ବିଶ୍ୱ ସ୍ୱାସ୍ଥ୍ୟ ସଙ୍ଗଠନର ଆଶ୍ଚର୍ଯ୍ୟ କରିଦେଲା ଭଳି ରିପୋର୍ଟ । ଭାରତରେ କରୋନା ଯୋଗୁ ପ୍ରାଣ ହରାଇଛନ୍ତି ୪୭ ଲକ୍ଷ ଲୋକ ।
କନକ ବ୍ୟୁରୋ: ଭାରତରେ କରୋନା ମୃତ୍ୟୁକୁ ନେଇ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ପକ୍ଷରୁ ଏକ ରିପୋର୍ଟ ପ୍ରକାଶ ପାଇଛି । ଯେଉଁଥିରେ କରୋନା କାରଣରୁ ଭାରତରେ ୪୭ ଲକ୍ଷ ଲୋକଙ୍କ ଜୀବନ ଯାଇଥିବା କୁହାଯାଇଛି । ତେବେ ଭାରତ ସରକାର ଦେଇଥିବା ରିପୋର୍ଟ ଅନୁସାରେ, ଭାରତରେ ଏପର୍ଯ୍ୟନ୍ତ କରୋନାରେ କେବଳ ୫ ଲକ୍ଷ ଲୋକ ଜୀବନ ହରାଇଛନ୍ତି । ତେଣୁ ‘ହୁ’ର ରିପୋର୍ଟକୁ ନେଇ ଏବେ ଭାରତ ସରକାର ଆପତ୍ତି ଉଠାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଭାରତ ସରକାରଙ୍କ କହିବା କଥା, ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ଯେଉଁ ମଡେଲ ଅନୁସାରେ ଏହି ରିପୋର୍ଟ ଜାରି କରିଛି, ତାହା ଠିକ୍ ନୁହେଁ । ଭାରତର ଆପତ୍ତି ସତ୍ତେ୍ୱ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ପୁରୁଣା ମଡେଲ ଅନୁସାରେ ଏହି ମୃତ୍ୟୁ ରିପୋର୍ଟ ପ୍ରକାଶ କରିଛି । ଭାରତର କଥାକୁ ହୁ ଆଦୌ ଗମ୍ଭୀରତାର ସହ ନେଇନାହିଁ ବୋଲି ଭାରତ ପକ୍ଷରୁ କୁହାଯାଇଛି । ଖାଲି ସେତିକି ନୁହେଁ, ଆହୁରି ମଧ୍ୟ କୁହାଯାଇଛି ଯେ, ଭାରତର କେବଳ ୧୭ଟି ରାଜ୍ୟର ତଥ୍ୟକୁ ନେଇ ଏହି ରିପୋର୍ଟ ପ୍ରକାଶ ପାଇଛି । ଏହି ୧୭ଟି ରାଜ୍ୟର ନାଁ କଣ ତାହା ମଧ୍ୟ ଜଣାପଡିନି । କେତେବେଳେ ଏହି ତଥ୍ୟ ସଂଗ୍ରହ କରାଗଲା ସେନେଇ ମଧ୍ୟ ଭାରତ ସରକାର ଆପତ୍ତି ଉଠାଇଛନ୍ତି ।
We understand that this report has covered what they label as excess mortality, in the yr spanning #COVID19. India has been telling WHO via diplomatic channels with data that we don’t agree with methodology followed for us: Dr VK Paul, on WHO’s claim on COVID deaths in India pic.twitter.com/kw8ph4gQ2b
— ANI (@ANI) May 5, 2022
ବିଶ୍ୱ ସ୍ୱାସ୍ଥ୍ୟ ସଙ୍ଗଠନର ରିପୋର୍ଟ କଥା ଯଦି କହିବା, ତେବେ ଗତ ଦୁଇ ବର୍ଷ ଭିତରେ ମୋଟ ଦେଢ କୋଟି ଲୋକ କରୋନାରେ ପ୍ରାଣ ହରାଇଥିବା ହୁ ଉଲ୍ଲେଖ କରିଛି । ଭାରତରେ ଏହି ସଂଖ୍ୟା ୪୭ ଲକ୍ଷ ବୋଲି ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ରିପୋର୍ଟ କରିଛି । ହୁ ମୁଖ୍ୟଙ୍କ କହିବା କଥା, ଏହା ବେସ୍ ଗୁରୁତ୍ୱପୂର୍ଣ୍ଣ ତଥ୍ୟ । ଅନ୍ୟପଟେ କିନ୍ତୁ ଭାରତ ଏହାକୁ ନେଇ ଆପତ୍ତି ଉଠାଇଛି । ଏମସ ନିର୍ଦ୍ଦେଶକ ରଣଦୀପ ଗୁଲେରିଆ ମଧ୍ୟ ଏହି ତଥ୍ୟକୁ ସଠିକ୍ ବୋଲି ଗ୍ରହଣ କରିନାହାଁନ୍ତି । ହୁ ଯେଉଁ ପ୍ରଣାଳୀରେ ଏହି ତଥ୍ୟ ଜାରି କରିଛି ତାହା ଭୁଲ ବୋଲି ସେ କହିଛନ୍ତି । ସେହିପରି ନୀତି ଆୟୋଗ ସଦସ୍ୟ ବିକେ ପଲ୍ ମଧ୍ୟ କହିଛନ୍ତି, ଭାରତ ପାଖରେ କରୋନାରେ ମୃତ୍ୟୁ ହୋଇଥିବା ସମସ୍ତ ରିପୋର୍ଟ ରହିଛି । ଏଭଳି ସ୍ଥିତିରେ ଏହି ଅନୁମାନକୁ ସତ ବୋଲି ଗ୍ରହଣ କରିବାକୁ ସେ ମନା କରିଛନ୍ତି ।