାନାନ୍ତର କରାଯାଇପାରିଥାନ୍ତା ।
ଏ ତମାମ ଦିଗକୁ ନେଇ ହୁଏତ ତଦନ୍ତ ଚାଲିବ ଆଉ କାର୍ଯ୍ୟାନୁଷ୍ଠାନ ବି ହେବ । ହେଲେ ଏଭଳି ଚରମ ଅବହେଳା ପାଇଁ ଯେଉଁମାନଙ୍କ ଜୀବନ ଚାଲିଗଲା ତାର ଭରଣା କିନ୍ତୁ ଅସମ୍ଭବ । ଦୋଷୀ ସିନା କାଠଗଡାକୁ ଟଣା ହେବେ, କିନ୍ତୁ ସେହି ପରିବାର ଆଖିରୁ ଝରୁଥିବା ଲୁହ ଶୁଖିବନି ।