ଆସାମରେ କିଏ ହେବେ ମୁଖ୍ୟମନ୍ତ୍ରୀ । ସସ୍ପେନ୍ସ ଜାରି । ଦିଲ୍ଲୀ ଗଲେ ଉଭୟ ହିମନ୍ତ ଓ ସର୍ବାନନ୍ଦ ।
କନକ ବ୍ୟୁରୋ : ଆସାମରେ ପରବର୍ତ୍ତୀ ମୁଖ୍ୟମନ୍ତ୍ରୀ କିଏ ହେବ । ଏନେଇ ସସ୍ପେନ୍ସ ଜାରି ରହିଥିବା ବେଳେ ଆଜି ବିଜେପିର କେନ୍ଦ୍ରୀୟ ନେତୃତ୍ୱ ଆସାମର ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୁୱାଲ ଓ ସ୍ୱାସ୍ଥ୍ୟମନ୍ତ୍ରୀ ହିମନ୍ତ ବଶ୍ୱଶର୍ମାଙ୍କୁ ଦିଲ୍ଲୀ ଡାକିଛନ୍ତି । କହିରଖୁ କି ଚଳିତ ବିଧାନସଭା ନିର୍ବାଚନରେ ଆସାମରେ ବିଜେପି ମେଣ୍ଟ ବହୁମତ ହାସଲ କରିଛି । ଏହାପରେ ସେଠାରେ କିଏ ମୁଖ୍ୟମନ୍ତ୍ରୀ ହେବ ତାହା ନେଇ ବିଚାର ବିମର୍ଷ କରିବାକୁ କେନ୍ଦ୍ର ବିଜେପି ଉଭୟଙ୍କୁ ଦିଲ୍ଲୀ ଡକାଇଛି । କୁହାଯାଉଛି କି, ଗୃହମନ୍ତ୍ରୀ ଅମିତ ଶାହା, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡା, ବିଜେପି ମହାସିଚିବ ବି.ଏଲ ସନ୍ତୋଷଙ୍କ ସହ ହିମନ୍ତ ବିଶ୍ୱଶର୍ମା ଓ ସର୍ବାନନ୍ଦ ସୋନୁୱାଲଙ୍କର ବୈଠକ ଆଜି ଅନୁଷ୍ଠିତ ହେବ ।
Kanak News is now on WhatsApp
Join and get latest news updates delivered to you via WhatsApp
ଏନେଇ ଆସାମ ବିଜେପି ପ୍ରବକ୍ତା ରୂପମ୍ ଗୋସ୍ୱାମୀ କହିଛନ୍ତି କି ଏହି ବୈଠକରେ ଆଗାମୀ ସରକାର ଗଠନ ନେଇ କେନ୍ଦ୍ରୀୟ ନେତୃତ୍ୱଙ୍କ ସହ ଚର୍ଚ୍ଚା ହେବ । ଅନ୍ୟପଟେ ୫ମ ଥର ବିଧାନସଭା ନିର୍ବାଚନ ଜିତିବା ପରେ ହିମନ୍ତ ବିଶ୍ୱଶର୍ମା କହିଥିଲେ କି ଏଥର ମୁଖ୍ୟମନ୍ତ୍ରୀ କିଏ ହେବ ସେନେଇ କେନ୍ଦ୍ରୀୟ ନେତୃତ୍ୱ ବିଚାର କରିବେ ।
କହିରଖୁ କି ୨୦୧୬ ବିଧାନସଭା ନିର୍ବାଚନ ପୂର୍ବରୁ ବିଜେପି କେନ୍ଦ୍ରମନ୍ତ୍ରୀ ଥିବା ସର୍ବାନନ୍ଦ ସୋନୁୱାଲଙ୍କୁ ଆସାମର ମୁଖ୍ୟମନ୍ତ୍ରୀ ଚେହେରା ଭାବେ ପ୍ରଦର୍ଶିତ କରିଥିଲା । ହେଲେ ଏଥର ନିର୍ବାଚନ ପୂର୍ବରୁ କିଏ ମୁଖ୍ୟମନ୍ତ୍ରୀ ହେବ ସେନେଇ ଦଳ ତରଫରୁ ନିର୍ବାଚନ ପ୍ରଚାର ବେଳେ କିଛି କୁହାଯାଇ ନଥିବାରୁ ସର୍ବାନନ୍ଦଙ୍କ ସ୍ଥାନରେ ଦଳ ହିମନ୍ତଙ୍କୁ ଚୟନ କରିପାରେ ବୋଲି ଆଶା କରାଯାଉଛି ।