ଆରବିଆଇ ସାମ୍ନାରେ ଲମ୍ବା ଧାଡି଼ ପଛର ସତ: ଦିନ ମଜୁରିଆଙ୍କ ହାତରେ କିଏ ଧରାଇଲା ୨୦୦୦ ଟଙ୍କିଆ?

କନକ ବ୍ୟୁରୋ: ୨ ହଜାର ଟଙ୍କା ବଦଳ ପାଇଁ ଭୁବନେଶ୍ୱର ରିଜର୍ଭ ବ୍ୟାଙ୍କ ଆଗରେ ଲାଗିଛି ଭିଡ । ଟଙ୍କା ବଦଳ କରିବାକୁ ଆସିଥିବା ଲୋକଙ୍କ ମଧ୍ୟରେ ଅଧିକାଂଶ ହେଉଛନ୍ତି ବସ୍ତି ବାସିନ୍ଦା, ଦିନ ମଜୁରିଆ । ତେବେ ଏମାନଙ୍କ ପାଖରେ ଏତେ ଟଙ୍କା କୁଆଡୁ ଆସିଲା ଖୋଳତାଡ ପରେ ଧରାପଡିଥିଲା ସତ । କନକ ନ୍ୟୁଜ କ୍ୟାମେରାରେ ସତ କହିଥିଲେ ଧାଡିରେ ଛିଡା ହୋଇଥିବା ମହିଳା । ସେମାନଙ୍କ କହିବା କଥା ହେଲା, ଦିନକୁ ୨୦ ହଜାର ଟଙ୍କା ବଦଳାଇଲେ ସେମାନଙ୍କୁ ମିଳୁଛି ୨ ଶହ ଟଙ୍କାର ମଜୁରୀ । କଳା ଟଙ୍କାକୁ ଧଳା କରିବାକୁ କିଛି ଧନୀ ଲୋକ ଏଭଳି କାମ କରୁଥିବା ସନ୍ଦେହ କରାଯାଉଛି ।

ଆମ ପ୍ରତିନିଧି ମୌସୁମୀ ମହାନ୍ତିଙ୍କ ସାମ୍ନାରେ ନିଜ ମନିପର୍ସରୁ ୨୦୦୦ ଟଙ୍କିଆ ୧୦ଟି ନୋଟ୍ କାଢି ଦେଖାଉଛନ୍ତି ଜଣେ ଦିନ ମଜୁରିଆ ମହିଳା । ଆଶ୍ଚର୍ଯ୍ୟ ଲାଗୁଛି ଜଣେ ବସ୍ତି ବାସିନ୍ଦାଙ୍କ ପାଖରେ ଏତେ ଟଙ୍କା ଆସିଲା କୁଆଡୁ । ଭୁବନେଶ୍ୱରରେ ଥିବା ଆରବିଆଇର ଶାଖା କାର୍ଯ୍ୟାଳୟ ଆଗରେ ଛିଡା ହୋଇଥିବା ଏମିତି ଅନେକ ମହିଳା ପ୍ରାୟ ପ୍ରତିଦିନ ୨୦ ହଜାର ଟଙ୍କା ଲେଖାଏଁ ବଦଳ କରୁଛନ୍ତି ।

ଗୁପ୍ଚୁପ୍, ଦହିବରା କିମ୍ବା ବେଲୁନ୍ ବିକାଳି, ଟ୍ରଲି ଚାଳକ ଓ ଦିନମଜୁରିଆ ନୋଟ୍ ବଦଳାଇବା ପାଇଁ ଧାଡ଼ିରେ ଠିଆ ହେଉଛନ୍ତି । ଟଙ୍କା ବଦଳାଇବାକୁ ଧାଡ଼ିରେ ଛିଡ଼ା ହେଉଥିବା ଏମିତି ଲୋକ ୮୦ ପ୍ରତିଶତ । ଏକାଧିକ ମହିଳାଙ୍କ ହାତରେ ଏମିତି ୨୦ ହଜାର ଟଙ୍କା ଦେଖିବା ପରେ ସନ୍ଦେହ ବଢିଥିଲା । ଏତେ ପରିମାଣରେ ୨ ହଜାର ଟଙ୍କିଆ ନୋଟ୍ କେଉଁଠୁ ଆସିଲା । ଖୋଳତାଡ ପରେ କନକ ନ୍ୟୁଜ କ୍ୟାମେରାରେ ସତ କହିଛନ୍ତି ଧାଡିରେ ଛିଡା ହୋଇଥିବା ମହିଳା । ଖରା ତରାରେ ଛିଡା ହୋଇ ଦିନକୁ ୨୦ ହଜାର ଟଙ୍କା ବଦଳାଇଲେ ସେମାନଙ୍କୁ ମିଳୁଛି ୨ ଶହ ଟଙ୍କା ମଜୁରୀ ।

ସନ୍ଦେହ ହେଉଛି ପୋଲିସ ନଜରରୁ ବଂଚିବା ପାଇଁ କଳା ଟଙ୍କାକୁ ଧଳା କରିବା ଉଦ୍ଦେଶ୍ୟରେ କିଛି ଦଲାଲଙ୍କୁ ନିୟୋଜିତ କରିଛନ୍ତି ଧନୀ ଶ୍ରେଣୀର ଲୋକ । ବ୍ୟାଙ୍କରେ ଟଙ୍କା ବଦଳ କଲେ କାଳେ ଧରାପଡିଯିବେ, ସେହି ଭୟରେ ସମୟ ସରିଯିବା ପରେ ସିଧା ଆରବିଆଇ ଶାଖାରେ ଲୋକଙ୍କୁ ଲଗାଇ ନିଜ କଳା ଟଙ୍କାକୁ ଧଳା କରିବାରେ ଲାଗିପଡିଛନ୍ତି । ଏମାନଙ୍କୁ ଚିହ୍ନଟ କରିବା

ଆଇବିଆଇ ପକ୍ଷେ ସମ୍ଭବ ନୁହେଁ ବୋଲି କହିଛନ୍ତି ଆଂଚଳିକ ନିର୍ଦ୍ଦେଶକ । କିନ୍ତୁ ଧାଡିରେ ଛିଡା ହେଉଥିବା ଲୋକଙ୍କ ଭିଡିଓ ସିସିଟିଭିରେ ରହିଛି । ଏବଂ ବୈଧ ଡକ୍ୟୁମେଂଟ ରଖିବା ପରେ ହିଁ ଟଙ୍କା ବଦଳ କରାଯାଉଥିବା କହିଛନ୍ତି ।

ସମୟ ସରିଯିବା ପରେ ଚୁପଚାପ ଲୋକ ଲଗାଇ ଟଙ୍କା ବଦଳ କରି ଖସିଯିବାକୁ ବସିଥିଲେ ଏହି ବଡବଡିଆ । ହେଲେ ଆରବିଆଇ ଆଗରେ ଦୁଇଦିନ ଧରି ଲମ୍ବା ଲାଇନ ଲାଗିବା ପରେ ସବୁ ସତ ପଦାରେ ପଡିଯାଇଛି ।