କନକ ବ୍ୟୁରୋ : ଗତ କିଛି ଦିନ ପୂର୍ବେ ଆଇପିଏଲ ଶେଷ ହୋଇଥିବା ବେଳେ ଏବେ ପୁଣିଥରେ ଆଇପିଏଲକୁ ନେଇ ଚର୍ଚ୍ଚା ଆରମ୍ଭ ହୋଇଛି । କାରଣ ଆଇପିଏଲରେ ଦୁଇଟି ନୂଆ ଟିମ୍ ଯୋଡି ହୋଇଥିବା ବେଳେ ଚଳିତଥର ମହାନିଲାମୀ ହେବାକୁ ଯାଉଛି । ତେବେ ମହାନିଲାମୀ ପୂର୍ବରୁ ପ୍ରତ୍ୟେକ ଦଳ କେଉଁ ୪ ଜଣ ଖେଳାଳୀଙ୍କୁ ରିଟେନ କରିବେ ତାହା ଉପରେ ସମସ୍ତଙ୍କର ନଜର ରହିଛି । ପୁରୁଣା ୮ଟି ଦଳ ପାଖରେ ୪ ଜଣ ଲେଖାଏଁ ଖେଳାଳୀଙ୍କୁ ରିଟେନ କରିବାର ସୁଯୋଗ ରହିଛି । ଏସବୁ ଭିତରେ ଚାମ୍ପିୟନ ଚେନ୍ନାଇ ପୁଣିଥରେ ଧୋନୀଙ୍କୁ ରିଟେନ କରିବ ବୋଲି ଚର୍ଚ୍ଚା ହେଉଛି । କାରଣ ଗତ କିଛିଦିନ ପୂର୍ବେ ଧୋନୀ ଯେଉଁ ବୟାନ ଦେଇଥିଲେ ସେଥିରୁ ସଂକେତ ମିଳିଥିଲା ଯେ ଦଳ ତାଙ୍କୁ ଆଗାମୀ ଆଇପିଏଲ ସିଜିନ ପାଇଁ ରିଟେନ କରିବ । କାରଣ ଧୋନୀ କହିଛନ୍ତି ଚେନ୍ନାଇରେ ହିଁ ଶେଷ ଟି-୨୦ ମ୍ୟାଚ୍ ଖେଳିବେ । ଚେନ୍ନାଇକୁ ଚାମ୍ପିୟନ କରିବା ପଛରେ ଧୋନୀଙ୍କର ବଡ ଅବଦାନ ରହିଛି । ଧୋନୀଙ୍କ ଅଧିନାୟକତ୍ୱରେ ହିଁ ଚେନ୍ନାଇ ୪ ଥର ଚାମ୍ପିୟନ ହୋଇଛି । ତେଣୁ ଧୋନୀଙ୍କୁ ଏତେ ସହଜରେ ଛାଡିବାକୁ ଚାହୁଁନାହିଁ ଦଳ ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ଚେନ୍ନାଇ ସୁପର କିଙ୍ଗସ ଆସନ୍ତା ଆଇପିଏଲ ସିଜିନ ପାଇଁ ଧୋନୀଙ୍କୁ ରିଟେନ କରିପାରେ । ଧୋନୀଙ୍କ ବ୍ୟତୀତ ଋତୁରାଜ ଗାଏକ୍ୱାଡ, ରବୀନ୍ଦ୍ର ଜାଡେଜା ଓ ମୋଇନ ଅଲ୍ଲୀଙ୍କୁ ରିଟେନ କରିପାରେ ଚେନ୍ନାଇ । ମୋଇନ ଅଲ୍ଲୀଙ୍କ ସ୍ଥାନରେ ସାମ କୁରାନଙ୍କୁ ମଧ୍ୟ ଦଳ ରିଟେନ କରିବାର ସମ୍ଭାବନା ଥିବା କୁହାଯାଉଛି । ତେବେ ରୈନାଙ୍କୁ ଆଉ ଦଳ ରିଟେନ କରିବାର ସେଭଳି ସଂକେତ ମିଳିନାହିଁ ।
ଅନ୍ୟପଟେ ଦିଲ୍ଲୀ କ୍ୟାପିଟାଲ୍ସ ପୂର୍ବତନ ଅଧିନାୟକ ଶ୍ରେୟସ ଆୟରଙ୍କୁ ରିଲିଜ କରିପାରେ । ଯେହେତୁ ରିଷଭ ପନ୍ତଙ୍କୁ ଦଳ ଅଧିନାୟକ ଦାୟିତ୍ୱ ଦେଇଛି ତେଣୁ ଶ୍ରେୟସ ଆୟରଙ୍କୁ ଦଳ ରିଲିଜ କରିବାର ସମ୍ଭାବନା ଅଧିକ ରହିଛି । ରିଷଭ ପନ୍ତଙ୍କ ସହ ପୃଥ୍ୱୀ ଶ, ଅକ୍ଷର ପଟେଲ ଓ ନୋକିଆଙ୍କୁ ଦଳ ରିଟେନ କରିପାରେ ।
ନଭେମ୍ବର ୩୦ ମଧ୍ୟରେ ପୁରୁଣା ଦଳ ରିଟେନ ତାଲିକା ପ୍ରଦାନ କରିବେ । ରିଟେନ ପ୍ରକ୍ରିୟା ପୂରା ହେବା ପରେ ଆସନ୍ତାମାସରେ ମେଗା ନିଲାମୀ ହେବ । ଯେଉଁ ନିଲାମୀରେ ଦୁଇ ନୂଆ ଦଳ ଅହମ୍ମଦାବାଦ ଓ ଲକ୍ଷ୍ନୌ ମଧ୍ୟ ସାମିଲ ହେବେ । ଚର୍ଚ୍ଚା ଅନୁଯାୟୀ ପଞ୍ଜାବ ଦଳର ଅଧିନାୟକ ଥିବା କେ.ଏଲ ରାହୁଲ ଲକ୍ଷ୍ନୌ ଟିମର ମଙ୍ଗ ଧରିପାରନ୍ତି । ସେହିପରି ରୈନାଙ୍କୁ ମଧ୍ୟ ନୂଆ ଦଳରେ ଦେଖିବାକୁ ମିଳିପାରେ । ସେହିଭଳି ସର୍ବାଧିକ ଥର ଚାମ୍ପିୟନ ହୋଇଥିବା ମୁମ୍ବାଇ ଇଣ୍ଡିଆନ୍ସ ରୋହିତ ଶର୍ମାଙ୍କ ସହ ଯଶପ୍ରୀତ ବୁମରା, ଇଶାନ କିଶନଙ୍କୁ ରିଟେନ କରିପାରେ । ପୋଲାର୍ଡଙ୍କୁ ରିଟେନ କରିବାକୁ ଦଳ ପକ୍ଷରୁ ଜୋରଦାର ଉଦ୍ୟମ କରାଯାଉଥିବା ଚର୍ଚ୍ଚା ହେଉଛି । ଏହାବାଦ୍ ସୂର୍ଯ୍ୟକୁମାର ଯାଦବଙ୍କୁ ମଧ୍ୟ ମହାନିଲାମୀରେ ପୁଣିଥରେ କିଣିବାକୁ ଦଳ ଉଦ୍ୟମ କରିପାରେ । ତେଣୁ ପାଣ୍ଡ୍ୟା ବ୍ରଦର୍ସଙ୍କୁ ଦଳ ରିଟେନ କରିବା ବଦଳରେ ରିଲିଜ କରିବାର ସମ୍ଭାବନା ଯଥେଷ୍ଟ ଅଧିକ ରହିଛି ।
ସେହିଭଳି କୋଲକାତା ନାଇଟ ରାଇଡର୍ସ ଦୁଇ କାରବିଆନ ଖେଳାଳୀ ସୁନୀଏ ନାରାୟଣ ଓ ଆନ୍ଦ୍ରେ ରସେଲଙ୍କୁ ଦଳରେ ରିଟେନ କରି ରଖିବାର ଯଥେଷ୍ଟ ସମ୍ଭାବନା ରହିଛି । ସେହିଭଳି ଭାରତୀୟ ଖେଳାଳୀ ଭାବେ ଭେଙ୍କଟେଶ ଆୟର ଓ ଶୁଭମାନ ଗିଲଙ୍କୁ ନେଇ ବଡ ନିଷ୍ପତ୍ତି ନେଇପାରେ ଦଳ । ସେହିଭଳି ବାଙ୍ଗାଲୋର କୋହଲି, ମ୍ୟାକ୍ସୱେଲ, ଚହଲଙ୍କୁ ରିଟେନ କରିପାରେ । ଯେହେତୁ ଡିଭିଲିୟର୍ସ କ୍ରିକେଟରୁ ସନ୍ନ୍ୟାସ ନେଇ ସାରିଛନ୍ତି ତେଣୁ ଆଉ ଜଣେ ବ୍ୟାଟରଙ୍କୁ ରିଟେନ କରିପାରେ ଦଳ । ଆଉ ଏହି ରେସରେ ଦେବଦତ୍ତ ପାଡିକଲଙ୍କ ନାଁ ସବୁଠୁ ଆଗରେ ରହିଛି । ଏହାବାଦ୍ ହାଇଦ୍ରାବାଦ ରସିଦ ଖାନଙ୍କୁ ରିଟେନ କରିବାର ସମ୍ଭାବନା ଅଧିକ ରହିଛି । ସେହିଭଳି ରାଜସ୍ଥାନ କାହାକୁ ରିଟେନ କରିବ ସେନେଇ କୌଣସି ସଂକେତ ମିଳିନାହିଁ । କାରଣ ଦଳରେ ବିସ୍ଫୋରକ ବିଦେଶୀ ଖେଳାଳୀ ରହିଛନ୍ତି, ତେଣୁ ସେମାନଙ୍କ ମଧ୍ୟରୁ କାହା ନାଁରେ ରାଜସ୍ଥାନ ମୋହର ମାରିବ ତାହା ଉପରେ ସମସ୍ତଙ୍କର ନଜର ରହିଛି । ୨ଟି ନୂଆ ଟିମ୍ ସହ ୨୦୨୨ ଆଇପିଏଲ ଭାରତରେ ଖେଳାଯିବ ବୋଲି ବିସିସିଆଇ ସଚିବ ଜୟ ଶାହା କହିଛନ୍ତି ।